ନୂଆଦିଲ୍ଲୀ,୧୮।୮:ଆଇପିଏଲ ୨୦୨୦ ପାଇଁ ଚାଇନା କମ୍ପାନୀ ଭିଭୋ ସ୍ଥାନରେ ନୂତନ ଟାଇଟଲ ପ୍ରଯୋଜକ ଘୋଷଣା କରାଯାଇଛି। ଭିଭୋ ସିଜନ ୧୩ରୁ ବିଦା ହେବା ପରେ ଡ୍ରିମ ୧୧କୁ ଚଳିତ ବର୍ଷ ଆଇପିଏଲ ଟାଇଟଲ ପ୍ରାୟୋଜକ ଦାୟିତ୍ୱ ମିଳିଛି। ଡ୍ରିମ ୧୧ ଆଇପିଏଲ ୨୦୨୦ ପାଇଁ ପ୍ରାୟ ୨୫୦ କୋଟିରେ ପ୍ରାୟୋଜକ ଅଧିକାର କିଣିଛି ବୋଲି ଜଣାପଡିଛି। ଏହା ଭିଭୋର ବାର୍ଷିକ ୪୪୦ କୋଟିରୁ ୧୯୦ କୋଟି ଟଙ୍କା କମ ଅଟେ। ଟାଟା ଗ୍ରୁପ ଟାଇଟଲ ପ୍ରାୟୋଜକ ଅଧିକାର ଦୌଡ଼ରେ ମଧ୍ୟ ସାମିଲ ଥିଲା। ସୂଚନାଯୋଗ୍ୟ,ସଂଯୁକ୍ତ ଆରବ ଏମିରେଟ୍ସ (ୟୁଏଇ)ରେ ଚଳିତବର୍ଷ ସେପ୍ଟେମ୍ବର ୧୯ରୁ ନଭେମ୍ବର ୧୦ ପର୍ଯ୍ୟନ୍ତ ଆଇପିଏଲ ଅନୁଷ୍ଠିତ ହେବ। ପୂର୍ବରୁ ଭାରତ ଏବଂ ଚାଇନା ମଧ୍ୟରେ ବଢୁଥିବା ବିବାଦ ଯୋଗୁ ବିସିସିଆଇ ଭିଭୋକୁ ବାଦ୍ ଦେଇଥିଲା। ଭିଭୋ ୨୦୧୮ରୁ ୨୦୨୨ ପର୍ଯ୍ୟନ୍ତ ପାଞ୍ଚ ବର୍ଷ ପାଇଁ ୨୧୯୦ କୋଟି ଟଙ୍କା (ପ୍ରତିବର୍ଷ ୪୪୦ କୋଟି ଟଙ୍କା)ରେ ଆଇପିଏଲ ଟାଇଟଲ ପ୍ରାୟୋଜକ ଅଧିକାର ହାସଲ କରିଥିଲା।
