ଦିଗପହଣ୍ଡି,୫ା୧୧(ଡି.ଏନ୍.ଏ.): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ଅନ୍ତର୍ଗତ କେରାଣ୍ଡିମାଳ ପାହାଡ଼ରୁ ଆସୁଥିବା ଝରଣାପାଣିକୁ ନେଇ ବି.ତୁରୁବୁଡ଼ି ଓ ବଡଡୁମୁଳା ପଞ୍ଚାୟତ ମଧ୍ୟରେ ବିବାଦ ସୃଷ୍ଟି ହୋଇଛି। ଏହି ବିବାଦୀୟ ଅଭିଯୋଗ ଦିଗପହଣ୍ଡି ତହସିଲ୍ରେ ପହଞ୍ଚିବା ପରେ ତହସିଲଦାର ସିପକ୍ କୁମାର ପାତ୍ରଙ୍କ ନିର୍ଦ୍ଦେଶକ୍ରମେ ଅତିରିକ୍ତ ତହସିଲଦାର ରମେଶ ଚନ୍ଦ୍ର ବେହେରା ଘଟଣାସ୍ଥଳରେ ପହଞ୍ଚି ନିର୍ମାଣ କାର୍ଯ୍ୟକୁ ବନ୍ଦ କରି ଆପୋସ ସମାଧାନ କରିଛନ୍ତି। କେରାଣ୍ଡିମାଳ ପାହାଡ଼ରୁ ଏକ ଚିରସ୍ରୋତା ଝରଣା ପାଣି ମାଗୁରାନାଳରେ ପଡ଼ି ବି.ତୁରୁବୁଡି ପଞ୍ଚାୟତର ୪ ଶହ ହେକ୍ଟର୍ ଜମିରେ ଜଳସେଚିତ ହେଉଥିଲା। ଏହାଦ୍ୱାରା ପଞ୍ଚାୟତର ସାନଆମ୍ବପୁର,ବଡ଼ଆମ୍ବପୁର,ପଟିଗୁଡ଼ା ଓ ଝରିପଦର ଗ୍ରାମର ବହୁ ଚାଷୀ ଉପକୃତ ହେଉଥିଲେ। ଏପରିକି ଚିର ମରୁଡ଼ି ସତ୍ତ୍ୱେ ସମ୍ପୃକ୍ତ ଚାଷଜମି ପ୍ରଭାବିତ ହେଉ ନ ଥିଲା। ଏହି ୪ ଗ୍ରାମ ପାଇଁ ଝରଣା ପାଣି ପ୍ରକୃତିର ବରଦାନ ହୋଇଥିଲା। କିନ୍ତୁ ବଡ଼ପୁମୁଳା ପଞ୍ଚାୟତ ବଡ଼ପଲ୍ଲୀ ଗ୍ରାମର ଚାଷୀମାନେ ଏହି ସ୍ରୋତର ଗତିପଥ ବଦଳାଇ ସେମାନଙ୍କ ଜମିକୁ ଜଳସେଚନ କରିବା ପାଇଁ ଏମ୍ଜି ନରେଗା ପାଣ୍ଠିରୁ ବିନିଯୋଗ କରି ଘଟଣାସ୍ଥଳରେ ଏକ ଚେକ୍ ଡ୍ୟାମ୍ ନିର୍ମାଣ ପାଇଁ ଉଦ୍ୟମ କରିବାରୁ ପୂର୍ବରୁ ଉପକୃତ ହେଉଥିବା ବି.ତୁରୁବୁଡି ପଞ୍ଚାୟତର ୪ ଗ୍ରାମର ବହୁ ଚାଷୀ ଏକତ୍ରିତ ହୋଇ ସ୍ଥାନୀୟ ସରପଞ୍ଚଙ୍କ ସହାୟତାରେ ଦିଗପହଣ୍ଡି ତହସି୍ଲଦାର କାର୍ଯ୍ୟାଳୟରେ ପହଞ୍ଚି ଆନ୍ଦୋଳନ କରିବା ସହ ତହସି୍ଲଦାରଙ୍କ ଅନୁପସ୍ଥିିତିରେ ଏନେଇ ଅତିରିକ୍ତ ତହସି୍ଲଦାର ରମେଶ ଚନ୍ଦ୍ର ପ୍ରଧାନଙ୍କୁ ଦସ୍ତଖତ ସମ୍ବଳିତ ଏକ ସ୍ମାରକ ପତ୍ର ପ୍ରଦାନ କରିଥିଲେ। ଅଭିଯୋଗ ପାଇ ତହସିଲଦାରଙ୍କ ନିର୍ଦ୍ଦେଶକ୍ରମେ ଅତିରିକ୍ତ ତହସି୍ଲଦାର ରମେଶ ଚନ୍ଦ୍ର ବେହେରା ଘଟଣାସ୍ଥଳରେ ପହଞ୍ଚି ପାରିପାର୍ଶ୍ୱିକ ଅବସ୍ଥାକୁ ଅନୁଧ୍ୟାନ କରିବା ସହ ସେଠାରେ ଚାଲିଥିବା ନିର୍ମାଣ କାର୍ଯ୍ୟ ବନ୍ଦ କରି ଦେଇଥିଲେ। ଫଳରେ ମାଗୁରନାଳରେ ଚେକ୍ଡ୍ୟାମ୍ ନିର୍ମାଣ କାର୍ଯ୍ୟ ପାଇଁ ଯେଉଁ ଚାଷୀମାନେ ଦାବି କରିଥିଲେ ସେମାନେ ଅଡୁଆରେ ପଡ଼ିଛନ୍ତି।
