ନୂଆଦିଲ୍ଲୀ,୨ା୧୧(ପି.ଟି.): ପାରା ଏସିଆନ୍ ଗେମ୍ସରେ ଦେଶର ସମ୍ମାନ ବୃଦ୍ଧି କରିଥିବା ଆଥ୍ଲେଟମାନଙ୍କୁ ବୁଧବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭେଟିଥିଲେ। ନୂଆଦିଲ୍ଲୀର ମେଜର ଧ୍ୟାନଚାନ୍ଦ ନ୍ୟାଶନାଲ ଷ୍ଟାଡିୟମରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ହାଙ୍ଗଝୋରେ ଅନୁଷ୍ଠିତ ପାରା ଗେମ୍ସରେ ଭାରତ ୧୧୧ ପଦକ ସହିତ ପଞ୍ଚମ ସ୍ଥାନରେ ରହିଥିଲା। ଏହା ଦେଶର ସର୍ବଶ୍ରେଷ୍ଠ ପ୍ରଦର୍ଶନ ହୋଇଥିବା ବେଳେ ଆଥ୍ଲେଟିକ୍ସ ସପକ୍ଷରେ ବର୍ତ୍ତମାନ ହାଓ୍ବା ବହୁଛି ବୋଲି କହିଛନ୍ତି ମୋଦି। ବର୍ତ୍ତମାନର ସରକାର ଆଥ୍ଲେଟଙ୍କ ସମ୍ମୁଖରେ ଥିବା ସମସ୍ତ ବାଧାବିଘ୍ନକୁ ଦୂରେଇବାକୁ ପ୍ରୟାସ କରୁଛନ୍ତି ବୋଲି ସେ କହିଥିଲେ। ପୂର୍ବରୁ କ୍ରୀଡାକୁ କ୍ୟାରିୟର କରିବା ପୂର୍ବରୁ ଏହାକୁ ଏକ ସ୍ଥିର କ୍ୟାରିୟର ଭାବେ ଗ୍ରହଣ କରାଯାଉ ନ ଥିଲା। ମାତ୍ର ବର୍ତ୍ତମାନ ସମୟରେ ପରିବର୍ତ୍ତନ ଆସିଛି। ସରକାର ବର୍ତ୍ତମାନ କ୍ରୀଡା ଓ କ୍ରୀଡାବିତ୍ଙ୍କ ପଛରେ ଛିଡା ହୋଇଥିବାରୁ ଏହି ଧାରଣାରେ ପରିବର୍ତ୍ତନ ଆସିଛି। ଏହା ସହ ୟୁଥ୍ ଅଲିମ୍ପିକ୍ସ ୨୦୩୦ ଓ ଅଲିମ୍ପିକ୍ସ ୨୦୩୬ ପାଇଁ ଭାରତ ବିଡ୍ ଦାଖଲ କରିଥିବା ବେଳେ ଏହା ସରକାରଙ୍କ ପ୍ରତିବଦ୍ଧତାକୁ ଦର୍ଶାଉଛି ବୋଲି ସେ କହିଛନ୍ତି।
ଭାରତ ସର୍ବଦା ଭଲ ଆଥ୍ଲେଟ ସୃଷ୍ଟି କରିଥାଏ। ତେବେ ଆର୍ଥିକ ପ୍ରତିବନ୍ଧକ ଖେଳାଳିଙ୍କ ପାଇଁ ସବୁଠାରୁ ବଡ ସମସ୍ୟା ରହିଥିଲା। ବିଗତ ୯ ବର୍ଷ ମଧ୍ୟରେ ଏହି ସମସ୍ୟା ଦୂର ହେବାରେ ଲାଗିଛି। ବର୍ତ୍ତମାନ ପ୍ରତି ଆଥ୍ଲେଟ ପିଛା ସରକାର ୪-୫ କୋଟି ଟଙ୍କା ଖର୍ଚ୍ଚ କରୁଛନ୍ତି। ସରକାର ଏହାର ସମସ୍ତ ଧ୍ୟାନ ଆଥ୍ଲେଟଙ୍କ ଆଡକୁ କେନ୍ଦ୍ରିତ କରିଥିବା ବେଳେ ସେମାନଙ୍କ ରାସ୍ତାରୁ ପ୍ରତିବନ୍ଧକ ଦୂର ହୋଇଥିଲା। ଦକ୍ଷତାକୁ ଯେତେବେଳେ ଉପଯୁକ୍ତ ପ୍ଲାଟଫର୍ମ ମିଳେ ସେତେବେଳେ ଆଥ୍ଲେଟମାନେ ଆଗକୁ ବଢିଥାନ୍ତି। ସରକାରଙ୍କ ପକ୍ଷରୁ ଖେଲୋ ଇଣ୍ଡିଆ ଓ ଟପ୍ସ ପରି ସ୍କିମ୍ ଲଞ୍ଚ କରାଯାଇଛି। ଚଳିତ ପାରା ଗେମ୍ସରେ ଭାରତୀୟ ଆଥ୍ଲେଟ ଜିତିଥିବା ପଦକ କେବଳ ପଦକ ନୁହେଁ ଏହା ୧୪୦ କୋଟି ଭାରତୀୟଙ୍କ ସ୍ବପ୍ନ ବୋଲି ସେ କହିଛନ୍ତି। ୨୦୧୪ରେ ଆମେ ୧୫ ନମ୍ବର ସ୍ଥାନରେ ରହିଥିବା ବେଳେ ଚଳିତ ବର୍ଷ ଆମେ ୫ ନମ୍ବର ସ୍ଥାନରେ ରହି ଅଭିଯାନ ଶେଷ କରିବା ଏକ ଚମତ୍କାର ଉପଲବ୍ଧି ବୋଲି କହିଛନ୍ତି ମୋଦି। ବିଗତ କିଛି ବର୍ଷ କ୍ରୀଡା ପାଇଁ ଏକ ଚମତ୍କାର ସମୟ ରହିଥିବା ବେଳେ ଏଥିରେ ଆଥ୍ଲେଟମାନଙ୍କ ଅବଦାନ ଗୁରୁତ୍ୱପୂର୍ଣ୍ଣ ବୋଲି ସେ କହିଥିଲେ। ସେହିପରି ଦିବ୍ୟାଙ୍ଗ ଆଥ୍ଲେଟମାନଙ୍କ ପାଇଁ ସରକାରଙ୍କ ପକ୍ଷରୁ ଏକ ପ୍ରଶିକ୍ଷଣ କେନ୍ଦ୍ର ଖୁବ୍ଶୀଘ୍ର ଖୋଲାଯିବ ବୋଲି ସେ କହିଥିଲେ।
