ଢେଙ୍କାନାଳ ଅଫିସ,୨୬ା୯: ଖୁବ୍ଶୀଘ୍ର ସମ୍ବଲପୁରରୁ ଅନୁଗୋଳ-ତାଳଚେର-ଢେଙ୍କାନାଳ ଦେଇ କୋଲକାତାକୁ ଦୈନିକ ଯାତ୍ରୀବାହୀ ଟ୍ରେନ୍ ଚାଲିବ। ଏଥିସହ ଢେଙ୍କାନାଳ ରେଳଷ୍ଟେଶନର ନବକଳେବର ହେବ। ଅବିଭକ୍ତ ଢେଙ୍କାନାଳ ଜିଲା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଏହା ବଡ଼ ଉପହାର। କେନ୍ଦ୍ର ରେଳମନ୍ତ୍ରୀ ଏହାର ଶୁଭାରମ୍ଭ କରିବେ ବୋଲି ସୂଚନା ଦେଇଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ। ରବିବାର ଅପରାହ୍ନ ପ୍ରାୟ ୪ଟା ୫୦ରେ ଏକ ସ୍ବତନ୍ତ୍ର ଟ୍ରେନ୍ ଯୋଗେ ରେଲଓ୍ବେର ପଦସ୍ଥ ଅଧିକାରୀଙ୍କ ସହ ଢେଙ୍କାନାଳରେ ପହଞ୍ଚତ୍ ଏହି ଐତିହାସିକ ରେଳଷ୍ଟେଶନର ଉନ୍ନତୀକରଣ କାର୍ଯ୍ୟର ସମୀକ୍ଷା କରିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର।
ଏ ସମ୍ପର୍କରେ ସୂଚନା ଦେଇ ସେ କହିଲେ, ସମ୍ବଲପୁରରୁ କୋଲକାତାକୁ ନୂତନ ଟ୍ରେନ୍ ଚାଲିବା ଦ୍ୱାରା ଅଞ୍ଚଳବାସୀଙ୍କ ଅର୍ଥନୀତିର ବିକାଶ ହେବ। ଦଶହରା, ଲକ୍ଷ୍ମୀପୂଜା ଭଳି ପ୍ରସିଦ୍ଧ ପର୍ବପର୍ବାଣି ଦେଖିବା ପାଇଁ ବହୁ ଲୋକ ଆସିବେ। ଢେଙ୍କାନାଳ ଓ ଅନୁଗୋଳ ଜିଲାରେ ୨୫୦୦ କୋଟି ଟଙ୍କାର ରେଳ ପ୍ରକଳ୍ପ କାର୍ଯ୍ୟ ଜାରି ରହିଛି। ତାଳଚେର, ତାଳଚେର ରୋଡ୍, ଅନୁଗୋଳ, ଢେଙ୍କାନାଳ ରେଳଷ୍ଟେଶନର ପୁନରୁଦ୍ଧାର କାମ ଚାଲିଛି। ଏଥିସହ ରେଳପଥ ଦୋହରୀକରଣ, ୩ୟ ଓ ୪ର୍ଥ ଲାଇନ କାମ ଜାରି ରହିଛି। ଖୁବଶୀଘ୍ର ତାଳଚେରରୁ ଅନୁଗୋଳ ପର୍ଯ୍ୟନ୍ତ ଗୋଟିଏ ପାସେଞ୍ଜର ଏବଂ ୨ଟି ମାଲବାହୀ ଟ୍ରେନ୍ ଟ୍ରାକ୍ କାମ ଶେଷ ହେବ। ପ୍ରାୟ ୫୦୦ କୋଟି ଟଙ୍କା ବ୍ୟୟରେ ତାଳଚେରରୁ ଭାୟା ଏଫ୍ସିଆଇ ଓ ନାଲ୍କୋ ଦେଇ ଅନୁଗୋଳ ପର୍ଯ୍ୟନ୍ତ ଯାତ୍ରୀବାହୀ ରେଳଲାଇନ କାମ ଆସନ୍ତା ନଭେମ୍ବର ସୁଦ୍ଧା ସରିବ। ୧୯୩୨ରେ ଢେଙ୍କାନାଳ ଜିଲା ମେରାମଣ୍ଡଳୀ ରେଳ ଷ୍ଟେଶନରୁ ଜାତିର ପିତା ମହାତ୍ମା ଗାନ୍ଧୀ ଏହି ବାଟ ଦେଇ ଟ୍ରେନ୍ରେ ପୁରୀ ଯାଇଥିଲେ। ତେଣୁ ସମ୍ପୃକ୍ତ ଷ୍ଟେଶନଗୁଡ଼ିକର ଗୁରୁତ୍ୱ ରହିଛି। ଅନୁଗୋଳ, ତାଳଚେର ଓ ଢେଙ୍କାନାଳର ଶିଳ୍ପାନୁଷ୍ଠାନ ବୃଦ୍ଧି ଓ କୋଇଲା ଖଣି ଯୋଗୁ ସରକାର ଅଧିକ ରାଜସ୍ବ ପାଉଛନ୍ତି। ତଦନୁଯାୟୀ ବିକାଶମୂଳକ କାର୍ଯ୍ୟ ହାତକୁ ନିଆଯାଇଥିବା ଧର୍ମେନ୍ଦ୍ର ସୂଚନା ଦେଇଛନ୍ତି। ପୌରାଧ୍ୟକ୍ଷା ଜୟନ୍ତୀ ପାତ୍ର, ପୂର୍ବତନ ମନ୍ତ୍ରୀ ଅଞ୍ଜଳି ବେହେରା, ପୂର୍ବତନ ବିଧାୟକ କୃଷ୍ଣଚନ୍ଦ୍ର ପାତ୍ର, ଶତ୍ରୁଘ୍ନ ଜେନା, ପ୍ରେମାନନ୍ଦ ଜେନା, ସୁନୀଲ ଶର୍ମା, ନବକିଶୋର ଗୁରୁ, ରାମଚନ୍ଦ୍ର ପାତ୍ର ପ୍ରମୁଖ କେନ୍ଦ୍ରମନ୍ତ୍ରୀଙ୍କୁ ସ୍ବାଗତ କରିଥିଲେ। ଏହି ଅବସରରେ ଧର୍ମେନ୍ଦ୍ର ମେରାମଣ୍ଡଳୀ, ହିନ୍ଦୋଳ ରୋଡ୍, ସଦାଶିବପୁର, ଶ୍ୟାମାଚରଣପୁର, ଯୋରନ୍ଦା ରୋଡ୍ ଷ୍ଟେଶନର ଉନ୍ନତୀକରଣ କାର୍ଯ୍ୟର ସମୀକ୍ଷା କରିଥିଲେ। ପୂର୍ବତଟ ରେଲଓ୍ବେ ଜିଏମ୍ ଶରତ କୁମାର ଶ୍ରୀବାସ୍ତବ, ଖୋର୍ଦ୍ଧାରୋଡ୍ ଡିଆରଏମ୍ ରିଙ୍କେଶ ରାୟ, ଢେଙ୍କାନାଳ ରେଳଷ୍ଟେଶନ ମ୍ୟାନେଜର ମନୋଜ ପାଣ୍ଡେ ପ୍ରମୁଖ ଉପସ୍ଥିତ ଥିଲେ।
