ଭୁବନେଶ୍ୱର,୨୪ା୧୨(ବ୍ୟୁରୋ): ରାଜ୍ୟରେ ବିଏଫ୍.୭ ଭାରିଏଣ୍ଟ ଚିହ୍ନଟ ହେବା ପରେ ରାଜ୍ୟବାସୀ ଆତଙ୍କିତ ହୋଇପଡ଼ିଛନ୍ତି। ତେବେ ସଂକ୍ରମଣକୁ ନେଇ ରାଜ୍ୟବାସୀ ଆତଙ୍କିତ ନ ହେବାକୁ ଶନିବାର କହିଛନ୍ତି ରାଜ୍ୟ ସ୍ବାସ୍ଥ୍ୟ ନିର୍ଦ୍ଦେଶକ ବିଜୟ ମହାପାତ୍ର।
ସେ କହିଛନ୍ତି, ଆମ ରାଜ୍ୟରେ ୨ ବର୍ଷ ହେଲାଣି ବିଏଫ୍.୭ ଭାରିଏଣ୍ଟ ଚିହ୍ନଟ ହେଲାଣି। ଯେହେତୁ ଏବେ ଚାଇନାରେ ବଢୁଛି ତେଣୁ ଏହାକୁ ନେଇ ଲୋକଙ୍କ ମଧ୍ୟରେ ଭୟ ବଢୁଛି। ଡରିବାର କିଛି ନାହିଁ ବୋଲି ସେ କହିଛନ୍ତି। ବିଗତ ୪ଟି ଲହର ପାଇଁ ଆମର ରୋଗ ପ୍ରତିରୋଧକ ଶକ୍ତି ବଢ଼ିଛି। ତେଣୁ ଏହା ଅଧିକ ସଂକ୍ରମିତ କରିପାରିବ ନାହିଁ। ୩ ମାସରୁ ଅଧିକ ହେଲାଣି ରାଜ୍ୟରେ ପଜିଟିଭ୍ ହାର ବଢ଼ିନାହିଁ। ଆଗକୁ ଯଦି ସଂକ୍ରମଣ ଆସେ ତେବେ କିପରି ମୁକାବିଲା କରାଯିବ ସେନେଇ ଆମେ ପ୍ରସ୍ତୁତ ରହିଛୁ ବୋଲି କହିଛନ୍ତି। ଯାହାର ଲକ୍ଷଣ ଅଛି ତୁରନ୍ତ ପରୀକ୍ଷା କରାଇ ନିଅନ୍ତୁ। ସଂକ୍ରମଣ ବଢ଼ିଲେ ରାଜ୍ୟ ସରକାର ପୂର୍ବ ପରି ଏଥର ମଧ୍ୟ ଚିକିତ୍ସା ଦାୟିତ୍ୱ ନେବେ। ଗୁଜବଠାରୁ ଦୂରେଇ ରୁହନ୍ତୁ। ସରକାରଙ୍କ ଗାଇଡ୍ଲାଇନ୍ ମାନି ଚଳନ୍ତୁ।
