ଧର୍ମଶାଳା,୨୪ା୫(ଡି.ଏନ.ଏ.): ଧର୍ମଶାଳା ବ୍ଲକ୍ ଅଞ୍ଚଳରେ ପ୍ରଧାନମନ୍ତ୍ରୀ ଆବାସ ଯୋଜନା ବଣ୍ଟନରେ ଅନିୟମିତତା ହେଉଥିବା ଅଭିଯୋଗ ହୋଇଛି। ଏଠାରେ ଯୋଗ୍ୟ ହିତାଧିକାରୀ ବାଦ୍ ପଡୁଥିବାବେଳେ ଅଯୋଗ୍ୟଙ୍କୁ ଦିଆଯାଉଛି ଗୃହ। ପିସି ଦେଉ ନ ଥିବା ଓ ଶାସକ ଦଳର ସମର୍ଥକ ହୋଇ ନ ଥିବାରୁ ଅନେକ ଯୋଗ୍ୟ ହିତାଧିକାରୀ ଯୋଜନାରୁ ବାଦ ପଡୁଛନ୍ତି। ଏହାର ଉଦାହରଣ ଦେଖିବାକୁ ମିଳିଛି ବ୍ଲକ୍ ଅଧୀନ ନେଉଳପୁର ପଞ୍ଚାୟତ ନେଉଳପୁର ଗ୍ରାମର ଦିବ୍ୟାଙ୍ଗ ମହିଳା କମରୁନ ବିବିଙ୍କ ପରିବାର କ୍ଷେତ୍ରରେ। ପଞ୍ଚାୟତ ଜନପ୍ରତିନିଧି ଓ ବ୍ଲକ ପ୍ରଶାସନର ଅବହେଳା ଯୋଗୁ ତାଙ୍କ ପରିବାର ଆବାସ ଯୋଜନାରେ ଘର ପାଇବାରୁ ବଞ୍ଚତ୍ତ ହୋଇଛନ୍ତି। କମରୁନ ବିବିଙ୍କ ୨ ଝିଅ ଓ ଗୋଟିଏ ପୁଅ ଜନ୍ମରୁ ଦିବ୍ୟାଙ୍ଗ। ସେମାନେ ପରଘରେ ପାଇଟି କରି ପରିବାର ପ୍ରତିପୋଷଣ କରିଥାନ୍ତି। ଝାଟିମାଟି ଘରେ ରହୁଥିବା ଏହି ପରିବାର ପାଇଁ ଆବାସ ଗୃହ ଯୋଗାଇ ଦେବା ଲାଗି କମରୁନଙ୍କ ବଡ଼ଝିଅ ତମନ୍ନା ପରବିନ ଆବେଦନ କରିଥିଲେ। ଗୃହ ମିଳିବ ବୋଲି ସ୍ଥାନୀୟ ସରପଞ୍ଚ ଓ ସମିତିସଭ୍ୟ ପ୍ରତିଶ୍ରୁତି ଦେଇଥିଲେ। ହେଲେ ଏହା ମଧ୍ୟରେ ୫ ବର୍ଷ ବିତିଯାଇଥିଲେ ମଧ୍ୟ ତମନ୍ନାଙ୍କୁ ଆବାସ ଗୃହ ପ୍ରଦାନ କରାଯାଇ ପାରିନାହିଁ। ଏନେଇ ବୁଧବାର ତମନ୍ନା ତାଙ୍କ ଭାଇ ଓ ଭଉଣୀଙ୍କୁ ସାଙ୍ଗରେ ନେଇ ଧର୍ମଶାଳା ବିଡିଓଙ୍କୁ ଭେଟି ପକ୍କାଘରଟିଏ ପାଇଁ ନିବେଦନ କରିଛନ୍ତି। ବିଡିଓ ଦେବେନ୍ଦ୍ର ପ୍ରସାଦ ବଳ ଏସମ୍ପର୍କରେ ଅବଗତ ହେବା ପରେ ୨ରୁ ୩ ଦିନ ମଧ୍ୟରେ ଏହି ସମସ୍ୟାର ସମାଧାନ କରାଯିବ ବୋଲି କହିଛନ୍ତି। ତେବେ ଦେଖିବାକୁ ଅପେକ୍ଷା କେବେ ଏହି ସମସ୍ୟାର ସମାଧନ ହେଉଛି।
