ଢେଙ୍କାନାଳ ଅଫିସ, ୫।୩: ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା (ବିଏସ୍କଓ୍ବୋଇ) କାର୍ଡରେ କରାଯାଉଥିଲା ଅର୍ଥ ହଡ଼ପ। ଡାକ୍ତରଙ୍କ ନାମରେ ଜାଲ୍ ଦସ୍ତଖତ କରି ଲୁଟୁଥିଲେ ଟଙ୍କା। ଏପରି କି ମୃତରୋଗୀଙ୍କୁ ମଧ୍ୟ ଛାଡ଼ି ନ ଥିଲେ। ମାନବିକତାକୁ ଜଳାଞ୍ଜଳି ଦେଇ ଅଧିକ ଚିକିତ୍ସା ଆବଶ୍ୟକତା ଥିବା କହି ଜଣେ ମୃତବ୍ୟକ୍ତିଙ୍କୁ କଟକ ରେଫର କରିଥିଲେ। ଏଭଳି ଏକାଧିକ ଅଭିଯୋଗରେ ଦୁର୍ନୀତିର ଗନ୍ଧ ବାରିବା ପରେ ଢେଙ୍କାନାଳ ସ୍ବାସ୍ଥ୍ୟ ବିଭାଗ ସ୍ଥାନୀୟ ଟାଉନ ଥାନା ପଛପାଖରେ ଥିବା ପଣ୍ଡା ନର୍ସିଂ ହୋମ୍କୁ ଶନିବାର ସନ୍ଧ୍ୟାରେ ସିଲ୍ କରିଛି। ଜିଲାପାଳ ସରୋଜ କୁମାର ସେଠୀଙ୍କ ନିର୍ଦ୍ଦେଶରେ ଉକ୍ତ ବେସରକାରୀ ସ୍ବାସ୍ଥ୍ୟ ଅନୁଷ୍ଠାନ ବିରୋଧରେ ଏଭଳି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।
ସୂଚନାଯୋଗ୍ୟ, ପଣ୍ଡା ନର୍ସିଂ ହୋମ୍ ନାମରେ ପୂର୍ବରୁ ରୋଗୀଙ୍କୁ ଶୋଷଣ କରିବା, ସରକାରୀ ଯୋଜନାରେ ଅର୍ଥ ହଡ଼ପ ଭଳି ଏକାଧିକ ଅଭିଯୋଗ ରହିଥିଲା। କିଛିଦିନ ତଳେ ନର୍ସିଂହୋମ୍ରେ ଚିକିତ୍ସାଧୀନ ଜଣେ ରୋଗୀଙ୍କର ମୃତ୍ୟୁ ହୋଇଯାଇଥିଲା। ମୁଣ୍ଡରୁ ଦୋଷ ଛଡ଼ାଇବା ପାଇଁ ନର୍ସିଂ ହୋମ୍ କର୍ତ୍ତୃପକ୍ଷ ତାଙ୍କୁ ଆମ୍ବୁଲାନ୍ସରେ କଟକ ରେଫର କରିଦେଇଥିଲେ। ତେବେ କଟକ ବଡ଼ ମେଡିକାଲରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ରୋଗୀଙ୍କ ସମ୍ପର୍କୀୟ ଏ ନେଇ ଜିଲା ପ୍ରଶାସନ ଏବଂ ସ୍ବାସ୍ଥ୍ୟ ବିଭାଗ ନିକଟରେ ଅଭିଯୋଗ କରିଥିଲେ। ଏଥିସହ ବିଏସ୍କଓ୍ବୋଇ କାର୍ଡରେ ଚଞ୍ଚକତା ଏବଂ ଡାକ୍ତରଙ୍କ ନକଲି ଦସ୍ତଖତ କରି ଟଙ୍କା ହଡ଼ପ କରିବା, ଚିକିତ୍ସାରେ ଅବହେଳା ପ୍ରଦର୍ଶନ ଆଦି ଅଭିଯୋଗ ଆସିବା ପରେ ଶୁକ୍ରବାର ଜିଲା ମୁଖ୍ୟ ଚିକିତ୍ସାଧିକାରୀ, ଜଣେ ସହକାରୀ ଜିଲାପାଳ, ପୋଲିସ ଉପସ୍ଥିତିରେ ନର୍ସିଂ ହୋମ୍ର କାଗଜପତ୍ର ଯାଞ୍ଚ କରାଯାଇ ଏହାର ରିପୋର୍ଟ ଜିଲାପାଳଙ୍କୁ ପ୍ରଦାନ କରାଯାଇଥିଲା। ଜିଲାପାଳଙ୍କ ନିର୍ଦ୍ଦେଶରେ ମାଜିଷ୍ଟ୍ରେଟ୍ ଓ ପୋଲିସ ଉପସ୍ଥିତିରେ ନର୍ସିଂହୋମ୍କୁ ସିଲ୍ କରାଯାଇଥିବା ଜିଲା ମୁଖ୍ୟ ଚିକିତ୍ସାଧିକାରୀ ଡା. ଅଶୋକ କୁମାର ଦାଶ ସୂଚନା ଦେଇଛନ୍ତି।
