ଭଞ୍ଜନଗର, ୧୩।୩(ବାବୁଲା ପ୍ରଧାନ):ଗଞ୍ଜାମ ଜିଲା ଭଞ୍ଜନଗର ଘୁମୁସର ଉତ୍ତର ବନଖଣ୍ଡ ଗାଲେରୀ ରେଞ୍ଜରେ ଶୁକ୍ରବାର ବନାଗ୍ନି ପ୍ରଶମନ ଓ ପରିଚାଳନା ନିମନ୍ତେ ଏକ ସଚେତନତା ସଭା ହୋଇଥିଲା। ଏଥିରେ ଡିଏଫଓ ହିମାଂଶୁ ଶେଖର ମହାନ୍ତି ମୁଖ୍ୟ ଅତିଥି ଭାବେ ଯୋଗଦେଇ ଲୋକଙ୍କୁ ସହାୟତା ପାଇଁ ପ୍ରତି ଗ୍ରାମରେ ଅନୁକମ୍ପା କମିଟି ଗଠନ କରାଯିବ ବୋଲି କହିଥିଲେ। ବନ ସୁରକ୍ଷା ସମିତି କର୍ମକର୍ତ୍ତାଙ୍କୁ ତାଲିମ ଦିଆଯିବ। ବିଗତ ଦିନରେ ବିଦ୍ୟୁତ ଆଘାତରେ ଏକାଧିକ ହାତୀ ଏହି ବନଖଣ୍ଡରେ ମୃତ୍ୟୁବରଣ କରିଥିଲେ। ତେଣୁ ଟାଟା ପାୱାର ଏବଂ ସ୍ନେହା ଅନୁଷ୍ଠାନ ପକ୍ଷରୁ ମିଳିତ ଭାବେ ବିଭିନ୍ନ ସଚେତନତା କାର୍ଯ୍ୟକ୍ରମ ବନ ବିଭାଗ ସହାୟତାରେ କରାଯାଉଛି।
ମିଳିମିଶି ପ୍ରକୃତିର ସୁରକ୍ଷା କରିବାକୁ ପଡ଼ିବ। ଏଥିପ୍ରତି ସମସ୍ତେ ଦୃଷ୍ଟି ଦେବାପାଇଁ ଡିଏଫଓ ମହାନ୍ତି ଉପସ୍ଥିତ ଲୋକଙ୍କୁ ଆହ୍ବାନ କରିଥିଲେ। ଦିଲ୍ଲୀ, ହରିୟାଣାରେ ଲୋକେ ଫସଲ କାଟିବା ପରେ ନଡ଼ା, ପାଳ ସମେତ ଅନ୍ୟାନ୍ୟ ଜିନିଷକୁ ପୋଡ଼ି ଦେଉଛନ୍ତି। ଏହାଦ୍ବାରା ଦିଲ୍ଲୀରେ ପ୍ରଦୂଷଣ ବହୁ ପରିମାଣର ବଢ଼ିଯାଉଛି। ଆମ ରାଜ୍ୟ ଓଡ଼ିଶାରେ ମଧ୍ୟ ଲୋକେ ଏହିଭଳି ନିଆଁ ଲଗାଉଛନ୍ତି। ଯାହାକି ଚିନ୍ତାଜନକ ବିଷୟ। ପାଳ, ନଡ଼ାକୁ ନ ପୋଡ଼ି ତାକୁ ପୋତି ଦିଆଯାଉ। ଏହାଦ୍ବାରା ପରିବେଶ ସୁରକ୍ଷିତ ରହିବା ସହ ଜମିର ଉର୍ବରତା ବଢିବ। ତେଣୁ ଆମେ ସଚେତନ ହୋଇ ନିଆଁ ଲଗାଇବା ନାହିଁ। ନ ହେଲେ ଦିଲ୍ଲୀ ଭଳି ଆମ ରାଜ୍ୟରେ ମଧ୍ୟ କେତେକ ସହରରେ ଏହିଭଳି ପ୍ରଦୂଷଣ ବଢିବା ସମ୍ଭାବନା ରହିଛି। ତେଣୁ ବେଳୁ ହିଁ ସାବଧାନ ହେବାକୁ ପଡିବ। ଏନେଇ ସ୍ବତନ୍ତ୍ର ନିୟମ ଲାଗୁ କରିବାର ଆବଶ୍ୟକତା ରହିଛି ବୋଲି ବକ୍ତାମାନେ କହିଥିଲେ।
ରେଞ୍ଜର ବିମ୍ବାଧର ସାହୁ ସଭାରେ ଅଧ୍ୟକ୍ଷତା କରୁଥିବା ବେଳେ ତୁରୁମୁ ସରପଞ୍ଚ ଉଷା ରାଣୀ ପ୍ରଧାନ, ଅବସରପ୍ରାପ୍ତ ରେଞ୍ଜର ପ୍ରଶାନ୍ତ ସାହୁ,ସାମାଜିକ କର୍ମୀ ରବିନ୍ଦ୍ର ପାତ୍ର, ସୁଶାନ୍ତ ସାହୁ, ଶିବ ଶଙ୍କର ଦାସ,ବିଶ୍ବମ୍ବର ଜେନା, କାହ୍ନୁ ସ୍ବାଇଁ, ଭଞ୍ଜନଗର କବି ସମ୍ରାଟ ଉପେନ୍ଦ୍ର ଭଞ୍ଜ ମହାବିଦ୍ୟାଳୟ ଜାତୀୟ ସେବା ଯୋଜନା ଅଧିକାରୀ ବି ପ୍ରଧାନ, ବନ ସୁରକ୍ଷା କର୍ମକର୍ତ୍ତା ପ୍ରମୁଖ ଯୋଗଦେଇ ନିଜର ବକ୍ତବ୍ୟ ରଖିଥିଲେ। ବନପାଳ ଶୁଭସ୍ମିତା ପାତ୍ର ସଭାକୁ ସଂଯୋଜନା କରିଥିବା ବେଳେ ବନରକ୍ଷୀ ଧରିତ୍ରୀ ସାହୁ ଧନ୍ୟବାଦ ପ୍ରଦାନ କରିଥିଲେ। ବନପାଳ ଅମ୍ରିତା ଜେନା, ଅମର ନାୟକ, ଧନୁର୍ଦ୍ଧର ବେହେରା, ଅନୁରାଧା ଦଳବେହେରା, ବର୍ଷା ରାଣୀ ସାହୁ ପ୍ରମୁଖ କାର୍ଯ୍ୟକ୍ରମକୁ ପରିଚାଳନା କରିବାରେ ସହଯୋଗ କରିଥିଲେ।
Dharitri – Odisha’s No.1 Odia Daily
