ଭୁବନେଶ୍ୱର,୨୫।୩(ବ୍ୟୁରୋ): ରେଳ ଧାରଣାରେ ଶୋଇ ଆତ୍ମହତ୍ୟା ଉଦ୍ୟମ କରୁଥିବା ବେଳେ ଅଳ୍ପକେ ବର୍ତ୍ତିଯାଇଛନ୍ତି ଜଣେ ଯୁବକ। ଚାଳକ ଟ୍ରେନକୁ ଅଟକାଇ ରେଳ ଧାରଣାରୁ ଯୁବକଙ୍କୁ ଉଠାଇ ମହାନତାର ପରିଚୟ ଦେଖାଇଛନ୍ତି। ରାଜଧାନୀ ଭୁବନେଶ୍ୱରରେ ଏଭଳି ଘଟଣା ଦେଖିବାକୁ ମିଳିଛି। ଆତ୍ମହତ୍ୟା ଉଦ୍ୟମ କରୁଥିବା ଯୁବକ ଜଣକ ହେଲେ ରଙ୍ଗମାଟିଆରେ ରହୁଥିବା ପୁରୀ ଜିଲାର ବିଜୟ କୁମାର ମିଶ୍ର (୩୪) ।
ମିଳିଥିବା ସୂଚନା ମୁତାବକ, ବିଜୟ ତାଙ୍କ ସ୍ତ୍ରୀ ଓ ୩ ବର୍ଷର ଝିଅଙ୍କ ସହ ରଙ୍ଗମାଟିଆରେ ରୁହନ୍ତି। ହେଲେ ଶୁକ୍ରବାର କୌଣସି କାରଣକୁ ନେଇ ସ୍ବାମୀ ଏବଂ ସ୍ତ୍ରୀଙ୍କ ମଧ୍ୟରେ ଝଗଡା ହୋଇଥିଲା। ଖବର ପାଇ ବିଜୟଙ୍କ ଭିଣୋଇ ଜଣେ ବ୍ୟକ୍ତିଙ୍କୁ ଧରି ଘରେ ପହଞ୍ଚି ଥିଲେ। ପରେ ସେ ବିଜୟଙ୍କୁ ମାଡ଼ ମାରିଥିଲେ। ପରବର୍ତ୍ତୀ ସମୟରେ ବିଜୟ ଘରୁ ଚାଲିଆସି ଭିଏସଏସ୍ ନଗରସ୍ଥିତ ଲେଭଲ କ୍ରସିଂ ନିକଟରେ ପହଞ୍ଚିଥିଲେ।
ସେଠାରୁ ସେ ୫୦ ମିଟର ଦୁରରେ ଥିବା ରେଲ ଧାରଣାରେ ଉପରେ ଶୋଇ ପଡି ଆତ୍ମହତ୍ୟା ଉଦ୍ୟମ କରିଥିଲେ। ଏହି ସମୟରେ ଏକ ମାଲବାହୀ ଟେନ୍ ଆସିଥିବା ଦେଖି ସ୍ଥାନୀୟ ଲୋକେ ଟ୍ରେନକୁ ଅଟକାଇବା ଲାଗି ଚିତ୍କାର କରିଥିଲେ। କିନ୍ତୁ ଟ୍ରେନ ନ ଅଟକି ଆଗକୁ ମାଡିଚାଲିଥିଲା। ଏହାର କିଛି ସମୟ ପରେ ଚାଳକ ଟ୍ରେନକୁ ଅଟକାଇଥିଲେ। ପରେ ସେ ଟ୍ରେନରୁ ଓହ୍ଲାଇ ବିଜୟଙ୍କୁ ଉଦ୍ଧାର କରିଥିଲେ। ଏପରି କି ଆତ୍ମହତ୍ୟା ନ କରିବାକୁ ପରାମର୍ଶ ଦେଇଥିଲେ। ପରେ ଲୋକେ ପୋଲିସକୁ ଖବର ଦେଇଥିଲେ । ପିସିଆର ପହଞ୍ଚି ଯୁବକ ଜଣଙ୍କୁ ଥାନାକୁ ନେଇ ପଚରାଉଚରା କରି ଛାଡି ଦେଇଛି।
