ଭୁବନେଶ୍ୱର,୨ା୧(ବ୍ୟୁରୋ): ରାଜ୍ୟ ସରକାର ପ୍ରଶାସନିକ କାର୍ଯ୍ୟକୁ ସମ୍ପୂର୍ଣ୍ଣ କାଗଜମୁକ୍ତ କରିବାକୁ ଲକ୍ଷ୍ୟ ରଖି ପଦକ୍ଷେପ ନେବା ଆରମ୍ଭ କରିଛନ୍ତି। ପ୍ରଶାସନିକ ଚିଠିପତ୍ର ଇଲେକ୍ଟ୍ରୋନିକ ମୋଡ୍ରେ କରାଯାଉଥିବା ବେଳେ ମାନୁଆଲ ବଜେଟ ବଦଳରେ ଇ-ବଜେଟ କାର୍ଯ୍ୟକାରୀ କରିଛନ୍ତି। କେବଳ ସେତିକି ନୁହେଁ, ବିଧାନସଭାର ପ୍ରଶ୍ନୋତ୍ତର, ବିଭିନ୍ନ କମିଟି ରିପୋର୍ଟ, ବାର୍ଷିକ ରିପୋର୍ଟ ଇତ୍ୟାଦି ମଧ୍ୟ ଇଲେକ୍ଟ୍ରୋନିକ ଜରିଆରେ ସମ୍ପାଦନ ହେଉଛି। ଏବେ ରାଜ୍ୟ ସରକାରଙ୍କ ଦ୍ୱାରା ପ୍ରକାଶିତ ହେଉଥିବା ବିଭିନ୍ନ ଗେଜେଟଗୁଡ଼ିକ ଆଉ ପୁସ୍ତକ ଆକାରରେ ଛପା ହବ ନାହିଁ। ପ୍ରୋସେସିଂଠାରୁ ଆରମ୍ଭକରି ଚୂଡ଼ାନ୍ତ ଗେଜେଟ କ୍ୟୁ-ଆର୍ କୋଡ୍ରେ ବାହାରିବ। ଏ ନେଇ ବାଣିଜ୍ୟ ଓ ପରିବହନ ବିଭାଗ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଛି। ଏହାଦ୍ୱାରା ରାଜ୍ୟ ସରକାରଙ୍କ କାଗଜ ଓ ଏ ବାବଦରେ ହେଉଥିବା ଅନ୍ୟାନ୍ୟ ଖର୍ଚ୍ଚ ହ୍ରାସ ପାଇବ। ବିଭାଗଗୁଡ଼ିକ ଇ-ଗେଜେଟକୁ କ୍ୟୁ-ଆର୍ କୋଡ୍ ବ୍ୟବହାର କରି ପାଇପାରିବେ ଓ ଆବଶ୍ୟକ ସ୍ଥଳେ ଛପାଇ ପାରିବେ। ଇ-ଗେଜେଟ ଡିଜିଟାଲ ପ୍ଲାଟ୍ଫର୍ମରେ ସହଜରେ ଉପଲବ୍ଧ ହେବ। କ୍ୟୁ-ଆର୍ କୋଡ୍ ଜରିଆରେ ଇ-ଗେଜେଟ୍କୁ ଡାଉନଲୋଡ୍ କରିହେବ। ଆସନ୍ତା ଫେବୃୟାରୀରୁ ସେସବୁ ଇ-ଗେଜେଟ କାର୍ଯ୍ୟକାରୀ କରାଯିବ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପରିବହନ ବିଭାଗ ଦ୍ୱାରା ନିଆଯାଉଥିବା ଏଭଳି ପଦକ୍ଷେପକୁ ପ୍ରଶଂସା କରିଛନ୍ତି। ମୁଖ୍ୟମନ୍ତ୍ରୀ କହିଛନ୍ତି ଯେ ଇ-ଗେଜେଟ କାଗଜମୁକ୍ତ ହେବା ସହ ପରିବେଶ ଅନୁକୂଳ ହୋଇପାରିବ। ଏହା ଉଭୟ ଜନସାଧାରଣ ଏବଂ ବିଭାଗଗୁଡ଼ିକ ମଧ୍ୟରେ ସ୍ବଚ୍ଛତା ରକ୍ଷା କରିବାରେ ସହାୟକ ହୋଇପାରିବ। ଏଥିସହିତ ଇଲେକ୍ଟ୍ରୋନିକ ମୋଡ୍ର ବହୁଳ ବ୍ୟବହାର ଫଳରେ ଜନସାଧାରଣଙ୍କୁ ସରକାରୀ କାର୍ଯ୍ୟାଳୟକୁ ବାରମ୍ବାର ଦୌଡ଼ିବାକୁ ପଡ଼ିବ ନାହିଁ। ସରକାରଙ୍କ ୫-ଟି କାର୍ଯ୍ୟକ୍ରମର ଏହା ହେଉଛି ମୂଳ ଲକ୍ଷ୍ୟ। ଜନସାଧାରଣ ହେଉଛନ୍ତି ମାଲିକ। ସେମାନେ ପ୍ରତ୍ୟେକ ଯୋଜନାର ମୂଳ ଆଧାର ମୁଖ୍ୟ ବୋଲି ମୁଖ୍ୟମନ୍ତ୍ରୀ କହିଛନ୍ତି।
ଇ-ଗେଜେଟ ପ୍ରସ୍ତୁତି ଦିଗରେ କାର୍ଯ୍ୟ ଜାରି ରହିଛି। ଆସନ୍ତା ଫେବୃୟାରୀ ସୁଦ୍ଧା ଇ-ଗେଜେଟ ପ୍ରକ୍ରିୟା ଶେଷ ହେବ ବୋଲି ବିଭାଗୀୟ ପ୍ରମୁଖ ସଚିବ ମଧୁସୂଦନ ପାଢ଼ୀ କହିଛନ୍ତି। ଏଥିସହିତ ୨୦୨୨ ଜାନୁୟାରୀ ପହିଲାରୁ ଡ୍ରାଇଭିଂ ଲାଇସେନ୍ସ(ଡିଏଲ) ଓ ଗାଡ଼ି କାଗଜପତ୍ର ସ୍ମାର୍ଟକାର୍ଡ ବଦଳରେ ଅନ୍ଲାଇନ ମୋଡ୍ରେ ବିଭାଗ ପକ୍ଷରୁ ଆରମ୍ଭ କରାଯାଇଛି। ଜନସାଧାରଣ ଡିଏଲ୍ ଏବଂ ଅନ୍ୟାନ୍ୟ ଯାନବାହନ ସମ୍ପର୍କିତ କାଗଜପତ୍ର ପାଇଁ ଆଉ ପରିବହନ କାର୍ଯ୍ୟାଳୟକୁ ଦୌଡ଼ିବେ ନାହିଁ କିମ୍ବା ଖର୍ଚ୍ଚାନ୍ତ ହେବେ ନାହିଁ। ସମସ୍ତ ଡକ୍ୟୁମେଣ୍ଟ ଅନ୍ଲାଇନ ମୋଡ୍ରେ ଉପଲବ୍ଧ ହେବ ବୋଲି ସେ କହିଛନ୍ତି।
ସୂଚନାଯୋଗ୍ୟ ଯେ ରାଜ୍ୟ ସରକାର ପ୍ରଥମ ଥର ପାଇଁ ୨୦୨୦-୨୧ ଆର୍ଥିକବର୍ଷର ବଜେଟକୁ କାଗଜବିହୀନ (ପେପରଲେସ୍) ଇ-ବଜେଟ ଆକାରରେ ଉପସ୍ଥାପନ କରିଥିଲେ । ଏହି ଇ-ବଜେଟ ଦ୍ୱାରା ୨ହଜାର ଗଛ କଟାରୁ ରକ୍ଷା ପାଇବା ସହ ୧.୫ କୋଟି କାଗଜ ପୃଷ୍ଠାକୁ ବଞ୍ଚାଯାଇ ପାରିଲା ବୋଲି ୨୦୨୧ ଫେବୃୟାରୀ ୨୧ରେ ବିଧାନସଭାରେ ବଜେଟ ଉପସ୍ଥାପନ କଲାବେଳେ ଅର୍ଥମନ୍ତ୍ରୀ ନିରଞ୍ଜନ ପୂଜାରୀ କହିଥିଲେ। ଗତ ଶୀତ ଅଧିବେଶନରେ ମଧ୍ୟ ବଜେଟ ସମେତ ସମସ୍ତ କାଗଜପତ୍ରକୁ ବାଦ୍ ଦିଆଯାଇ ଇ-ବିଧାନସଭାରେ ପରିଣତ କରାଯାଇଛି। ଇଲେକ୍ଟ୍ରୋନିକ ପ୍ଲାଟ୍ଫର୍ମ ବ୍ୟବହାର କାର୍ଯ୍ୟକୁ ସହଜ କରିବା ସହ ଅଯଥା ଅପଚୟକୁ ରୋକିବାରେ ସହାୟକ ହେଉଛି। ସରକାରୀ ଯୋଜନା ଓ ଜନସେବା ସମ୍ପର୍କିତ ସମସ୍ତ ତଥ୍ୟ ଇଲେକ୍ଟ୍ରୋନିକ ମୋଡ୍ରେ ଉପଲବ୍ଧ ହେଉଥିବାରୁ ଏହା ଜନସାଧାରଣଙ୍କୁ ଖର୍ଚ୍ଚ ଓ ସମୟ ଅପଚୟରୁ ରକ୍ଷା କରିପାରିବ। ଇଲେକ୍ଟ୍ରୋନିକ ମୋଡ୍ ସରକାରୀ କାର୍ଯ୍ୟ ସମ୍ପର୍କରେ ମତ ଦେଇ ଆଇଟି ଛାତ୍ର ପ୍ରତିମ ନାୟକ କହିଛନ୍ତି ଯେ ଏହା ଏକ ଉତ୍ତମ ବ୍ୟବସ୍ଥା। ମାତ୍ର ଏଥିପାଇଁ ସମସ୍ତ ସ୍ଥାନରେ ଇଣ୍ଟରନେଟ ବ୍ୟବସ୍ଥା ହେବା ଦରକାର। ଦୁର୍ବଳ ଭିିତ୍ତିଭୂମି ଯୋଗୁ ଏହି ବ୍ୟବସ୍ଥାରେ ଲୋକମାନେ ଫାଇଦା ଉଠାଇପାରୁ ନାହାନ୍ତି। ଇଣ୍ଟରନେଟ ବ୍ୟବସ୍ଥାକୁ ନିରବଚ୍ଛିନ୍ନ ଓ ବ୍ୟାପକ କରାଗଲେ ଜନସାଧାରଣ ଏହାର ଫାଇଦା ପାଇପାରିବେ।
