ନାଉଗାଁ ,୨ା୩ (ସ୍ବ.ପ୍ର.): ଜଗତ୍ସିଂହପୁର ଜିଲା ନାଉଗାଁ ବ୍ଲକରେ ଚାଷୀଙ୍କଠାରୁ ଧାନ ସଂଗ୍ରହ ପାଇଁ ୭ଟି ମଣ୍ଡି ଖୋଲାଯାଇଛି। ସେଥିମଧ୍ୟରୁ ୬ଟି ସୋସାଇଟି ରହିଥିବା ବେଳେ ପ୍ରଥମ ଥର ନନ୍ଦମଣୀ ସ୍ବୟଂ ସହାୟିକା ଦଳକୁ ଧାନ ସଂଗ୍ରହ ପାଇଁ ଦାୟିତ୍ୱ ଦିଆଯାଇଛି। ଜାନୁୟାରୀ ପ୍ରଥମ ସପ୍ତାହରେ ୭ଟି ଯାକ ମଣ୍ଡି ଖୋଲା ଯାଇଥିବାବେଳେ ମାର୍ଚ୍ଚ ୩୧ ସୁଦ୍ଧା ଚାଷୀଙ୍କଠାରୁ ସମସ୍ତ ଧାନ ସଂଗ୍ରହ ପାଇଁ ଲକ୍ଷ୍ୟ ରଖାଯାଇଛି। ଧାନ ସଂଗ୍ରହ ପାଇଁ ସରକାରଙ୍କ ପାଖରେ ମାସେ ସମୟ ରହିଛି। ଅଦ୍ୟାବଧି ଉକ୍ତ ୭ଟି ମଣ୍ଡିରୁ ମାତ୍ର ୫୧.୭୨ ପ୍ରତିଶତ ଧାନ ସଂଗ୍ରହ କରାଯାଇଛି। ଜାନୁୟାରୀରୁ ମାର୍ଚ୍ଚ ୧ ପର୍ଯ୍ୟନ୍ତ ୨୩୧୪ ଜଣ ଚାଷୀ ୭୮, ୯୭୨.୩୫ କୁଇଣ୍ଟାଲ ଧାନ ମଣ୍ଡିରେ ଦେଇଛନ୍ତି। ଅନେକ ଧାନ ମଣ୍ଡିରେ ପଡ଼ି ରହିଥିବା ବେଳେ ତାହାକୁ ଚାଷୀମାନେ ଜଗି ବସିଛନ୍ତି। ମିଲରମାନେ ଆବଶ୍ୟକ ସଂଖ୍ୟକ ଗାଡି ଆଣି ପାରୁ ନ ଥିବାରୁ ଧାନ ଯିବାରେ ସମସ୍ୟା ସୃଷ୍ଟି ହୋଇଛି। ବ୍ଲକରେ ଥିବା ଚାଷୀଙ୍କ ପାଖରେ ୧,୩୬,୯୯୦ କୁଇଣ୍ଟାଲ ଧାନ ଥିବା ବେଳେ ସେଥିରୁ ବିଭିନ୍ନ ସୋସାଇଟି ମାଧ୍ୟମରେ ୯୦.୫୦୦ କୁଇଣ୍ଟାଲ ଧାନ ସଂଗ୍ରହ କରିବାକୁ ଲକ୍ଷ୍ୟ ଧାର୍ଯ୍ୟ କରାଯାଇଥିଲା। ଅବଶିଷ୍ଟ ୪୬,୪୯୦ କୁଇଣ୍ଟାଲ ଧାନ କେବେ ଯିବ ତାହା ଅନିଶ୍ଚିତତା ମଧ୍ୟରେ ରହିଛି। ଫଳରେ ଧାନ ବିକ୍ରି କରିପାରି ନ ଥିବା ଚାଷୀ ଚିନ୍ତାରେ ପଡିଛନ୍ତି। ଋଣ ସମେତ ଧାର, ଉଦ୍ଧାର କରି ଚାଷୀ ବହୁ କଷ୍ଟରେ ଧାନ ଚାଷ କରିଥିଲେ। ଧାନ ବିକ୍ରି ହେଲେ ଋଣ ଶୁଝିବା ପାଇଁ ବସିଥିବା ବେଳେ ତାହା ସମ୍ଭବ ହୋଇପାରୁନାହିଁ।
ସୂଚନାଯୋଗ୍ୟ, ବ୍ଲକର ଗଜରାଜପୁର ମଣ୍ଡିରେ ୯୭୮ ଜଣ ଚାଷୀ ନାମ ପଞ୍ଜୀକୃତ ହୋଇଥିବା ବେଳେ ୩୧ ହଜାର କୁଇଣ୍ଟାଲ ଧାନ ଦେବାକୁ ଟୋକନ ଆବଶ୍ୟକ ଥିବା ବେଳେ ସରକାରଙ୍କ ପକ୍ଷରୁ ୧୯ ହଜାର ୫ଶହ କୁଇଣ୍ଟାଲ ଧାନ ସଂଗ୍ରହ ପାଇଁ ଟୋକନ ପ୍ରଦାନ କରାଯାଇଛି। ସେହିପରି ଅଲଣା ମଣ୍ଡିରେ ୫୭୪ ଜଣ ଚାଷୀ ପଞ୍ଜୀକୃତ କରିଥିବା ବେଳେ ୨୨,୩୮୩ କୁଇଣ୍ଟାଲ ଧାନ ଦେବାକୁ ଆବଶ୍ୟକ ଥିବାବେଳେ ୧୪ହଜାର କୁଇଣ୍ଟାଲ ଧାନ, ଶିଖର ମଣ୍ଡିରେ ୫୩୬ ଜଣ ଚାଷୀ ପଞ୍ଜୀକୃତ ହୋଇଥିବା ବେଳେ ୧୬ ହଜାର ୮ ଶହ କୁଇଣ୍ଟାଲ ଆବଶ୍ୟକ ଥିବାବେଳେ ୧୨ ହଜାର କୁଇଣ୍ଟାଲ, ତିରୁଣା ମଣ୍ଡିରେ ୮୮୨ ଚାଷୀ ପଞ୍ଜୀକୃତ ହୋଇଥିବାବେଳେ ୨୨ ହଜାର ୫ଶହ କୁଇଣ୍ଟାଲ ଧାନ ଆବଶ୍ୟକ ଥିବାବେଳେ ୧୪ ହଜାର ୫ଶହ କୁଇଣ୍ଟାଲ, ନାଉଗାଁ ମଣ୍ଡିରେ ୬୬୨ ଜଣ ଚାଷୀ ନାମ ପଞ୍ଜୀକୃତ କରିଥିବା ବେଳେ ୨୧ ହଜାର ୮ଶହ କୁଇଣ୍ଟାଲ ଧାନ ଆବଶ୍ୟକ ଥିବା ବେଳେ ୧୫ ହଜାର ୫ ଶହ କୁଇଣ୍ଟାଲ ଧାନ, ଡେରିକି ମଣ୍ଡିରେ ୮୪୩ ଜଣ ଚାଷୀ ପଞ୍ଜୀକୃତ କରିଥିବା ବେଳେ ୨୧ ହଜାର ୯ ଶହ ୭ କୁଇଣ୍ଟାଲ ଧାନ ଟୋକନ ଆବଶ୍ୟକ ଥିବା ବେଳେ ସରକାରଙ୍କ ପକ୍ଷରୁ ୧୫ ହଜାର କୁଇଣ୍ଟାଲ ଧାନ ସଂଗ୍ରହ ପାଇଁ ଟୋକନ ପ୍ରଦାନ କରାଯାଇଛି। ସେହିପରି ନନ୍ଦମଣୀ ସ୍ବୟଂ ସହାୟିକା ଗୋଷ୍ଠୀ ମଣ୍ଡିରେ ୯୯ ଜଣ ଚାଷୀ ନାମ ପଞ୍ଜୀକୃତ କରିଥିବା ବେଳେ ୬ ଶହ କୁଇଣ୍ଟାଲ ଧାନ ପ୍ରଦାନର ଆବଶ୍ୟକତା ରହିଥିବା ଜଣାଯାଇଛି। ସରକାର ପ୍ରତି ସୋସାଇଟିକୁ ଦେଇଥିବା ଲକ୍ଷ୍ୟ ଧାର୍ଯ୍ୟ ପରେ ବଳକା ଧାନ କେବେ ଯିବ ସେ ବିଷୟରେ ଜିଲା ଯୋଗାଣ ଅଧିକାରୀ ସୁଜାତା ମିଶ୍ରଙ୍କୁ ପଚାରିବାରେ ସରକାରଙ୍କ ପକ୍ଷରୁ ଯେଉଁ ଟାର୍ଗେଟ ଆସୁଛି ସେହି ଅନୁସାରେ ପ୍ରତି ସୋସାଇଟିକୁ ଟାର୍ଗେଟ ବଣ୍ଟନ କରାଯାଉଥିବା ସେ କହିଛନ୍ତି।
