ମହାକାଳପଡ଼ା,୧୫ା୧୨ (ଡି.ଏନ.ଏ.): କେନ୍ଦ୍ର ଓ ରାଜ୍ୟ ସରକାରଙ୍କ ପକ୍ଷରୁ ଗ୍ରାମାଞ୍ଚଳରେ ବସବାସ କରୁଥିବା ଗରିବଙ୍କୁ ଆବାସ ଯୋଜନାରେ ଗୃହ ଯୋଗାଇ ଦେବାର ବ୍ୟବସ୍ଥା କରିଛନ୍ତି। ହେଲେ ଜଣେ ଦିବ୍ୟାଙ୍ଗ ମହିଳା ଛିଣ୍ଡା ପଲିଥିନ ତଳେ ଜୀବନ ବିତାଉଥିବାର କରୁଣ ଚିତ୍ର ଦେଖିବାକୁ ମିଳିଛି କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଉପକୂଳ ଅଞ୍ଚଳ ପେଟଛେଲା ପଞ୍ଚାୟତର ଲୁଣିମାଠିଆ ଶବରପଡ଼ା ଗଁାରେ। ଗଁାର ଶୈଳ ନାୟକ(୫୨)ଙ୍କ ସ୍ବାମୀ ଡବା ନାୟକ ୮ ବର୍ଷ ହେବ ଯକ୍ଷ୍ମା ରୋଗରେ ପୀଡ଼ିତ ହୋଇ ମୃତ୍ୟୁ ଘଟିଥିଲା। ସ୍ବାମୀଙ୍କ ମୃତ୍ୟୁ ପରେ ଶୈଳ ବହୁ କଷ୍ଟରେ ପରିବାର ପ୍ରତିପୋଷଣ କରୁଥିଲେ। ଭାଗ୍ୟର ବିଡମ୍ବନା ଶୈଳ ପକ୍ଷାଘାତ ରୋଗର ଶିକାର ହୋଇଗଲେ। ଆଗ ଭଳି ଆଉ କାମ ଧନ୍ଦା କରି ପାରୁନାହାନ୍ତି। ଏହି ଆଦିବାସୀ ଶବର ଜାତିର ଦିବ୍ୟାଙ୍ଗ ମହିଳା ମୁଣ୍ଡ ଗୁଞ୍ଜିବାକୁ ଅର୍ଥ ସାଜିଛି ବାଧକ। ଚାଷ ଜମି ନ ଥିବାରୁ ସରକାରୀ ଜଙ୍ଗଲ କିସମ ଜମିରେ ଖଣ୍ଡେ ଛିଣ୍ଡା ପଲିଥିନ ତଳେ ଜୀବନ ଅତିବାହିତ କରୁଛନ୍ତି। ଏହି ଶବରପଡ଼ାବାସୀଙ୍କୁ ଘର ଡିହ ପଟ୍ଟା ମିଳିନି ବୋଲି ଗ୍ରାମବାସୀ କହିଛନ୍ତି। ବାତ୍ୟା ଜୱାଦ ପ୍ରଭାବରେ ସ୍ଥାନୀୟ ପ୍ରଶାସନ ପକ୍ଷରୁ ଡାକବାଜି ଯନ୍ତ୍ର ମାଧ୍ୟମରେ ତଳିଆ ଅଞ୍ଚଳ କଚ୍ଚା ଘର ଛାଡ଼ି ପକ୍କା ଘରେ ଆଶ୍ରୟ ନିଅନ୍ତୁ ବୋଲି ପ୍ରଚାର ହୋଇଥିଲା। ସେତେବେଳେ ଏହି ଦିବ୍ୟାଙ୍ଗ ମହିଳା ଛିଣ୍ଡା ପଲିଥିନ ତଳେ ପବନର ଗର୍ଜନ ଓ ଭୀଷଣ ବର୍ଷାରେ ଭଗବାନ ଭରସାରେ ଜୀବନ ଜିଇବାକୁ ପଡ଼ିଥିଲା ବୋଲି କୋହ ଭରା କଣ୍ଠରେ ବଖାଣିଛନ୍ତି। ଏହି ଦିବ୍ୟାଙ୍ଗ ମହିଳାଙ୍କ ମୁଣ୍ଡ ଗୁଞ୍ଜିବାକୁ ଛାତ ଘର ପାଇଁ ସାତସପନ ପାଲଟିଛି। ତେବେ ଦିବ୍ୟାଙ୍ଗଙ୍କୁ ଆବାସ ଯୋଜନାରେ ପକ୍କା ଘର ଯୋଗାଇ ଦେବାକୁ ସାଧାରଣରେ ଦାବି ହେଉଛି।
