ତରବୋଡ଼/ନୂଆପଡା ଅଫିସ୍,୨।୧(ଡି.ଏନ.ଏ.): ଲାଲ୍ ବଙ୍ଗଳାକୁ ଛୁଇଁଲେ ଅପବିତ୍ର ହୋଇଥାଏ। ତେଣୁ ଏହାକୁ ଜାଳି ଦିଆଯାଏ। ଗୃହକର୍ତ୍ତା ପରମ୍ପରା ଅନୁସାରେ ଜାତି, ବନ୍ଧୁଙ୍କୁ ଡାକି ଜାତି ହୁଅନ୍ତି ଓ ଭୋଜିଭାତ ଦିଅନ୍ତି। ଏଭଳି ଏକ ଭିନ୍ନ ପରମ୍ପରା ଚଳିଆସୁଛି ଆଦିବାସୀ ଭୁଞ୍ଜିଆ ସମ୍ପ୍ରଦାୟରେ।
ନୂଆପଡ଼ା ଜିଲା କୋମନା ବ୍ଲକ ଅଞ୍ଚଳରେ ରହିଛି ସୁନାବେଡା ଅଭୟାରଣ୍ୟ। ସୁନାବେଡା, ସୋସେଙ୍ଗ ପଞ୍ଚାୟତକୁ ଛାଡି ମିଛାପାଲି ପଞ୍ଚାୟତର ୩ଟି, ସିଆଲଟିର ପଞ୍ଚାୟତର ଗୋଟିଏ ଏବଂ ନୂଆପଡା ସଦର ବ୍ଲକର ଭରୁଆମୁଣ୍ଡା ପଞ୍ଚାୟତର ୩ଟି ଗାଁ ସମେତ ସୁନାବେଡା ଅଭୟାରଣ୍ୟ ଭିତରେ ୫୩ଟି ଗାଁ ଅଛି। ଏହି ଗାଁସବୁ ସମୁନ୍ଦ୍ର ପତନଠାରୁ ୩୬ ହଜାର ବର୍ଗ ଫୁଟ ଉପରେ ଅବସ୍ଥିତ। ଗାଁରେ ବିଭିନ୍ନ ଜାତିର ଲୋକ ବସବାସ କରୁଥିଲେ ମଧ୍ୟ ଆଦିବାସୀ ସମ୍ପ୍ରଦାୟ ଚକୋଟିଆ ଭୁଞ୍ଜିଆ ଜାତିର ଲୋକ ଅଧିକ। ତାଙ୍କର ଏକ ନିଆରା ପରମ୍ପରା ରହିଛି। ସେମାନଙ୍କ ଲାଲ୍ ବଙ୍ଗଳାକୁ ଛୁଇବା ସମ୍ପୂର୍ଣ୍ଣ ମନା। କେହି ଯଦି ଭୁଲରେ ମଧ୍ୟ ଛୁଇଁ ଦିଅନ୍ତି, ତେବେ ତାହା ଅପବିତ୍ର ହୋଇଗଲା ବୋଲି ମନେ କରି ଲାଲ୍ ବଙ୍ଗଳାକୁ ସେମାନେ ନିଆଁରେ ଜାଳି ଦେଇଥାନ୍ତି। ଏହି ପରମ୍ପରା ଆଦିମ କାଳରୁ ଚଳିଆସୁଛି।
ଲାଲ୍ ବଙ୍ଗଳା(ରୋଷେଇ ଘର) ହେଉଛି ଚକୋଟିଆ ଭୁଞ୍ଜିଆଙ୍କ ପବିତ୍ର ସ୍ଥାନ। ଏହାକୁ ତିଆରି କରିବା ପାଇଁ ଇଟା, ପଥର, ସିମେଣ୍ଟ କିମ୍ବା ରଡ୍ର ଆବଶ୍ୟକତା ନାହିଁ । ମାଟି, କାଠ ଓ ଖର ଦ୍ୱାରା ଏହାକୁ ନିର୍ମାଣ କରି ମାଟି କନ୍ଥରେ ଲାଲ୍ ରଙ୍ଗ ଦିଆଯାଇଥାଏ। ଏନେଇ ଭୁଞ୍ଜିଆଙ୍କ ରୋଷେଇ ଘରକୁ ଲାଲ୍ ବଙ୍ଗଳା ବୋଲି କୁହାଯାଏ। ସେଠାରେ ତାଙ୍କର ଇଷ୍ଟ ଦେବଦେବୀ, ପିତୃ ପୁରୁଷ ପୂଜା ପାଇଥାନ୍ତି। ଏହି ବଙ୍ଗଳାକୁ ବାହାର ଲୋକ ଛୁଇଁବା ମନା। ଏପରିକି ବିବାହ କରି ଶାଶୁ ଘର ଯାଇଥିବା ଝିଅ ମଧ୍ୟ ଛୁଇଁବାକୁ ବାରଣ ରହିଛି। ଝିଅ ବାପଘରକୁ କୁଣିଆ ଆସିଲେ ତାକୁ ଘର ବାହାରେ ରୋଷେଇ କରି ଖାଇବାକୁ ପଡେ। ଯେତେଦିନ ସେ ବାପଘରେ ରହିବ ଅଲଗା ରୋଷେଇ କରି ଖାଇବ। ଲାଲ୍ ବଙ୍ଗଳା ପାଖକୁୁ ଯାଇ ପାରିବ ନାହିଁ। ଭୁଲବଶତଃ କେହି ଲାଲ୍ ବଙ୍ଗଳାକୁ ଛୁଇଁ ଦେଲେ, ସେହି ଘର ଜାଳି ଦେବା ଭଳି କଠୋର ନିୟମ ରହିଛି। ଏବେ ମଧ୍ୟ ଭୁଞ୍ଜିଆଙ୍କ ଏହି ସଂସ୍କୃୃତି ଓ ପରମ୍ପରା ବଞ୍ଚି ରହିଛି
