ଜାତୀୟ ପତାକାକୁ ଅସମ୍ମାନ
12:38 pmSeptember 26, 2022September 26, 2022 / 05

ଭଞ୍ଜନଗର,୨୬।୯(ଡି.ଏନ.ଏ): ଆଜାଦୀ କା ଅମୃତ ମହୋତ୍ସବ ଅବସରରେ ସ୍ବାଧୀନତା ଦିବସରେ ପ୍ରତ୍ୟେକ ଘର ସମ୍ମୁଖରେ ଜାତୀୟ ପତାକା ଉଡ଼ାଇବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜନସାଧାରଣଙ୍କୁ ଆହ୍ବାନ ଦେଇଥିଲେ । କେନ୍ଦ୍ର ସରକାରଙ୍କ ପକ୍ଷରୁ ପୋଷ୍ଟ ଅଫିସଗୁଡିକରେ ଜାତୀୟ ପତାକା ବିକ୍ରି କରାଯାଇଥିଲା। ସେହିପରି ରାଜ୍ୟ ସରକାରଙ୍କ ପକ୍ଷରୁ ଲୋକଙ୍କୁ ମାଗଣାରେ ଜାତୀୟ ପତାକା ବାଣ୍ଟିବା ପାଇଁ ଘୋଷଣା କରାଯାଇଥିଲା। ତେବେ ସେ ସମୟରେ ଉଡୁଥିବା ଜାତୀୟ ପତାକା ଏବେ କେଉଁଠି ଛିଣ୍ଡି ତଳେ ପଡ଼ିଛି ତ ଆଉ କେଉଁଠି ଠିକ୍‌ ଭାବେ ଉଡୁନାହିଁ । ଭଞ୍ଜନଗର ଜନସ୍ବାସ୍ଥ୍ୟ ବିଭାଗ କାର୍ଯ୍ୟାଳୟ ନିକଟସ୍ଥ ଏକ କ୍ୱାର୍ଟର୍ସରେ ଜାତୀୟ ପତାକାକୁ ଅସମ୍ମାନ କରାଯାଇଥିବା ଦେଖାଯାଉଛି। ପତାକାରେ ଲାଗିଥିବା ବାଡ଼ି ଭାଙ୍ଗିଯାଇଥିବାରୁ ପତାକାଟି ଓଲଟା ଝୁଲି ରହିଛି ା ଏ ନେଇ ସମ୍ପୃକ୍ତ କାର୍ଯ୍ୟାଳୟର କର୍ମଚାରୀମାନେ ଦେଖୁଥିଲେ କେହି ଠିକ୍‌ ଭାବେ ଲଗାଉନାହାନ୍ତି ଏହାକୁ ନେଇ ଅସନ୍ତୋଷ ଦେଖାଦେଉଛି।
ଅନ୍ୟପକ୍ଷରେ ରାଜ୍ୟରେ ମିଶନ ଶକ୍ତି ମାଧ୍ୟମରେ ମହିଳା ସ୍ବୟଂ ସହାୟିକା ଗୋଷ୍ଠୀକୁ ଜାତୀୟ ପତାକା ପ୍ରସ୍ତୁତ କରିବା ଦାୟିତ୍ୱ ଦିଆଯାଇଥିଲା। ମହିଳା ଗୋଷ୍ଠୀ ଏହି ଦାୟିତ୍ୱ ତୁଲାଇ ଥିବାରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସେମାନଙ୍କୁ ସମ୍ବର୍ଦ୍ଧିତ କରିଛନ୍ତି। ହେଲେ ସ୍ବୟଂ ସହାୟିକା ଗୋଷ୍ଠୀ ପ୍ରସ୍ତୁତ କରିଥିବା ଜାତୀୟ ପତାକା ସେ ସମୟରେ ଲୋକଙ୍କ ପାଖରେ ଠିକ୍‌ ଭାବେ ପହଞ୍ଚିନଥିବା ଜଣାପଡ଼ିଛି। ବେଲଗୁଣ୍ଠା ବ୍ଲକରେ ଅଙ୍ଗନୱାଡ଼ି କର୍ମୀମାନେ ନିଜ ହାତରୁ ଅଳ୍ପ କେତୋଟି ଜାତୀୟ ପତାକା କିଣି କାମ ଚଳାଇଥିଲେ। ପ୍ରଶାସନ ପକ୍ଷରୁ ସେମାନଙ୍କୁ ପତାକା ଦିଆଯାଇ ନ ଥିବା ଜଣାପଡ଼ିଛି। ସେହିଭଳି ଭଞ୍ଜନଗର ବ୍ଲକରେ ମଧ୍ୟ ଅଙ୍ଗନୱାଡ଼ି କର୍ମୀ ମାନେ ନିଜ ନିଜ ଅଞ୍ଚଳର ୫ରୁ ୧୦ ଘରକୁ ଗୋଟିଏ ଲେଖାଏ ଜାତୀୟ ପତାକା ବାଣ୍ଟିଥିଲେ। ଏ ନେଇ ଭଞ୍ଜନଗର ସିଡ଼ିପିଓ ବିଷ୍ଣୁପ୍ରିୟା ସେଠୀଙ୍କୁ ପଚାରିବାରେ ଜାତୀୟ ପତାକା ବଣ୍ଟନ ନେଇ ତାଙ୍କ ପାଖରେ ଠିକ୍‌ ତଥ୍ୟ ନାହିଁ, ଯାହା ଆସିଥିଲା ତାହା ଅଙ୍ଗନୱାଡ଼ି କର୍ମୀମାନଙ୍କ ସହାୟତାରେ ବଣ୍ଟାଯାଇଥିବା କହିଥିଲେ। ବେଲଗୁଣ୍ଠା ସିଡ଼ିପିଓ ଗାୟତ୍ରୀ ମିଶ୍ର ମୋବାଇଲ ଫୋନ ଉଠାଇ ନ ଥିବାରୁ ତାଙ୍କ ମତାମତ ନିଆଯାଇପାରିନାହିଁ ।