ଦୁବାଇ, ୨୦।୧୦: ଶିଖର ଧାଓ୍ବନଙ୍କ ଶତକ ବଳରେ ମଙ୍ଗଳବାର ଏଠାରେ ଖେଳାଯାଇଥିବା ଆଇପିଏଲ୍ର ୩୮ତମ ମୁକାବିଲାରେ ଦିଲ୍ଲୀ କ୍ୟାପିଟାଲ୍ସ ୧୬୫ ରନର ଟାର୍ଗେଟ୍ କିଙ୍ଗ୍ସ ଇଲେଭେନ ପଞ୍ଜାବ ସାମ୍ନାରେ ଧାର୍ଯ୍ୟ କରିଛି। ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଦିଲ୍ଲୀ ନିର୍ଦ୍ଧାରିତ ୨୦ ଓଭରରେ ୫ ଉଇକେଟ୍ ହରାଇ ୧୬୪ ରନ କରିଥିଲା। ଦଳ ପକ୍ଷରୁ ଓପନର୍ ଧାଓ୍ବନ ସର୍ବାଧିକ ୧୦୬ ରନ କରି ଅପରାଜିତ ରହିଥିଲେ। ତାଙ୍କ ଶତକୀୟ ଇନିଂସରେ ସେ ୧୨ ଚୌକା ଓ ୩ ଛକା ମାରିଥିଲେ। ଟୁର୍ନାମେଣ୍ଟରେ ଧାଓ୍ବନଙ୍କ ଏହା ଲଗାତର ୨ୟ ଶତକ ଥିଲା। ଏଥିପୂର୍ବରୁ ସେ ପୂର୍ବ ମ୍ୟାଚ୍ରେ ଚେନ୍ନାଇ ସୁପର୍ କିଙ୍ଗ୍ସ ବିପକ୍ଷରେ ୧୦୧ ରନ କରି ଅପରାଜିତ ରହିଥିଲେ। ଏଥିସହ ଆଇପିଏଲ୍ ୧୩ ବର୍ଷର ଇତିହାସରେ ସେ ପ୍ରଥମ ଖେଳାଳି ଭାବେ ଲଗାତର ୨ ଶତକ ହାସଲ କରିବାର ବିରଳ କୀର୍ତ୍ତିମାନ ସ୍ଥାପନ କରିଛନ୍ତି। ଦିଲ୍ଲୀ ପକ୍ଷରୁ ଅନ୍ୟମାନଙ୍କ ମଧ୍ୟରେ ପୃଥ୍ବୀ ଶ ୭, ଅଧିନାୟକ ଶ୍ରେୟାସ ଆୟାର ୧୪, ରିଷଭ ପନ୍ତ ୧୪, ମାର୍କସ ଷ୍ଟୋଇନିସ ୯ ଓ ସିମରନ ହେଟ୍ମେୟର ୧୦ ରନ କରିଥିଲେ। ପଞ୍ଜାବ ପକ୍ଷରୁ ମହମ୍ମଦ ସାମି ୨ଟି ଉଇକେଟ୍ ନେଇଥିଲେ।
