ଢେଙ୍କାନାଳ ଅଫିସ, ୨୦।୧୨: ରଙ୍ଗବେରଙ୍ଗ କନାରେ ଢାଙ୍କି ହୋଇ ଆକର୍ଷଣୀୟ ଦେଖାଯାଉଛି ପ୍ଲାଷ୍ଟିକ୍ କଣ୍ଢେଇ। ରାସ୍ତାରେ ଯାଉଥିବା ଯାତ୍ରୀମାନେ ଏଭଳି ଚମତ୍କାର କାରିଗରି ଦେଖି ଅଟକି ଯାଉଛନ୍ତି ଘଡ଼ିଏ। ଏଭଳି ଭିନ୍ନ ଧରଣର କଣ୍ଢେଇ ତିଆରି କରି ଚର୍ଚ୍ଚାର ପରିସରକୁ ଆସିଛନ୍ତି ବାଲେଶ୍ୱରରେ ରହୁଥିବା ପଶ୍ଚିମବଙ୍ଗ ରାଜ୍ୟ ଖଣ୍ଟାଇ ଅଞ୍ଚଳର ମୂଳନିବାସୀ ରଣଜିତ୍ ଜେନା (୬୪)।
ରଣଜିତ୍ ବିଭିନ୍ନ ସ୍ଥାନ ବୁଲି ବୁଲି କନା କଣ୍ଢେଇ ବିକ୍ରି କରୁଥିବାବେଳେ କିଛିଦିନ ହେଲା ଢେଙ୍କାନାଳ ସହର ଗଣେଶ ବଜାର ରାସ୍ତାପାର୍ଶ୍ୱରେ ବସି କରୁଛନ୍ତି ବ୍ୟବସାୟ। ଏ ସମ୍ପର୍କରେ ସେ କୁହନ୍ତି, ପଶ୍ଚିମବଙ୍ଗରେ ଜନ୍ମ ହୋଇଥିଲେ ହେଁ ସେ ଦୀର୍ଘଦିନ ହେଲା ବାଲେଶ୍ୱରରେ ସପରିବାର ରହୁଛନ୍ତି। ୨ ସନ୍ତାନଙ୍କ ମଧ୍ୟରୁ ଝିଅ ବାହାଘର ସରିଥିବାବେଳେ ୩୦ବର୍ଷର ପୁଅ ବେରୋଜଗାର। ପରିବାର ପ୍ରତିପୋଷଣ ପାଇଁ ସେ ଦୀର୍ଘଦିନରୁ ଫୁଲ ବ୍ୟବସାୟ କରୁଥିଲେ। ଏଥିସହ ବଜାରରୁ ପ୍ଲାଷ୍ଟିକ୍ କଣ୍ଢେଇ କିଣି ଏହାକୁ କନାରେ ଆକର୍ଷଣୀୟ ଢଙ୍ଗରେ ସଜାଇ ବିକ୍ରି କରୁଛନ୍ତି। ଗୋଟିଏ କଣ୍ଢେଇ ୧୫୦ ଟଙ୍କାରେ ବିକା ହେଉଛି। ଢେଙ୍କାନାଳ ସହର ସହିତ ଭାବନାତ୍ମକ ଭାବେ ସେ ଜଡ଼ିତ। ପ୍ରତିବର୍ଷ ପ୍ରସିଦ୍ଧ ଲକ୍ଷ୍ମୀପୂଜା ସମୟରେ ଏଠାକୁ ଆସି ସେ ଫୁଲ ବ୍ୟବସାୟ କରନ୍ତି। କରୋନା ସଂକ୍ରମଣ ସମୟରେ ଲକ୍ଡାଉନ ଯୋଗୁ ଜୀବନ ଜୀବିକା ଗୁରୁତ୍ୱର ଭାବେ ପ୍ରଭାବିତ ହୋଇଥିଲା। ପରିବାର ଚଳାଇବା କଷ୍ଟକର ହୋଇପଡ଼ିଥିଲା। ଏହାକୁ ନେଇ ସେ ଚିନ୍ତାରେ ପଡ଼ିଯାଇଥିଲେ। ଶେଷରେ କଣ୍ଢେଇ ବ୍ୟବସାୟକୁ ରୋଜଗାରର ପନ୍ଥା ଭାବେ ବାଛିଥିଲେ। କେବଳ ଏତିକି ନୁହେଁ, ସେ ରାଖୀ ମଧ୍ୟ ତିଆରି କରନ୍ତି। ଦୃଢ଼ ମନୋଭାବ, କଠିନ ଅଧ୍ୟବସାୟ ଏବଂ ଶିଖିବାର ଇଚ୍ଛା ଥିଲେ ପେଟ ଅପୂରା ରହିବ ନାହିଁ ବୋଲି ରଣଜିତ୍ କହିଛନ୍ତି।
