ନୂଆଗାଁ,୨୩।୫ (ଡି.ଏନ.ଏ.): ନୟାଗଡ଼ ଜିଲା ନୂଆଗାଁ ବ୍ଲକ ୫୭ ନଂ. ଜାତୀୟ ରାଜପଥ ସୋରଡାଠାରୁ ଗୌଡ ଚାଞ୍ଚେରାପଲୀ ଦେଇ ଯାଇଥିବା ଆର.ଡି. ରାସ୍ତାର ନିର୍ମାଣ କାର୍ଯ୍ୟ ଚାଲିଛି। ହେଲେ ଡାହୁକା ନଦୀରେ ଶନିବାର ସାମାନ୍ୟ ପାଣି ଆସିବା ଫଳରେ ଡାଇଭର୍ସନ ରୋଡ ଧୋଇ ହୋଇଯାଇଛି । ଫଳରେ ଜାତୀୟ ରାଜପଥରୁ ଜଗନ୍ନାଥପ୍ରସାଦ, ଗୌଡ ଚାଞ୍ଚେରାପଲି, କନ୍ଦଳବ ସମେତ ୩ ଗାଁ ସମ୍ପୂର୍ଣ୍ଣ ବିଚ୍ଛିନ୍ନ ହୋଇଯାଇଛି ।
ଖୋର୍ଦ୍ଧା-ବଲାଙ୍ଗୀର ୫୭ ନଂ. ଜାତୀୟ ରାଜପଥ ସୋରଡାଠାରୁ ଗୌଡ ଚାଞ୍ଚେରାପଲି ଦେଇ ଯାଇଥିବା ଆର.ଡି. ରାସ୍ତାର ଡାହୁକା ନଦୀରେ ଥିବା ପୋଲଟି ଗତ ୨ ବର୍ଷ ତଳେ ଭୁଶୁଡି ପଡିଥିଲା । ଫଳରେ ଆଖପାଖ ଗ୍ରାମବାସୀଙ୍କ ଯାତାୟତ ଏକ ପ୍ରକାର ବନ୍ଦ ହୋଇଯାଇଥିଲା । ଅଞ୍ଚଳବାସୀ ବିଭାଗୀୟ ଅଧିକାରୀଙ୍କୁ ଏ ସଂକ୍ରାନ୍ତରେ ବାରମ୍ବାର ଜଣାଇବା ପରେ ସେହି ସ୍ଥାନରେ ପୋଲ ନିର୍ମାଣ ସହିତ ଜାତୀୟ ରାଜପଥଠାରୁ ୩.୫ କିଲୋମିଟର ରାସ୍ତା ନିର୍ମାଣ କରିବା ପାଇଁ ୩୭୪.୮୧ ଲକ୍ଷ ଟଙ୍କା ବ୍ୟୟ ଅଟକଳ କରି ଟେଣ୍ଡର ମାଧ୍ୟମରେ ଭୁବନେଶ୍ୱରର ପାଲ୍ ଆଣ୍ଡ ପାଲ୍ ଇନଫ୍ରାଷ୍ଟ୍ରକଚର ଠିକାସଂସ୍ଥାକୁ କାର୍ଯ୍ୟାଦେଶ ଦିଆଯାଇଥିଲା । ଉକ୍ତ କାମ ୨୪ା୮ା୨୨ ସୁଦ୍ଧା ସାରିବା ପାଇଁ ନିର୍ଦ୍ଦେଶ ଦିଆ ଯାଇଛି । ପୋଲ ନିର୍ମାଣ ସମୟରେ ନଦୀର ପାଣି ନିଷ୍କାସନ ଓ ଲୋକଙ୍କ ଯାତାୟତର ସୁବିଧା ପାଇଁ ଏକ ପକ୍କା ଡାଇଭର୍ସନ ରୋଡ ନିର୍ମାଣ କରିବାର ନିୟମ ରହିଥିବା ବେଳେ ଠିକାସଂସ୍ଥା ଅଳ୍ପ କିଛି ମାଟି ପକାଇ ଅତି ନିମ୍ନମାନର ଡାଇଭର୍ସନ ରୋଡ ନିର୍ମାଣ କରିଥିଲେ । ଫଳରେ ନଦୀର ଉପର ମୁଣ୍ଡରେ ଗୋଟିଏ ବନ୍ଧ ଭାଙ୍ଗି ଯିବାରୁ ସେହି ପାଣିରେ ଡାଇଭର୍ସନ ରୋଡଟି ଧୋଇ ହୋଇ ଯାଇଛି । ନଦୀରେ ପାଣି ଚାଲିଥିବାରୁ କୌଣସି ଯାନବାହାନ ଯିବା ସମ୍ଭବ ହେଉ ନାହିଁ । ଏପରିକି ପାଣି ଆସୁଥିବାରୁ ଲୋକମାନେ ଚାଲି ଯିବା ମଧ୍ୟ ଅସମ୍ଭବ । ଡାଇଭର୍ସନ ରୋଡ ଭାଙ୍ଗିବାର ୨୪ ଘଣ୍ଟା ବିତି ଯାଇଥିଲେ ମଧ୍ୟ ତାକୁ ମରାମତି କରାଯାଇନାହିଁ । ଏ ବାବଦରେ ଠିକାସଂସ୍ଥାର ସୁପରଭାଇଜର ପ୍ରଦୀପ୍ତ କୁମାର ମଲିକଙ୍କୁ ପଚାରିବାରୁ ବିଭାଗ ତରଫରୁ ବିଲ୍ ନ ମିଳିବାରୁ କାମ ବନ୍ଦ ରଖାଯାଇଛି ବୋଲି ସେ କହିଛନ୍ତି । ଅନ୍ୟପକ୍ଷେ ବିଲ୍ ବନ୍ଦ କରିଥିବା ଅଭିଯୋଗ ବିଷୟରେ ଆର.ଡି. କନିଷ୍ଠ ଯନ୍ତ୍ରୀ ଶ୍ରୀକାନ୍ତ କୁମାର ସାହୁଙ୍କୁ ପଚାରିବାରେ ଏତେ ବଡ କାମରେ ମାତ୍ର ୧୨ ଲକ୍ଷ ଟଙ୍କା ବିଲ ବାକିଥିବା କହିଛନ୍ତି । ସୂଚନାଯୋଗ୍ୟ, ଠିକାଦାରର ରାସ୍ତା ନିର୍ମାଣ କାର୍ଯ୍ୟରେ ଶିଥିଳତା ଓ ପ୍ରଥମେ ପୋଲ ନିର୍ମାଣ ନ କରି ରାସ୍ତା କାର୍ଯ୍ୟ କରୁଥିବା ନେଇ ଅଭିଯୋଗ ହୋଇଥିଲା । ତେଣୁ ନୂଆଗାଁ ବ୍ଲକରେ ଚଳିତ ମାସ ୧୧ ତାରିଖରେ ଆୟୋଜିତ ପ୍ରଥମ ସମିତି ବୈଠକରେ ବିଧାୟକ ରମେଶ ଚନ୍ଦ୍ର ବେହେରା ଆର୍.ଡି ଏସ୍.ଡି.ଓ. ତ୍ରିଲୋଚନ ପଣ୍ଡାଙ୍କୁ ତାଗିଦ କରିବା ସହ ଯାତାୟତର ସୁବିଧା ଦୃଷ୍ଟିରୁ ପ୍ରଥମେ ପୋଲ କାମ ଶେଷ କରନ୍ତୁ , ତା’ପରେ ରାସ୍ତା କାମ କରିବେ । ନଚେତ୍ କାମ କରନ୍ତୁ ନାହିଁ ବୋଲି କହିଥିଲେ । ଏହା ପରେ ଠିକାଦାର କାମ ବନ୍ଦ କରିଥିବା ଦେଖିବାକୁ ମିଳିଥିଲା ।
