ଓ୍ବିମ୍ବେଲଡନ୍ ଫାଇନାଲରେ କାର୍ଲୋସ୍ ଅଲକାରାଜ୍ଙ୍କଠାରୁ ହାରିଥିବାରୁ ନୋଭାକ୍ ଜୋକୋଭିଚ୍ ସର୍ବକାଳୀନ ଶ୍ରେଷ୍ଠ ୨୪ ଗ୍ରାଣ୍ଡସ୍ଲାମ୍ ରେକର୍ଡର ସମକକ୍ଷ ହୋଇପାରିନାହାନ୍ତି। ବର୍ଷର ଶେଷ ଗ୍ରାଣ୍ଡସ୍ଲାମ୍ ୟୁଏସ୍ ଓପନ ଆସନ୍ତା ଅଗଷ୍ଟ ୨୮ରୁ ସେପ୍ଟେମ୍ବର ୧୦ ମଧ୍ୟରେ ଅନୁଷ୍ଠିତ ହେବ। ଏହି ଟୁର୍ନାମେଣ୍ଟ ଉପରେ ଜୋକୋଭିଚ୍ଙ୍କ ନଜର ରହିବ…
ବିଶ୍ୱ ଟେନିସ୍ ଜଗତର ସର୍ବପୁରାତନ ଏବଂ ସମ୍ମାନଜନକ ଟୁର୍ନାମେଣ୍ଟ ହେଉଛି ୱିମ୍ବେଲଡନ୍। ଚଳିତ ବର୍ଷ ଏହାର ୧୩୬ତମ ସଂସ୍କରଣ ଏବଂ ଓପନ ଯୁଗର ୫୫ତମ ସଂସ୍କରଣ ସଫଳତାର ସହ ଜୁଲାଇ ୩ରୁ ୧୬ ପର୍ଯ୍ୟନ୍ତ ଅଲ୍ ଇଂଲଣ୍ଡ କ୍ଲବରେ ଅନୁଷ୍ଠିତ ହୋଇଯାଇଛି। ବିଶ୍ୱର ନଂ. ୧ ଟେନିସ୍ ଖେଳାଳି ୨୦ବର୍ଷୀୟ ସ୍ପେନ୍ର କାର୍ଲୋସ୍ ଅଲକାରାଜ୍ ଏକ ସଂଘର୍ଷପୂର୍ଣ୍ଣ ଏବଂ ରୋମାଞ୍ଚକର ଫାଇନାଲରେ ଦୀର୍ଘ ବର୍ଷ ଧରି ଟେନିସ୍ ଜଗତରେ ରାଜ୍ କରୁଥିବା ସର୍ବିଆର ନୋଭାକ୍ ଜୋକୋଭିଚ୍ଙ୍କୁ ପରାସ୍ତକରି ତାଙ୍କର ଆଧିପତ୍ୟ ଉପରେ ଅଙ୍କୁଶ ଲଗାଇଛନ୍ତି। ସେଣ୍ଟର କୋର୍ଟରେ ଅନୁଷ୍ଠିତ ୫ ସେଟ୍ ବିଶିଷ୍ଟ ଫାଇନାଲରେ ଭେଟେରାନ ତାରକା ଖେଳାଳି ୩୬ ବର୍ଷୀୟ ଜୋକୋଭିଚ୍ଙ୍କୁ ହରାଇ କ୍ୟାରିୟରର ପ୍ରଥମ ୱିମ୍ବେଲଡନ ଟାଇଟଲ ହାସଲ କରିଥିଲେ ଅଲକାରାଜ୍। ଏହା ଥିଲା ତାଙ୍କ କ୍ୟାରିୟରର ୨ୟ ଗ୍ରାଣ୍ଡସ୍ଲାମ୍ ଟାଇଟଲ। ଗୁରୁତ୍ୱପୂର୍ଣ୍ଣ କଥା ହେଲା ଅଲକାରାଜ୍ ଜନ୍ମହେବା ବେଳକୁ ଜୋକୋଭିଚ୍ ପେସାଦାର ଖେଳାଳିରେ ପରିଣତ ହୋଇସାରିଥିଲେ। ୩ୟ ସର୍ବକନିଷ୍ଠ ଖେଳାଳି ରୂପେ ଏହି ସମ୍ମାନଜନକ ଟାଇଟଲ ହାସଲ କରିଥିଲେ ଅଲକାରାଜ୍। ଜର୍ମାନୀର ବୋରିସ୍ ବେକର ୧୮ ବର୍ଷରେ ଏବଂ ଜାପାନର ଟୋକିଟୋ ଓଡା ମାତ୍ର ୧୭ବର୍ଷ ବୟସରେ ସର୍ବ କନିଷ୍ଠ ଖେଳାଳି ରୂପେ ଏହି ଟାଇଟଲ ହାସଲ କରିଥିଲେ। ଅଲକାରାଜ୍ ତୃତୀୟ ସ୍ପାନିସ୍ ଖେଳାଳି ରୂପେ ଏହି ଟାଇଟଲ ହାସଲ କରିଛନ୍ତି। ପୂର୍ବରୁ ମାନୁଏଲ ସାଣ୍ଟାନା ୧୯୬୬ ଏବଂ ରାଫାଲ ନାଡାଲ ୨୦୦୮ ଏବଂ ୨୦୧୦ରେ ଏହି ସଫଳତା ପାଇଛନ୍ତି।
ଫାଇନାଲରେ ୨ ତାରକା ଖେଳାଳି ଚମକତ୍ାର ଟେନିସ୍ ଖେଳିଥିଲେ। କେହି କାହାରିକୁ ଛାଡ଼ିବାକୁ ପ୍ରସ୍ତୁତ ନ ଥିଲେ। ସେଣ୍ଟର କୋର୍ଟରେ ଉପସ୍ଥିତ ଦର୍ଶକ ଚିତ୍ତାକର୍ଷକ ଟେନିସ୍ର ଭରପୂର ଆନନ୍ଦ ଉଠାଇଥିଲେ। ଶେଷରେ ଇତିହାସ ରଚିଥିଲେ ଅଲଜାରାଜ୍। ଜୋକୋଭିଚ୍ଙ୍କ ଆଶା ଅଧୁରା ରହିଲା। କାରଣ ୨୦୧୩ ପରଠାରୁ ଇଂଲଣ୍ଡର ସେଣ୍ଟର କୋର୍ଟରେ କେବେ ମ୍ୟାଚ୍ ହାରି ନ ଥିଲେ ଜୋକୋଭିଚ୍। ୫ମ ସେଟ୍ରେ ଜିତିଥିଲେ ସେ ମାର୍ଗାରେଟ କୋର୍ଟଙ୍କ ସର୍ବକାଳୀନ ଶ୍ରେଷ୍ଠ ୨୪ତମ ଗ୍ରାଣ୍ଡସ୍ଲାମ୍ ରେକର୍ଡର ସମକକ୍ଷ ହୋଇ ପାରିଥାନ୍ତେ। ଗ୍ରାଣ୍ଡସ୍ଲାମ୍ ଲଢ଼େଇରେ ଗତ କିଛି ବର୍ଷ ଧରି ଜୋକୋଭିଚ୍, ଫେଡେରର ଏବଂ ନାଡାଲଙ୍କ ମଧ୍ୟରେ ଟାଇଟଲ ହାସଲ ପାଇଁ ତୀବ୍ର ପ୍ରତିଯୋଗିତା ଲାଗି ରହିଥିଲା। ସୁଇଜରଲାଣ୍ଡର ଧନୀ ଟେନିସ୍ ଖେଳାଳି ଫେଡେରର ୱିମ୍ବେଲଡନ୍ରେ ୮ ଥର ଏବଂ ଜୋକୋଭିଚ୍ ୭ଥର ଟାଇଟଲ ଜିତିଛନ୍ତି। ଓପନ ଯୁଗରେ ପ୍ରତ୍ୟେକ ଗ୍ରାଣ୍ଡସ୍ଲାମ୍କୁ ୩ ଥର ଲେଖାଏ ଜିତିବାର ରେକର୍ଡ ରଖିଛନ୍ତି ଏହି ସର୍ବୀୟ ଖେଳାଳି। ଅନ୍ୟପକ୍ଷରେ ସ୍ପେନ୍ର ରାଫାଲ ନାଡାଲ ୨ଥର ୱିମ୍ବେଲଡନ୍ ଜିତିଥିବା ବେଳେ ସର୍ବାଧିକ ୧୪ଥର ପାଇଁ ଫ୍ରେଞ୍ଚ ଓପନ କ୍ଲେ କୋର୍ଟ ଟେନିସ୍ ଟାଇଟଲ ହାସଲ କରିଛନ୍ତି। ଅଷ୍ଟ୍ରେଲିଆନ ଓପନ ୨୦୦୯ ଏବଂ ୨୦୨୨ରେ ଜିତିଥିବା ବେଳେ ୨୦୧୦, ୨୦୧୩, ୨୦୧୭, ୨୦୧୯ରେ ୟୁଏସ୍ ଓପନ ଚାମ୍ପିୟନ ହୋଇଛନ୍ତି।
ଗତ ୱିମ୍ବେଲଡନ ଗ୍ରାଣ୍ଡସ୍ଲାମ୍ରେ ବହୁ ନାମୀଦାମୀ ଖେଳାଳି ଅଂଶଗ୍ରହଣ କରିଥିଲେ, ଏହା ଟୁର୍ନାମେଣ୍ଟର ଗ୍ଲାମର ବଢ଼ାଇଥିଲା। ସେମାନଙ୍କ ମଧ୍ୟରେ ଥିଲେ ଡାନିଲ ମେଡ୍ଭେଡେଭ, ଆରିନା ସାବାଲେଙ୍କା, ଭିକ୍ଟୋରିଆ ଆଜାରେଙ୍କା, ଷ୍ଟାନ୍ ୱାରିଙ୍କା, ଡେଭିଡ୍ ଗଫିନ, ମାଟେଓ ବେରେଟିନି, ଆଲେକ୍ଜାଣ୍ଡାର ଜେଭରେଜ୍, ହୋଲ୍ଗର ରୁନ୍, ଆନ୍ଦ୍ରେ ରୁବ୍ଲେଭ୍ଙ୍କ ପରି ଅନେକ ସିଡେଡ୍ ଖେଳାଳି। ସେମିଫାଇନାଲରୁ ୩ୟ ସିଡ୍ ଡାନିଲ ମେଡ୍ଭେଡେଭ ଓ ୮ମ ସିଡ୍ ଜାନିକ ସିନର ବାଦ୍ ପଡ଼ିଥିଲେ। ପ୍ରଥମ ରାଉଣ୍ଡରୁ ବିପର୍ଯ୍ୟୟର ସମ୍ମୁଖୀନ ହୋଇଥିବା ଖେଳାଳିମାନଙ୍କ ମଧ୍ୟରେ ଥିଲେ ଡୋମିନିକ ଥିମ୍, ସେବାଷ୍ଟିଆନ କୋର୍ଡା, ଜନ୍ ଇସନର ଏବଂ ଦ୍ୱିତୀୟ ରାଉଣ୍ଡରୁ ଆଲେକଜାଣ୍ଡାର ମୁଲର, ଆଣ୍ଡି ମୁରେ, ଓସ୍କାର ଓଟେ, କାମେରନ ନୋରି ଏବଂ ବେନ୍ ସେଲ୍ଟନ ଏବଂ ୩ୟ ଏବଂ ୪ର୍ଥ ରାଉଣ୍ଡରୁ ଆଲେକଜାଣ୍ଡାର ଜେଭରେଜ୍, ଡେଭିଡ୍ ଗଫିନ, ଷ୍ଟାନ୍ ୱାରିଙ୍କା, କ୍ରିଷ୍ଟୋଫର ଓକୋନେଲ, ଷ୍ଟିଫାନୋସ୍ ସିତ୍ସିପାସ, ମାଟେଓ ବେରେଟିନି, ଡେନିସ୍ ସାପୋଭଲଭୋ ପ୍ରମୁଖ ବିଦାୟ ନେଇଥିଲେ।
୨୦୨୩ ସଂସ୍କରଣରେ ମହିଳା ବିଭାଗରେ ତୃତୀୟ ଚେକ୍ ଖେଳାଳି ଭାବେ ୱିମ୍ବେଲଡନ ଟାଇଟଲ ଜିତି ଇତିହାସ ରଚିଛନ୍ତି ମାର୍କେଟା ଭୋନ୍ଦ୍ରୋସୋଭା। ଫାଇନାଲରେ ସେ ଟ୍ୟୁନିସିଆର ଓନ୍ସ ଜାବେରଙ୍କୁ ସିଧାସଳଖ ସେଟ୍ରେ ହରାଇ ତୃତୀୟ ଚେକ୍ ଏବଂ ପ୍ରଥମ ଅଣସିଡେଡ୍ ଖେଳାଳି ରୂପେ ଟ୍ରଫି ହାସଲକରି ସମସ୍ତ ତାରକା ଖେଳାଳିଙ୍କୁ ଚମକାଇ ଦେଇଛନ୍ତି। ୨୦୨୨ରେ ଆଘାତଜନିତ ସମସ୍ୟା ଯୋଗୁ ସେ ଏହି ପ୍ରତିଯୋଗିତାରେ ଖେଳିପାରି ନ ଥିଲେ।
ଚଳିତ ବର୍ଷ ପ୍ରଥମ ଗ୍ରାଣ୍ଡସ୍ଲାମ୍ ଅଷ୍ଟ୍ରେଲିଆନ ଓପନରେ ନୋଭାକ୍ ଜୋକୋଭିଚ୍ ପୁରୁଷ ବିଭାଗରେ ଚାମ୍ପିୟନ ହୋଇଥିବା ବେଳେ ମହିଳା ବିଭାଗରେ ବେଲାରୁଷ୍ର ଆରିନା ସାବାଲେଙ୍କା ଟାଇଟଲ ହାସଲ କରିଥିଲେ। ସେହିପରି ୨ୟ ଗ୍ରାଣ୍ଡସ୍ଲାମ୍ ଫ୍ରେଞ୍ଚ ଓପନରେ ପୁରୁଷ ବିଭାଗରେ ନୋଭାକ୍ ଜୋକୋଭିଚ୍ ସିଧାସଳଖ ସେଟ୍ରେ କାସ୍ପର ରୁଡ୍ଙ୍କୁ ପରାସ୍ତକରି ଚାମ୍ପିୟନ ହୋଇଥିବା ବେଳେ ଇଗା ସ୍ବିଟେକ୍ ମହିଳା ବିଭାଗର ବିଜେତା ହୋଇଥିଲେ। ଚଳିତ ବର୍ଷର ଶେଷ ଗ୍ରାଣ୍ଡସ୍ଲାମ୍ ୟୁଏସ୍ ଓପନ ଆସନ୍ତା ଅଗଷ୍ଟ ୨୮ରୁ ସେପ୍ଟେମ୍ବର ୧୦ ମଧ୍ୟରେ ଅନୁଷ୍ଠିତ ହେବ। ପ୍ରତିଯୋଗିତାର ଗତ ସଂସ୍କରଣରେ କାର୍ଲୋସ୍ ଅଲକାରାଜ୍ ପୁରୁଷ ଏବଂ ପୋଲାଣ୍ଡର ଇଗା ସ୍ବିଟେକ ମହିଳା ବିଭାଗ ଚାମ୍ପିୟନ ରହିଛନ୍ତି। ଏହି ଟୁର୍ନାମେଣ୍ଟ ଉପରେ ଜୋକୋଭିଚ୍ଙ୍କ ନଜର ରହିବ।
