ଲାଠୋର, ୨୦।୧ (ଡି.ଏନ.ଏ.): ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ଅଞ୍ଚଳରେ ଚାଲିଥିବା ଋତୁକାଳୀନ ଆବାସିକ ଛାତ୍ରାବାସ ଏବେ ବନ୍ଦ ରହିଛି। ବକେୟା ଟଙ୍କା ମିଳି ନ ଥିବାରୁ ଶିକ୍ଷକମାନେ ଛାତ୍ରାବାସ ଖୋଲିବାକୁ ଅମଙ୍ଗ ହେଉଛନ୍ତି। ଫଳରେ ଅଞ୍ଚଳର ଦାଦନ ପରିବାରର ଶହ ଶହ ପିଲାଙ୍କ ଶିକ୍ଷାରେ ଡୋରି ବନ୍ଧା ହୋଇଛି। ଅଦ୍ୟାବଧି ଛାତ୍ରାବାସ ଖୋଲି ନ ଥିବାରୁ ଏହି ପିଲାମାନେ ସେମାନଙ୍କ ମା’ ବାପାଙ୍କ ସହିତ ଦାଦନ ଖଟିବାକୁ ବାହାର ରାଜ୍ୟକୁ ଚାଲିଗଲେଣି।
ଖପ୍ରାଖୋଲ ଏକ ଦାଦନ ପ୍ରବଣ ବ୍ଲକ। ପ୍ରତିବର୍ଷ ଏଠାକାର ଅଧିକାଂଶ ପରିବାର ଭିଟାମାଟି ଛାଡ଼ି ବାହାର ରାଜ୍ୟକୁ ଦାଦନ ଖଟିବାକୁ ଯାଇଥାନ୍ତି। ସେମାନଙ୍କ ପିଲାମାନେ ଯେପରି ଶିକ୍ଷାରୁ ବଞ୍ଚତ୍ତ ନ ହେବେ ସେଥିପ୍ରତି ସରକାର ପ୍ରତିବର୍ଷ ନଭେମ୍ବରରୁ ଏପ୍ରିଲ ପର୍ଯ୍ୟନ୍ତ ୬ ମାସ ପାଇଁ ବିଭିନ୍ନ ବିଦ୍ୟାଳୟରେ ଛାତ୍ରାବାସ ଖୋଲିଥାନ୍ତି। ଏହି ପିଲାଙ୍କ ଖାଦ୍ୟପେୟ ପାଇଁ ଲକ୍ଷାଧିକ ଟଙ୍କା ଖର୍ଚ୍ଚ କରାଯାଇଥାଏ। ସେହି କ୍ରମରେ ଗତ ୨୦୧୮-୧୯ରେ ବ୍ଲକର ବିଭିନ୍ନ ବିଦ୍ୟାଳୟରେ ୧୫ଟି ଛାତ୍ରାବାସ ଖୋଲି ୬ରୁ ୧୪ ବର୍ଷର ୭୧୫ଜଣ ଛାତ୍ରୀଛାତ୍ରଙ୍କୁ ରଖାଯାଇଥିଲା ଏବଂ ସେମାନଙ୍କ ଖାଦ୍ୟପେୟ ବାବଦରେ ୭୦ ଲକ୍ଷ ୨୭ ହଜାର ୧୬୨ ଟଙ୍କା ଖର୍ଚ୍ଚ ହୋଇଥିବା ବିଭାଗୀୟ ସୂଚନାରୁ ଜଣାପଡିଛି। ସେଥିମଧ୍ୟରୁ ୫୩ ଲକ୍ଷ ୮୨ ହଜାର ଟଙ୍କା ଛାତ୍ରାବାସ ଦାୟିତ୍ୱରେ ଥିବା ଶିକ୍ଷକମାନଙ୍କୁ ପ୍ରଦାନ କରାଯାଇଥିବା ବେଳେ ୧୬ ଲକ୍ଷ ୪୫ ହଜାର ୧୬୨ ଟଙ୍କା ବକେୟା ରହିଛି। ସେହିପରି ୨୦୧୯-୨୦ରେ ଉକ୍ତ ବ୍ଲକର ୧୬ଟି ବିଦ୍ୟାଳୟରେ ଛାତ୍ରାବାସ ଖୋଲି ୭୫୪ଜଣ ଛାତ୍ରୀଛାତ୍ରଙ୍କୁ ରଖି ଲକ୍ଷାଧିକ ଟଙ୍କା ଖର୍ଚ୍ଚ ହୋଇଥିବା ବେଳେ ଶେଷ କିସ୍ତି ଟଙ୍କା ପ୍ରଦାନ କରାଯାଇନାହିଁ। ୨୦୧୮-୧୯ ବର୍ଷର ବକେୟା ଟଙ୍କା ଏଯାବତ୍ ଦିଆଯାଇ ନ ଥିବାରୁ ଶିକ୍ଷକମାନେ ଛାତ୍ରାବାସ ଖୋଲିବାକୁ ଇଚ୍ଛା ପ୍ରକାଶ କରୁନାହାନ୍ତି। ନିଜ ନାମ ଗୋପନ ରଖି କେତେକ ଶିକ୍ଷକ କହିଛନ୍ତି, ଛାତ୍ରାବାସ ପାଇଁ ଆମେ ଦୋକାନ ବଜାରରୁ ଟଙ୍କା ଧାର କରିଛୁ। ଟଙ୍କା ପ୍ରଦାନ ପାଇଁ ବିଭାଗୀୟ କର୍ତ୍ତୃପକ୍ଷଙ୍କୁ ବାରମ୍ବାର ଦୃଷ୍ଟି ଆକର୍ଷଣ କରିଥିଲେ ମଧ୍ୟ କେହି କର୍ଣ୍ଣପାତ କରୁନାହାନ୍ତି। ଏପରି ସ୍ଥିତିରେ କେଉଁ ଶିକ୍ଷକ ଛାତ୍ରାବାସ ଖୋଲି ହଇରାଣରେ ପଡିବ ବୋଲି ସେମାନେ କହିଛନ୍ତି। ଏଥିରୁ ସ୍ପଷ୍ଟ ଯେ, ବିଭାଗୀୟ ଅବହେଳା ଯୋଗୁ ଛାତ୍ରାବାସ ଖୋଲିବାରେ ବାଧା ସୃଷ୍ଟି ହେଉଛି। ଯାହାର ପ୍ରଭାବ ସିଧାସଳଖ ଦାଦନ ଶ୍ରମିକ ପରିବାରର ପିଲାଙ୍କ ଉପରେ ପଡ଼ୁଛି। ଏ ନେଇ ଖପ୍ରାଖୋଲ ବ୍ଲକ ଶିକ୍ଷାଧିକାରୀ ଷଷ୍ଠୀ ପ୍ରସାଦ ଝାଙ୍କରଙ୍କୁ ପଚାରିବାରୁ ଟଙ୍କା ବକେୟା ଥିବା ବିଷୟରେ ଜାଣିନାହିଁ ବୋଲି କହିଥିଲେ।
-ଭୁବନେଶ୍ୱର ବାରିକ
