ରାଉରକେଲା,୨୪।୧୨(ସଙ୍ଗୀତା ଜେନା)ଇସ୍ପାତ ସହର ରାଉରକେଲାର ବିଭିନ୍ନ ଅଞ୍ଚଳର ବର୍ଜ୍ୟଜଳ ମୁଖ୍ୟ ଡ୍ରେନରେ ଆସି କୋଏଲ ନଦୀରେ ମିଶୁଛି। ଏହାଦ୍ୱାରା ନଦୀଜଳ ପ୍ରଦୂଷଣ ହେଉଛି। ଅନ୍ୟପକ୍ଷେ ଏହି ନଦୀଜଳକୁ ସ୍ଥାନୀୟ ଅଞ୍ଚଳବାସୀ ବିଭିନ୍ନ କାମରେ ବ୍ୟବହାର କରୁଛନ୍ତି। ଫଳରେ ଝାଡ଼ାବାନ୍ତି ଭଳି ସଂକ୍ରାମକ ରୋଗ ମଧ୍ୟ ହେଉଛି।
ସରପଞ୍ଚ ଅଜିତ୍ ତିର୍କୀ ଅଭିଯୋଗ କରିଛନ୍ତି, କୋଏଲ ନଦୀର ଉପର ମୁଣ୍ଡ ଜନବସତିରୁ ବର୍ଜ୍ୟଜଳ ଡ୍ରେନରେ ଆସି ସିଧାସଳଖ ନଦୀରେ ମିଶୁଛି। ନଦୀର ତଳମୁଣ୍ଡରୁ ଝିରପାଣି, ଏନ୍ଆଇଟି କ୍ୟାମ୍ପସ ଓ ସେକ୍ଟରକୁ ଜଳଯୋଗାଣ କରାଯାଉଛି। ସେହିପରି ରାଉରକେଲା ସଂଲଗ୍ନ ଝିରପାଣି ପଞ୍ଚାୟତକୁ ମଧ୍ୟ ୱାଟକୋ ପକ୍ଷରୁ ଜଳ ଯୋଗାଣ ହେଉଛି। ଏହି ଜଳ ଉପରେ ପଞ୍ଚାୟତର ପ୍ରାୟ ୮ହଜାର ଲୋକ ଓ ୨ଟି ସରକାରୀ ସ୍କୁଲ ହଷ୍ଟେଲର ଅନ୍ତେବାସୀ ନିର୍ଭର କରୁଛନ୍ତି। ଇତିମଧ୍ୟରେ ଗ୍ରାମର ୪ ଜଣ ଝାଡାବାନ୍ତିରେ ସଂକ୍ରମିତ ହୋଇ ଚିକିତ୍ସିତ ହେଉଛନ୍ତି। ଏ ନେଇ ତିର୍କୀ ଶୁକ୍ରବାର ରାଉରକେଲା ଅତିରିକ୍ତ ଜିଲାପାଳଙ୍କ କାର୍ଯ୍ୟାଳୟରେ ଅନୁଷ୍ଠିତ ଆଭାସୀ ବୈଠକରେ ଅଭିଯୋଗ କରିଛନ୍ତି। ସେହିପରି ୱାର୍ଡମେମ୍ବର ସୁଖରାମ ଲାକ୍ରା କହିଛନ୍ତି, ପଞ୍ଚାୟତରେ ମୁଖ୍ୟ ଡ୍ରେନ ନିର୍ମାଣ ନ ହେବା ଯୋଗୁ ବର୍ଜ୍ୟଜଳ ସିଧାସଳଖ ନଦୀରେ ମିଶୁଛି। ଏହି ଘାଟରୁ ଝିରପାଣି, ଏନ୍ଆଇଟି ରାଉରକେଲା କ୍ୟାମ୍ପସ ଓ ସେକ୍ଟର-୨୦ ବୈକୁଣ୍ଠଘାଟରେ ଆର୍ଏସ୍ପି ପକ୍ଷରୁ ପାନୀୟ ଜଳ ସଂଗ୍ରହ କରାଯାଉଛି। ତେବେ ନଦୀକୂଳରେ ଥିବା ଜନବସତିର ପ୍ରଦୂଷିତ ଜଳ ସିଧାସଳଖ ମିଶୁଥିଲେ ମଧ୍ୟ କେହି ଏହାର ଉପଚାର କରିବାକୁ ଚେଷ୍ଟା କରୁନାହାନ୍ତି। ଏ ନେଇ ବାରମ୍ବାର ଉଚ୍ଚକର୍ତ୍ତୃପକ୍ଷଙ୍କୁ ଅବଗତ କରାଯାଇଥିଲେ ମଧ୍ୟ କିଛି ସୁଫଳ ମିଳୁନାହିଁ। ଏହାଦ୍ୱାରା ନଦୀ ପ୍ରଦୂଷଣ ବୃଦ୍ଧି ସାଙ୍ଗକୁ ଲୋକଙ୍କ ଜୀବନ ବିପନ୍ନ ହେଉଛି ବୋଲି ଲାକ୍ରା କହିଥିଲେ। ଏ ସମ୍ପର୍କରେ ୱାଟକୋ ଆସିଷ୍ଟାଣ୍ଟ ଇଞ୍ଜିନିୟର ଶ୍ରୀଧର ପଟ୍ଟନାୟକଙ୍କୁ ପଚରାଯିବାରୁ ସେ କହିଲେ, ବିଶୋଧନ ପରେ ଜଳଯୋଗାଣ କରାଯାଉଛି। ଜଳବିଶୁଦ୍ଧୀକରଣ ନେଇ ବିହିତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି। ବ୍ଲକ ଓ ପଞ୍ଚାୟତ ଡ୍ରେନ ସମସ୍ୟାର ସମାଧାନ କରିପାରିବେ। ଏଥିରେ ୱାଟକୋର ଭୂମିକା ନାହିଁ ବୋଲି ପଟ୍ଟନାୟକ କହିଥିଲେ।
