ଢେଙ୍କାନାଳ ଅଫିସ,୧୭ା୧: ଢେଙ୍କାନାଳ ଜିଲା ସଦର ବ୍ଲକ ସରାଗପାଟଣା, ଚନ୍ଦ୍ରଶେଖରପ୍ରସାଦ, ଓଡାପଡା ବ୍ଲକର ରଥପଦା ଓ ପରଜଙ୍ଗ ବ୍ଲକ ଖାଲପାଳ ନିକଟସ୍ଥ ଗିରିଗୋବର୍ଦ୍ଧନ ଗ୍ରାମରେ ସ୍ଥାନୀୟ ବୁଣାକାରମାନଙ୍କ ଦ୍ୱାରା ପ୍ରସ୍ତୁତ କାରଗିଲ, କମ୍ପ୍ୟୁଟର, ରେଖା, ଗଙ୍ଗା-ଯମୁନା ଓ ବାଡ଼ିବନ୍ଧ ନାମରେ ନାମିତ ହସ୍ତତନ୍ତ ଓ ଶାଢ଼ିକୁ ପ୍ରୋତ୍ସାହିତ କରି ଢେଙ୍କାନାଳ ମାର୍କା ଶାଢ଼ି ଭାବେ ସ୍ବତନ୍ତ୍ର ପରିଚୟ ଦେବାକୁ ଜିଲା ପ୍ରଶାସନ ପକ୍ଷରୁ ଉଦ୍ୟମ ଆରମ୍ଭ ହୋଇଛି। ଏହି ପରିପ୍ରେକ୍ଷୀରେ ସୋମବାର ଜିଲା କାର୍ଯ୍ୟାଳୟ ପରିସରରେ ସରାଗପାଟଣା ବୁଣାକାର ସଂଘ ଦ୍ୱାରା ପ୍ରସ୍ତୁତ ଶାଢି, ଗାମୁଛା, ଲୁଙ୍ଗି ଓ ଶାର୍ଟ କପଡ଼ା ଆଦି ବିକ୍ରି ବ୍ୟବସ୍ଥାର ଜିଲାପାଳ ସରୋଜ କୁମାର ସେଠୀ ଶୁଭାରମ୍ଭ କରିଥିଲେ। ଜିଲା କାର୍ଯ୍ୟାଳୟର ସରକାରୀ ମହିଳା କର୍ମଚାରୀ ଏବଂ ଅଧିକାରୀମାନେ ବିଭିନ୍ନ ପ୍ରକାରର ଶାଢ଼ି ଓ ଶାର୍ଟ କପଡ଼ା କିଣିଥିଲେ। ଜିଲାପାଳ ନିଜେ ପ୍ରଥମେ ଏକ ଶାର୍ଟ କପଡ଼ା କିଣି ବିକ୍ରିର ଶୁଭାରମ୍ଭ କରିଥିଲେ। ଏହି ଅବସରରେ ଜିଲାପାଳ ସରୋଜ କୁମାର ସେଠୀ କହିଲେ ଯେ, ଢେଙ୍କାନାଳ ଜିଲାରେ ପ୍ରସ୍ତୁତ ଶାଢ଼ିକୁ ପ୍ରୋତ୍ସାହିତ କରି ରାଜ୍ୟ, ଦେଶ ଓ ବିଦେଶରେ ଏହାକୁ ଆଦୃତ କରାଇବା ସହିତ ଆଧୁନିକ ଡିଜାଇନଯୁକ୍ତ କରି ଏହାକୁ ଅଧିକ ଆକର୍ଷଣୀୟ କରାଯିବ। ଏଥିପାଇଁ ସମ୍ବଲପୁର ଓ ସୋନପୁର ଜିଲାରୁ ଦକ୍ଷ ପ୍ରଶିକ୍ଷକମାନଙ୍କୁ ଡକାଇ ଜିଲାରେ ଥିବା ବୁଣାକାର ତଥା କାରିଗରମାନଙ୍କୁ ପ୍ରଶିକ୍ଷଣ ଦିଆଯିବ। ସରକାରୀ ଚାକିରି କରିଥିବା ମହିଳା କର୍ମଚାରୀମାନେ ସପ୍ତାହର ସୋମବାର ହସ୍ତତନ୍ତ ପ୍ରସ୍ତୁତ ଶାଢ଼ି ଓ ପୁରୁଷ କର୍ମଚାରୀମାନେ କପଡା କିଣି ଶାର୍ଟ ତିଆରି କରି ଏହାକୁ ପରିଧାନ କରିବାକୁ ଜିଲାପାଳ କହିଥିଲେ। ଏତଦ୍ବ୍ୟତୀତ ଜିଲାର ସମସ୍ତ ବ୍ଲକ, ପୌର, ଏନ୍ଏସି କାର୍ଯ୍ୟାଳୟ ଓ ଉପଜିଲାପାଳଙ୍କ କାର୍ଯ୍ୟାଳୟଠାରେ ଶାଢ଼ି, ଗାମୁଛା, କପଡ଼ା ଆଦିର ବିକ୍ରି କରାଯିବ। ଜନସାଧାରଣ ବହୁଳ ଭାବରେ ଜିଲାର ହସ୍ତତନ୍ତ ପ୍ରସ୍ତୁତ ସାମଗ୍ରୀ ବ୍ୟବହାର କରିବେ ବୋଲି ଜିଲାପାଳ ଆଶାବ୍ୟକ୍ତ କରିଥିଲେ। ସରାଗପାଟଣା ବୁଣାକାର ସଂଘର ନିରୀକ୍ଷକ ପ୍ରଶାନ୍ତ କୁମାର ସାହୁ ଏଥିରେ ସହଯୋଗ କରିଥିଲେ।
