ବଲାଙ୍ଗୀର ଅଫିସ,୮ା୧୦: ଉତ୍ତରପ୍ରଦେଶର ହାଥରସ ଗଣବଳାତ୍କାର ଘଟଣା ସମାଜରେ ମର୍ମାହତ ସୃଷ୍ଟି କରିଛି। ଏକ ଦଳିତ ନାବାଳିକା ଗଣବଳାତ୍କାର ଘଟଣାରେ ଉତ୍ତରପ୍ରଦେଶ ସରକାରଙ୍କ ପୋଲିସ ପ୍ରଶାସନ ନିଷ୍ଟ୍ରିୟ ହେବା ଏବଂ ପୀଡ଼ିତାଙ୍କ ମୃତ୍ୟୁ ପରେ ଜିଲା ପ୍ରଶାସନ ସମେତ ପୋଲିସ ନାରକୀୟ କାର୍ଯ୍ୟକ୍ରମ ସମଗ୍ର ଜନସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି। ଏନେଇ ସମଗ୍ର ଭାରତରେ ବିରୋଧର ସ୍ବର ଉଠିଥିବା ବେଳେ ବଲାଙ୍ଗୀର ଜିଲା ମହିଳା କଂଗ୍ରେସ ପକ୍ଷରୁ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯିବା ସହ ଜିଲାପାଳଙ୍କ ମାଧ୍ୟମରେ ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ଏକ ସ୍ମାରକପତ୍ର ପ୍ରଦାନ କରାଯାଇଛି। ଏହି ପତ୍ରରେ ପୋଲିସ ପୀଡ଼ିତା ମୃତଦେହକୁ ସଂସ୍କାର ପାଇଁ ନ ଦେବା ଏବଂ ଜବରଦସ୍ତ ପୋଡ଼ିଦେବା ଏକ ରହସ୍ୟ ହୋଇ ରହିଯାଇଛି ବୋଲି ଉଲ୍ଲେଖ ରହିଛି। ପୀଡ଼ିତାଙ୍କ ପରିବାର ମୃତଦେହ ହସ୍ତାନ୍ତର ପାଇଁ କାକୁତି ମୀନତି ହେଲା ପରେ ମଧ୍ୟ ପୋଲିସ କାହାରି କଥା ଶୁଣି ନାହିଁ ଏବଂ ରାତି ଅଧିଆ ମୃତଦେହକୁ ଅଗ୍ନି ସଂଯୋଗ କରି ଆବଶ୍ୟକ ପ୍ରମାଣ ନଷ୍ଟ କରିଦେଇଛି। ଏଭଳି ନିର୍ମମ ବର୍ବରତା ପାଇଁ ଉତ୍ତରପ୍ରଦେଶର ଯୋଗୀ ସରକାର ହିଁ ଦାୟୀ ା ବର୍ତ୍ତମାନର ଯୋଗୀ ସରକାର ଉପରେ ସମଗ୍ର ଦଳିତ ସମାଜର ଆସ୍ଥା ଓ ବିଶ୍ୱାସ ମଳିନ ହୋଇଯାଇଛି ା ଯେହେତୁ ଏହି ଘଟଣା ଭାରତର ସମ୍ବିଧାନ ପରିପନ୍ଥା ଏବଂ ସମ୍ବିଧାନ ବିରୋଧ। ଏଣୁ ଏହାର ନିରପେକ୍ଷ ତଦନ୍ତ ସହ ଉତ୍ତରପ୍ରଦେଶର ଯୋଗୀ ସରକାର ଇସ୍ତଫା ଓ ରାଷ୍ଟ୍ରପତି ଶାସନ ଦାବି କରିଛି କଂଗ୍ରେସ।
