ଢେଙ୍କାନାଳ ଅଫିସ,୨୮ା୩: ଢେଙ୍କାନାଳ ସହରରେ ସୋମବାର ବିଶ୍ୱ ନାଟ୍ୟ ଦିବସ ପାଳିତ ହୋଇଯାଇଛି। ସ୍ଥାନୀୟ ନାଟ୍ୟ ଅନୁଷ୍ଠାନ ଅଲଟରନେଟିଭ ରିଦିମ ଥିଏଟର ପକ୍ଷରୁ ଆୟୋଜିତ ଏହି ଦିବସରେ ସକାଳ ସାଢେ ୬ଟାରେ ସହରସ୍ଥିତ ବାଜିଚୌକ ଠାରୁ ଏକ ନାଟ୍ୟ ପଦଯାତ୍ରା ଆରମ୍ଭ ହୋଇଥିଲା। ଏଥିରେ ଅଲଟରନେଟିଭ ରିଦିମ ଥିଏଟର ଅନୁଷ୍ଠାନ ସହିତ ଶିଳ୍ପୀ, କଳାପରିଷଦ ଏବଂ ବିଭିନ୍ନ ନାଟ୍ୟ ଓ ସାଂସ୍କୃତିକ ଅନୁଷ୍ଠାନର କର୍ମକର୍ତ୍ତା, କଳାକାରମାନେ ସାମିଲ ହୋଇଥିଲେ। ପାରମ୍ପରିକ ଲୋକନୃତ୍ୟ ମାଧ୍ୟମରେ ଏହି ପଦଯାତ୍ରା ସହର ପରିକ୍ରମା କରି ମିନି ଷ୍ଟାଡିୟମଠାରେ ପହଞ୍ଚିଥିଲା। ସେଠାରେ ବିଶ୍ୱ ନାଟ୍ୟ ଦିବସର ଉଦ୍ଦେଶ୍ୟ ଓ ତାତ୍ପର୍ଯ୍ୟ ସମ୍ପର୍କରେ ବିଶିଷ୍ଟ ନାଟ୍ୟକାର, କଳାକାର ଓ ନାଟ୍ୟ ନିର୍ଦ୍ଦେଶକମାନେ ଆଲୋକପାତ କରି କହିଲେ ଯେ, ନାଟକ ସମାଜର ଦର୍ପଣ ସ୍ବରୂପ। ସମାଜରେ ଦୈନନ୍ଦିନ ଘଟୁଥିବା ବିଭିନ୍ନ କଥାକୁ ନାଟକ ମାଧ୍ୟମରେ ପ୍ରଦର୍ଶନ କରି ସଚେତନତା ସୃଷ୍ଟି କରାଯାଇଥାଏ। ଏକ ସୁସ୍ଥ ସମାଜ ଗଠନ ଦିଗରେ ନାଟକର ପ୍ରମୁଖ ଭୂମିକା ରହିଛି ବୋଲି ନାଟ୍ୟକାରମାନେ ମତବ୍ୟକ୍ତ କରିଥିଲେ। ଅଲଟରନେଟିଭ ରିଦିମ ଥିଏଟର ଅଧ୍ୟକ୍ଷା ଡ. ପୁଷ୍ପଲତା ରଥଙ୍କ ପରିଚାଳନାରେ ଆୟୋଜିତ ଏହି କାର୍ଯ୍ୟକ୍ରମରେ ବିଶିଷ୍ଟ ନାଟ୍ୟକାର ଦିଲୀଶ୍ୱର ମହାରଣା, ଶତ୍ରୁଘ୍ନ ମାଟି, ଶରତ ମାଝି, ପରେଶ ପଟ୍ଟନାୟକ, ଇନ୍ଦ୍ରମଣି ବେହେରା, ମୃଣାଳ ଚାଟାର୍ଜୀ, ବିନୋଦ ମହାନ୍ତି, ରାଜକିଶୋର ବେହେରା, ମନୋହର ଶତପଥୀ, ଦେବକାନ୍ତ ମିଶ୍ର, କାମାକ୍ଷା ପ୍ରସାଦ ରଣା, ବିଶ୍ୱନାଥ ବେହେରା, ଅଶୋକ ଦାସଙ୍କ ସମେତ ନାଟ୍ୟକର୍ମୀମାନେ ଯୋଗ ଦେଇଥିଲେ।
