ଚଣ୍ଡିଗଡ଼,୨୬।୩: ସ୍ବର୍ଗତ ପଞ୍ଜାବୀ ଗାୟକ ସିଦ୍ଧୁ ମୁସେୱାଲାଙ୍କ ପିତା ବାଲକୌର ସିଂଙ୍କୁ ପୁଣି ଇ-ମେଲ ମାଧ୍ୟମରେ ହତ୍ୟା ଧମକ ଦିଆଯାଇଛି। ରବିବାର ସେ ଏନେଇ ପୋଲିସରେ ଅଭିଯୋଗ କରିଛନ୍ତି। ବାଲକୌରଙ୍କୁ ରାଜସ୍ଥାନରୁ ଇମେଲ ଯୋଗେ ହତ୍ୟା ଧମକ ମିଳିଛି। ଲରେନ୍ସ ବିଷ୍ଣୋଇଙ୍କ ନାଁ ନେଲେ ତାଙ୍କୁ ଏପ୍ରିଲ ୨୫ ପୂର୍ବରୁ ହତ୍ୟା କରାଯିବ ବୋଲି କୁହାଯାଇଛି।
ବାଲକୌର ସିଂ କହିଛନ୍ତି ମୁଁ କଣ ଭୁଲ କରୁଛି? ମୁଁ ମୋ ପୁଅର ମାମଲା ଲଢିବା ଉଚିତ୍ ନୁହେଁ କି? ମୋତେ ୧୮, ୨୪ ଏବଂ ୨୭ ଫେବୃଆରୀରେ ଧମକ ଦିଆଯାଇଥିଲା ଯେ ମୋତେ ୨୫ ଏପ୍ରିଲ ପୂର୍ବରୁ ହତ୍ୟା କରାଯିବ। ମୁଁ ସରକାରଙ୍କୁ କହିବାକୁ ଚାହୁଁଛି ଯେ ମୋର ସୁରକ୍ଷା ପ୍ରତ୍ୟାହାର କରାଯାଉ। ମୁଁ ଲଢେଇ ଜାରି ରଖିବି। ପୋଲିସର ସୂଚନାନୁସାରେ, ମୁସେୱାଲାଙ୍କ ପିତାଙ୍କୁ ଧମକ ଦେବା ଅଭିଯୋଗରେ ଅଜଣା ଲୋକଙ୍କ ବିରୋଧରେ ମାମଲା ରୁଜୁ ହୋଇଛି।
ମାର୍ଚ୍ଚ ୭ରେ, ମୁସେୱାଲାଙ୍କ ପିତା ପଞ୍ଜାବ ବିଧାନସଭା ବାହାରେ ଧାରଣା ଦେଇ ତାଙ୍କ ପୁଅର ହତ୍ୟା ଘଟଣାର ସିବିଆଇ ତଦନ୍ତ ଦାବି କରିଥିଲେ। ଗ୍ୟାଙ୍ଗଷ୍ଟର ଗୋଲ୍ଡି ବ୍ରାରଙ୍କ ବିରୋଧରେ ନିଆଯାଇଥିବା କାର୍ଯ୍ୟାନୁଷ୍ଠାନ ସମ୍ପର୍କରେ ସେ ସରକାରଙ୍କୁ ପ୍ରଶ୍ନ କରିଛନ୍ତି।
ଗତ ବର୍ଷ ମେ ୨୯ରେ ସିଦ୍ଧୁ ମୁସେୱାଲାଙ୍କୁ ମାନସଠାରେ ଗୁଳି କରି ହତ୍ୟା କରାଯାଇଥିଲା। ଆକ୍ରମଣକାରୀମାନେ ମୁସେୱାଲାଉପରେ ୩୦ରୁ ଅଧିକ ରାଉଣ୍ଡ ଗୁଳି ଚଳାଇଥିଲେ।
