ଓ୍ବାଶିଂଟନ୍,୨୮।୭: ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଅଡୁଆ ବଢିବାରେ ଲାଗିଛି। ଟ୍ରମ୍ପଙ୍କ ବିରୋଧରେ ଗୋପନୀୟ ଦସ୍ତାବେଜ ସହ ଜଡିତ ଆଉ ଏକ ମାମଲା ରୁଜୁ ହୋଇଛି। ଗୋପନୀୟ ଦସ୍ତାବେଜଗୁଡିକର ଅନୁସନ୍ଧାନରେ ବାଧା ସୃଷ୍ଟି କରିବା ଏବଂ ଫ୍ଲୋରିଡା ଇଷ୍ଟେଟ ମାର୍ ଏ ଲୋଗୋରୁ ସିସିଟିଭି ଫୁଟେଜ ଡିଲିଟ କରିବା ନେଇ ଟ୍ରମ୍ପଙ୍କ ନାଁରେ ନୂଆ ଅଭିଯୋଗ ରହିଛି।
୨୦୨୪ରେ ହେବାକୁ ଥିବା ଆମେରିକାର ରାଷ୍ଟ୍ରପତି ନିର୍ବାଚନରେ ରିପବ୍ଲିକାନ ପାର୍ଟିର ଡୋନାଲ୍ଡ ଟ୍ରମ୍ପ ହେଉଛନ୍ତି ମୁଖ୍ୟ ପ୍ରତିଦ୍ୱନ୍ଦ୍ୱୀ। ଏଭଳି ପରିସ୍ଥିତିରେ ନୂତନ ଅଭିଯୋଗ ହେତୁ ତାଙ୍କର ଅସୁବିଧା ଆହୁରି ବଢିପାରେ। ତେବେ ଟ୍ରମ୍ପ ତାଙ୍କ ବିରୋଧରେ ଆସିଥିବା ଅଭିଯୋଗକୁ ପ୍ରତ୍ୟାଖ୍ୟାନ କରି କହିଛନ୍ତି ଯେ, ଏହା ବାଇଡେନ କ୍ରାଇମ ଫ୍ୟାମିଲି ଏବଂ ତାଙ୍କ ନ୍ୟାୟ ବିଭାଗର ନିର୍ଯାତନା ଛଡା ଆଉ କିଛି ନୁହେଁ।
ସୂଚନାଯୋଗ୍ୟ, ଡୋନାଲ୍ଡ ଟ୍ରମ୍ପ ୨୦୨୧ରେ ରାଷ୍ଟ୍ରପତି ନିର୍ବାଚନରେ ହାରିଯିବା ପରେ ହ୍ବାଇଟ ହାଉସ ଛାଡିବା ସମୟରେ ଅନେକ ସମ୍ବେଦନଶୀଳ ସରକାରୀ ରେକର୍ଡ ଫେରସ୍ତ ନ କରିବା ସହ ବେଆଇନ ଭାବେ ତାଙ୍କ ସହ ରଖିଥିବା ଅଭିଯୋଗ ହୋଇଛି।
