ଭୁବନେଶ୍ୱର,୩ା୧୦(ସ୍ପୋଟର୍ସ ବ୍ୟୁରୋ): କେଟି ଗ୍ଲୋବାଲ ସ୍କୁଲ ସର୍ବଭାରତୀୟ ଟେନିସ ଓଟିଏ ପୁରୁଷ ବର୍ଗରେ ଡବଲ ଟାଇଟଲ ହାସଲ କରିଛନ୍ତି କବୀର ହଂସ। ଭୁବନେଶ୍ୱରସ୍ଥିତ କେଟି ଗ୍ଲୋବାଲ ସ୍କୁଲ ପରିସରରେ ଶନିବାର ଫାଇନାଲ ମ୍ୟାଚ୍ ଖେଳାଯାଇଥିଲା। ପ୍ରଥମେ ତାମିଲନାଡୁର ଦୀପକ ଶ୍ରୀଧରଙ୍କୁ ୬-୧, ୬-୦ରେ ପରାସ୍ତ କରି କବୀର ସିଙ୍ଗଲ୍ସ ଟାଇଟଲ ଜିତିଥିଲେ।
ସେହିପରି କର୍ନାଟକର ମହମ୍ମଦ ଇଫ୍ତିଖାରଙ୍କୁ ସାଥୀ କରି ସେ ଡବଲ୍ସ ମୁକାବିଲାକୁ ମଧ୍ୟ ଜିତିଥିଲେ। ଓଡ଼ିଶାର ସତୀର୍ଥ ପଟ୍ଟନାୟକ ଓ ଆଦିତ୍ୟ ଶତପଥୀ ଯୋଡ଼ିକୁ ୬-୧, ୬-୪ରେ ପରାସ୍ତ କରି ଡବଲ୍ସ ଟାଇଟଲ କରାୟତ୍ତ କରିଥିଲେ। ଏହି ବିଜୟ ଦ୍ୱାରା କବୀର ୨୦ ସିଙ୍ଗଲ୍ସ ପଏଣ୍ଟ ଓ ୧୫ ଡବଲ୍ସ ପଏଣ୍ଟ ହାସଲ କରିଛନ୍ତି। ସୂଚନା ଯେ, ଏହି ପ୍ରତିଯୋଗିତାରେ ୧୫ଟି ରାଜ୍ୟର ୬୫ ପ୍ରତିଯୋଗୀ ଅଂଶଗ୍ରହଣ କରିଥିଲେ।
