ଢେଙ୍କାନାଳ ଅଫିସ, ୧୦।୧୧: ହାତୀ-ମଣିଷ ସଂଘର୍ଷ ଅପବାଦର କଳଙ୍କ ଲିଭାଇବାକୁ ପୁଣି ଥରେ ପ୍ରୟାସ ଆରମ୍ଭ କରିଛି ଢେଙ୍କାନାଳ ବନ ବିଭାଗ। ଜନବସତିମୁହଁା ହାତୀପଲ ଏବଂ ସେମାନଙ୍କ ଉପଦ୍ରବରୁ ଧନଜୀବନକୁ ସୁରକ୍ଷା ଦେବାକୁ ଆରମ୍ଭ ହେବ ନୂଆ ଅଭିଯାନ ‘ଗଜରକ୍ଷା, ଜନସୁରକ୍ଷା’। ପ୍ରାରମ୍ଭିକ ପର୍ଯ୍ୟାୟରେ ଜିଲାର ୧୦ ହସ୍ତୀ ଉପଦ୍ରୁତ ଗ୍ରାମକୁ ଏଥିରେ ଅନ୍ତର୍ଭୁକ୍ତ କରାଯାଇଛି। ପୂର୍ବରୁ ହାତୀ-ମଣିଷ ବିବାଦ ପ୍ରତିହତ କରିବାକୁ କାର୍ଯ୍ୟକାରୀ ଅଧଡଜନେ ଯୋଜନା ଫେଲ୍ ମାରିଥିବା ବେଳେ ପ୍ରସ୍ତାବିତ ନୂତନ ଅଭିଯାନ ଫଳପ୍ରସୂ ହେବ ବୋଲି ଆଶା ବାନ୍ଧିଛି ବନ ବିଭାଗ।
ହାତୀ ଶିକାର ହେଉ କି ହାତୀ ମୃତ୍ୟୁ ଅଥବା ହାତୀ ଆକ୍ରମଣରେ ମଣିଷ ଜୀବନ ଯିବା, ସବୁଥିରେ ରାଜ୍ୟରେ ୧ ନମ୍ବର ଢେଙ୍କାନାଳ ଜିଲା। ଏହାକୁ ନେଇ ଚିନ୍ତାରେ ପଡ଼ିଛି ବନ ବିଭାଗ । ଏଥିଲାଗି ଯୋଜନା ପରେ ଯୋଜନା କରାଯାଉଥିଲେ ମଧ୍ୟ ତାହା କାମ ଦେଉନାହିଁ। ଏସବୁ ମଧ୍ୟରେ ହାତୀ-ମଣିଷ ସଂଘର୍ଷ ଏଡ଼ାଇବାକୁ ଡିସେମ୍ବରରୁ କାର୍ଯ୍ୟକାରୀ ହେବାକୁ ଯାଉଛି ‘ଗଜରକ୍ଷା, ଜନସୁରକ୍ଷା’। ସାଧାରଣତଃ ଧାନ ଅମଳ ସମୟରେ ହାତୀ ଉପଦ୍ରବରୁ ଏହି ଅଭିଯାନ ଧନଜୀବନକୁ ସୁରକ୍ଷା ଦେବ ବୋଲି ବନ ବିଭାଗ ଆଶା ବାନ୍ଧିଛି।
ପ୍ରଥମ ପର୍ଯ୍ୟାୟରେ ଜିଲାର ମହାବିରୋଡ, ହିନ୍ଦୋଳ ଓ ସଦର ରେଞ୍ଜ୍ ଅଧୀନ ୧୦ ଗ୍ରାମକୁ ଏହି ଯୋଜନାରେ ଅନ୍ତର୍ଭୁକ୍ତ କରିବା ପାଇଁ ଚିହ୍ନଟ କରାଯାଇଛି। ସମ୍ପୃକ୍ତ ଗ୍ରାମଠାରୁ ହାତୀଙ୍କୁ ଦୂରରେ ରଖିବାକୁ ସୋଲାର ପ୍ୟାନ୍ଶିଂ ବ୍ୟବସ୍ଥା କରାଯିବ। ଏଥିପାଇଁ ୯୦% ଅର୍ଥ ରାଜ୍ୟ ସରକାର ପ୍ରଦାନ କରୁଥିବାବେଳେ ୧୦% ଅର୍ଥ ସମ୍ପୃକ୍ତ ଗ୍ରାମବାସୀଙ୍କଠାରୁ ଆଦାୟ କରାଯିବ। ମହାବିରୋଡ ରେଞ୍ଜ୍ ଖାଲପାଳ ଗ୍ରାମରୁ ଏହା କାର୍ଯ୍ୟକାରୀ କରିବାକୁ ଯୋଜନା କରାଯାଇଥିବାବେଳେ ଏଥିଲାଗି ଟେଣ୍ଡର ପ୍ରକ୍ରିୟା ଆରମ୍ଭ ହୋଇଛି।
ଏ ସଂକ୍ରାନ୍ତରେ ଜିଲା ବନଖଣ୍ଡ ଅଧିକାରୀ (ଡିଏଫ୍ଓ) ଡ. ପ୍ରକାଶଚାନ୍ଦ ଗୋଗିନେନି କୁହନ୍ତି, ଖୁବ୍ଶୀଘ୍ର ଜିଲାରେ ‘ଗଜରକ୍ଷା, ଜନ ସୁରକ୍ଷା’ ଯୋଜନା ଆରମ୍ଭ ହେବ। ଏଥିଲାଗି ପ୍ରଥମ ପର୍ଯ୍ୟାୟରେ ୧୦ ଗ୍ରାମ ଚିହ୍ନଟ କରାଯାଇଛି। ସମ୍ପୃକ୍ତ ଗ୍ରାମର ପରିଧି ଅନୁଯାୟୀ ସୋଲାର ଫ୍ୟାନ୍ଶିଂ କରାଯିବ। ଜିଲାରେ ହାତୀ-ମଣିଷ ବିବାଦ ରୋକିବାରେ ଏହି ଯୋଜନା ଫଳପ୍ରଦ ହେବ ବୋଲି ଆଶା କରାଯାଉଥିବା ଡିଏଫ୍ଓ କହିଛନ୍ତି।
