ଝରିଗାଁ,୧୦ା୪(ସ୍ବ.ପ୍ର.): ସଚେତନତା ପରେ ମଧ୍ୟ ଅନ୍ଧବିଶ୍ୱାସ ପିଛା ଛାଡ଼ୁନି । କୁଷ୍ଠ ରୋଗ ଯୋଗୁ ଦୀର୍ଘ ୬ ବର୍ଷ ଧରି ଗାଁରୁ ବାସନ୍ଦ ହୋଇ ଜଙ୍ଗଲ ପାହାଡ଼ଘେରା ଖୋଲା ଆକାଶ ତଳେ ଫଟା ପଲିଥିନ ମଞ୍ଚାରେ ଆଶ୍ରୟ ନେଉଛନ୍ତି ଝରିଗାଁ ବ୍ଲକ ଇଚ୍ଛାପୁର ପଞ୍ଚାୟତ କେବିଡ଼ି ଗ୍ରାମର ସୁନାଧର ଜାନୀ(୬୫)। ପରିବାର କହିଲେ ସ୍ତ୍ରୀ ମାନ୍ଦାଇ ଜାନୀ,୨ ପୁଅ ଏବଂ ଗୋଟିଏ ଝିଅ। ସୁନାଧର ରୋଗଗ୍ରସ୍ତ ହେବା ପରେ ପରିବାର ସହ ଗାଁ ଲୋକେ ତାଙ୍କୁ ଘୃଣା କରିଥିଲେ। ଅନ୍ଧବିଶ୍ୱାସର ବଶବର୍ତ୍ତୀ ହୋଇ ଶେଷରେ ସୁନାଧରଙ୍କୁ ଗାଁରୁ ବାସନ୍ଦ କରାଯାଇଥିଲା। ତେଣୁ ଗାଁଠାରୁ ପ୍ରାୟ ୧କି.ମି. ଦୂରରେ ଥିବା ପାହାଡ଼ ନିକଟରେ ସେ ଏକ ମଞ୍ଚା କରି ରହି ଆସୁଛନ୍ତି। ଦିନ ଥିଲା ସୁନାଧରଙ୍କ ରୋଜଗାରରେ ପରିବାର ଚଳୁଥିଲା, କିନ୍ତୁ ଏବେ ସମାଜରୁ ବାସନ୍ଦ ହୋଇ ଆର୍ଥତ୍କ ଅନଟନରେ ଜୀବନ ଅତିବାହିତ କରୁଛନ୍ତି। ପ୍ରାୟ ଅଧ କିଲୋମିଟର ଦୂରରେ ଥିବା ଏକ ନାଳରୁ ପାଣି ଆଣି ବ୍ୟବହାର କରୁଛନ୍ତି। ସେହିପରି ବେନ୍ଦ୍ରାପାଣି ଜଙ୍ଗଲକୁ ଯାଇ ମହୁଲ, ଚାହଁର କୋଳି ଗୋଟାଇ ତାକୁ ଶୁଖାଇ ଅନ୍ୟ ଲୋକଙ୍କ ସହାୟତାରେ ବିକ୍ରି କରି ନିଜ ଗୁଜୁରାଣ ମେଣ୍ଟାଉଛନ୍ତି। ପାହାଡ଼ିଆ ଆବଡ଼ା ଖାବଡ଼ା ରାସ୍ତାରେ ନାଳକୁ ଏବଂ ଜଙ୍ଗଲକୁ ଯିବା ସମୟରେ ରୋଗରେ କ୍ଷତ ହୋଇଥିବା ଦୁଇ ଗୋଡ଼ରେ ଗୋଡ଼ି ପଥର ବାଜି ଅଧିକ ଯନ୍ତ୍ରଣା ଦେଉଛି। ଝରିଗାଁ ସ୍ବାସ୍ଥ୍ୟ ବିଭାଗ ପକ୍ଷରୁ ୨୦୧୭-୧୮ରେ ସୁନାଧରଙ୍କୁ ଏକ ବର୍ଷ ପର୍ଯ୍ୟନ୍ତ ଚିକିତ୍ସା ଯୋଗାଇ ଦିଆଯାଇଥିଲା। ତାଙ୍କ ଦ୍ୱାରା କେହି ସଂକ୍ରମିତ ହେବେ ନାହିଁ ବୋଲି ସ୍ବାସ୍ଥ୍ୟକେନ୍ଦ୍ରର ଡ. ପ୍ରକାଶ ଚନ୍ଦ୍ର ନାୟକ କହିଥିଲେ। ସୁନାଧର ଭତ୍ତା ପାଇପାରୁ ନ ଥିବାରୁ ବ୍ଲକ ସାମାଜିକ ସୁରକ୍ଷା ଅଧିକାରୀ ପାର୍ଥଜିତ୍ ମଣ୍ଡଳଙ୍କୁ ଯୋଗାଯୋଗ କରିଥିଲୁ। ଅତିଶୀଘ୍ର ତାଙ୍କ ଆଧାର କାର୍ଡ ସହ ମେଡିକାଲ ସାର୍ଟିଫିକେଟ୍ ପ୍ରସ୍ତୁତ କରାଯାଇ ସାମାଜିକ ସୁରକ୍ଷା ଯୋଜନାରେ ଭତ୍ତା ଦେବାର ବ୍ୟବସ୍ଥା କରାଯିବ ବୋଲି କହିଛନ୍ତି। ଘଟଣା ସମ୍ପର୍କରେ ବିଡିଓ ସତ୍ୟନାରାୟଣ ମେହେରଙ୍କୁ ଅବଗତ କରାଯାଇଥିଲା। ତୁରନ୍ତ ସୁନାଧରଙ୍କ ଥଇଥାନ କରାଯିବ ବୋଲି ସେ କହିଥିଲେ।
