ବ୍ରହ୍ମପୁର,୧୦ା୧୦(ସ୍ମୃତି ରଞ୍ଜନ ମହାଲିକ): କମାପଲୀର ଦୁର୍ଗା ପୂଜା ୬୦ ବର୍ଷରେ ପହଞ୍ଚିଛି। ପ୍ରତିବର୍ଷ ଭଳି ଚଳିତବର୍ଷ ମଧ୍ୟ ମା’ ଦୁର୍ଗତିନାଶିନୀଙ୍କ ଆଗମନ ପାଇଁ କମାପଲୀ ଦୂର୍ଗା ପୂଜା କମିଟି ପକ୍ଷରୁ ବ୍ୟାପକ ଆୟୋଜନ କରାଯାଇଛି। ଚଳିତ ମାସ ଆରମ୍ଭରୁ କମିଟି ପକ୍ଷରୁ ମୂର୍ତ୍ତି ନିର୍ମାଣ ଓ ତୋରଣ କାର୍ଯ୍ୟ ଆରମ୍ଭ ହୋଇଛି। କଟକ କାରିଗରଙ୍କ ଦ୍ୱାରା ମା’ଙ୍କ ମୃଣ୍ମୟୀ ମୂର୍ତ୍ତି ନିର୍ମାଣ କରାଯାଇଛି। ମୂର୍ତ୍ତିର ଉଚ୍ଚତା ପ୍ରାୟ ୮ ଫୁଟ ରହିଛି। ଢେଙ୍କାନାଳ ଜିଲାର କାରିଗରଙ୍କ ଦ୍ୱାରା ତାଜମହଲ ଢାଞ୍ଚାରେ ନିର୍ମାଣ ଚାଲିଥିବା ତୋରଣର ଉଚ୍ଚତା ୬୫ ଫୁଟ ଏବଂ ଓସାର ୪୦ ଫୁଟ ରହିଛି। ନବରାତ୍ରିଠାରୁ ମଣ୍ଡପରେ ମା’ଙ୍କ ପୂଜା ଆରମ୍ଭ ହେବ। ପ୍ରତିଦିନ ସୂର୍ଯ୍ୟ ପୂଜା ପରେ ମା’ଙ୍କ ପୂଜାର୍ଚ୍ଚନା, ବିଶ୍ରାମ, ଚଣ୍ଡୀପାଠ, ଆଳତୀ, ଷୋଡଶ ପୂଜା, ହୋମଯଜ୍ଞ କରାଯିବ। ପ୍ରତ୍ୟେକ ସନ୍ଧ୍ୟାରେ ଭଜନ ସମାରୋହ ଅନୁଷ୍ଠିତ। ଭଜନ ସମାରୋହରେ ରାଜ୍ୟର ସୁନାମଧନ୍ୟ କଣ୍ଠଶିଳ୍ପୀ ଯୋଗ ଦେବା କାର୍ଯ୍ୟକ୍ରମ ରହିଛି। ପ୍ରତ୍ୟେକ ସନ୍ଧ୍ୟାରେ କମିଟି ପକ୍ଷରୁ ପ୍ରସାଦ ବଣ୍ଟନ କରାଯିବ। ଭିଡକୁ ଦୃଷ୍ଟିରେ ରଖି କମିଟି ପକ୍ଷରୁ ସ୍ବେଚ୍ଛାସେବୀ ଓ ୨ ଜଣ ସିକ୍ୟୁରିଟି ଗାର୍ଡଙ୍କୁ ନିୟୋଜିତ କରାଯିବ। ପୋଲିସ ପ୍ରଶାସନ ପକ୍ଷରୁ ମଧ୍ୟ ସୁରକ୍ଷା ବ୍ୟବସ୍ଥା ଯୋଗାଇ ଦିଆଯିବ। ସେହିପରି କମିଟି ପକ୍ଷରୁ କମାପଲୀ ଛକଠାରୁ ଲାଞ୍ଜିପଲୀ ଓଭରବ୍ରିଜ, ଟାଟାବେଞ୍ଜ ଟ୍ରାଫିକ ଛକ ଓ ନନ୍ଦିଘୋଷ ଆପାର୍ଟମେଣ୍ଟ୍ ଯାଏଁ ସୁନ୍ଦର ଆଲୋକମାଳାରେ ସଜାଯିବ।
ଫାଇଲିନ୍ ବାତ୍ୟାରେ ପୂଜା ମଣ୍ଡପରେ ତୋରଣ ଭୁଶୁଡି ପଡିବା ସାଙ୍ଗକୁ ମୂର୍ତ୍ତି ମଧ୍ୟ ଭାଙ୍ଗି ଯାଇଥିଲା। କିନ୍ତୁ ମା’ଙ୍କ ନିକଟରେ ପୂଜା ପାଉଥିବା ଅଖଣ୍ଡ ଦୀପ ଲିଭି ନ ଥିଲା। ଯାହାକି ମା’ଙ୍କ ମହିମା। କମାପଲୀର ସମସ୍ତ ବ୍ୟବସାୟୀ ଓ ସ୍ଥାନୀୟ ବାସିନ୍ଦାଙ୍କ ସହଯୋଗରେ ପୂଜା ହୋଇ ଆସୁଛି। ଶ୍ରଦ୍ଧାଳୁମାନେ ମା’ଙ୍କୁ ସୁରୁଖୁରୁରେ ଦର୍ଶନ କରିବା ନିମନ୍ତେ ସମସ୍ତ ପ୍ରକାର ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି ବୋଲି ପୂଜା କମିଟି ପରିଚାଳକ ସୋମନାଥ ପାଢୀ କହିଛନ୍ତି।
