ଡେରାବିଶ,୨୩ା୪ (ବେବର୍ତ୍ତା ଅଜୟ ଦାସ):କେନ୍ଦ୍ରାପଡ଼ା ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ଡେରାବିଶ ଅଞ୍ଚଳର ମୁଖ୍ୟ ରାସ୍ତା କୁହାଯାଉଥିବା ୫୩ ନଂ. ଜାତୀୟ ରାଜପଥର ପଞ୍ଚୁପାଣ୍ଡବ ଛକ ନିକଟରୁ ଏଣ୍ଡର ପଞ୍ଚାୟତ କ୍ୟାବିନ ଛକ ଯାଏ ୩ କିଲୋମିଟର ରାସ୍ତାକୁ ୨୦୨୩ ମସିହାରେ ଫେବର ବ୍ଲକ ପକାଯାଇ ନିର୍ମାଣ କରାଯାଇଥିଲା। ଏହି ରାସ୍ତାଟି କେନ୍ଦ୍ରାପଡ଼ା ଜିଲା ସଦର ମହକୁମା ସହ ଯାଜପୁର ଓ କଟକ ଜିଲା ଅଞ୍ଚଳକୁ ସଂଯୋଗ କରୁଛି। ରାସ୍ତାଟି ବ୍ଲକ ଅଞ୍ଚଳର ମୁଖ୍ୟ ରାସ୍ତା ହୋଇଥିବାରୁ ଏହା ଉପରେ ୩ଟି ଜିଲାର ଲୋକମାନେ ନିର୍ଭର କରିଥାନ୍ତି। ୨୦୦୯ରେ ଏହି ରାସ୍ତାକୁ ଢଳେଇ ରାସ୍ତା କରାଯାଇଥିଲା। ପୁଣି ୨୦୨୩ରେ ଉକ୍ତ ରାସ୍ତାର ୩ କି.ମି. ଗ୍ରାମ୍ୟ ଉନ୍ନୟନ ବିଭାଗ କର୍ତ୍ତୃପକ୍ଷ ଫେବର ବ୍ଲକ ପକାଇଥିଲେ। ଆରମ୍ଭରୁ କାର୍ଯ୍ୟ ନିମ୍ନମାନର ହେଉଥିବା ନେଇ ବିଭିନ୍ନ ସମୟରେ ବିଭାଗୀୟ କର୍ତ୍ତୃପକ୍ଷଙ୍କଠାରୁ ଆରମ୍ଭ କରି ଜିଲା ପ୍ରଶାସନ ପର୍ଯ୍ୟନ୍ତ ଅଞ୍ଚଳବାସୀଙ୍କ ପକ୍ଷରୁ ଅଭିଯୋଗ ହେଉଥିଲା। ମାତ୍ର ବର୍ଷେ ନ ପୂରୁଣୁ ଏହି ରାସ୍ତାର ଶ୍ୟାମସୁନ୍ଦରପୁର ଗ୍ରାମ ନିକଟରେ ଫେଭର ବ୍ଲକ ଦବି ଯାଇ ଏକ ବିରାଟ ଗର୍ତ୍ତ ସୃଷ୍ଟି ହୋଇଛି। ଫଳରେ ଏହି ରାସ୍ତା ଦେଇ ଯାତାୟାତ କରୁଥିବା ଲୋକମାନେ ଦୁର୍ଘଟଣାର ସମ୍ମୁଖୀନ ହେଉଛନ୍ତି। ରବିବାର ସନ୍ଧ୍ୟାରେ ବାଇକ୍ ଯୋଗେ ଯାଉଥିବା ଦମ୍ପତିଙ୍କ ମଧ୍ୟରୁ ପଛରେ ବସିଥିବା ମହିଳା ଫେଭରର ବ୍ଲକ ଦବିଯାଇଥିବା ସ୍ଥାନରେ ଖସିପଡ଼ି ଗୁରୁତର ହୋଇଥିଲେ। ତେବେ ସ୍ଥାନୀୟ ଯୁବକଙ୍କ ସହାୟତାରେ ମହିଳାଙ୍କୁ ଚିକିତ୍ସା ଲାଗି ପଠାଯାଇଥିଲା। ଏଭଳି ବିପଜ୍ଜନକ ଅବସ୍ଥାକୁ ସୁଧାରିବା ପାଇଁ ସ୍ଥାନୀୟ ଅଞ୍ଚଳବାସୀ ବିଭାଗୀୟ କର୍ତ୍ତୃପକ୍ଷଙ୍କୁ ବାରମ୍ବାର ଜଣାଇଥିଲେ। ମାତ୍ର ଏହି ରାସ୍ତାର ଦବି ଯାଇଥିବା ସ୍ଥାନଟିକୁ ତୁରନ୍ତ ନିର୍ମାଣ ପାଇଁ ବିଭାଗୀୟ କର୍ତ୍ତୃପକ୍ଷ ବାରମ୍ବାର ପ୍ରତିଶ୍ରୁତି ଦେଇଥିଲେ ମଧ୍ୟ ବିଭାଗ ପକ୍ଷରୁ କୌଣସି ପଦକ୍ଷେପ ନିଆଯାଇ ନ ଥିବାରୁ ଦୁର୍ଘଟଣାରୁ ବର୍ତ୍ତିବା ପାଇଁ ଗ୍ରାମବାସୀ ରାସ୍ତା ଦବି ଯାଇଥିବା ସ୍ଥାନରେ ଗଛର ଡାଳ ପକାଇ ପଥଚାରୀମାନଙ୍କୁ ସତର୍କ କରାଉଛନ୍ତି। ଏଥିସହ ବିଭାଗ ପକ୍ଷରୁ କୌଣସି ପଦକ୍ଷେପ ନିଆଯାଇ ନ ଥିବାରୁ ସୋମବାର ଦବିଯାଇଥିବା ସ୍ଥାନକୁ ମରାମତି ପାଇଁ ଶ୍ୟାମସୁନ୍ଦରପୁର ଗ୍ରାମର ସୁଶାନ୍ତ ମଳିକ, ଅନାଦି ଚରଣ ମଳିକ, ଛବୀନ୍ଦ୍ର ମଳିକ ପ୍ରମୁଖ ଗ୍ରାମବାସୀ ଏକାଠି ହୋଇଛନ୍ତି। ବିଭାଗୀୟ ସହକାରୀ ଯନ୍ତ୍ରୀ ଶୈଳେନ୍ଦ୍ର କୁମାର ବିଶ୍ୱାଳଙ୍କୁ ପଚାରିବାରେ ରାସ୍ତା ଦବି ଯାଇଥିବା ସ୍ଥାନକୁ ମଙ୍ଗଳବାର ତୁରନ୍ତ ମରାମତି କରିବାକୁ ସମ୍ପୃକ୍ତ ଠିକାଦାରଙ୍କୁ ନିର୍ଦ୍ଦେଶ ଦିଆଯାଇଛି ବୋଲି ସେ କହିଛନ୍ତି।
