ଦିଗପହଣ୍ଡି,୧୬ା୮(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡିର ଶ୍ରୀ ଦଧିବାମନ ମନ୍ଦିର ପ୍ରାଙ୍ଗଣରେ ଚାଷୀ ସଙ୍ଗଠନ ଓଡ଼ିଶା କୃଷକ ସଭା ଦିଗପହଣ୍ଡି ବ୍ଲକ କମିଟି ପକ୍ଷରୁ ଆଲୋଚନା ସଭା ଅନୁଷ୍ଠିତ ହୋଇଯାଇଛି। ବରିଷ୍ଠ କୃଷକ ସଙ୍ଗଠକ ରାମ ପୂଜାରୀଙ୍କ ସଭାପତିତ୍ୱରେ ଅନୁଷ୍ଠିତ ସଭାରେ ଓଡିଶା କୃଷକ ସଭା ଗଞ୍ଜାମ ଜିଲା ଉପସଭାପତି କୈଳାସ ଷଡ଼ଙ୍ଗୀ, ଆଇନଜୀବୀ କୁରେଶୁ ପଣ୍ଡା ଅତିଥି ଭାବେ ଯୋଗ ଦେଇଥିଲେ। କୃଷକ ସଭାର ଗଞ୍ଜାମ ଜିଲା ସମ୍ପାଦକ ପି. ଶିବ ଶଙ୍କର ସଭାରେ ଉଦ୍ବୋଧନ ଦେଇ ଚଳିତବର୍ଷ ପ୍ରାଥମିକ ସେବା ସମବାୟ ସମିତି ଧାନମଣ୍ଡିରେ ଉତ୍ପାଦିତ ଧାନ ବିକ୍ରି ପାଇଁ ରେଜିଷ୍ଟ୍ରେଶନ ସମୟରେ ଚାଷୀ ବିବିଧ ସମସ୍ୟାର ସମ୍ମୁଖୀନ ହେଉଥିବା କହିଥିଲେ। ସାମ୍ପ୍ରତିକ ପରିସ୍ଥିତିରେ ଧାନମଣ୍ଡିରେ ଚାଷୀ ରେଜିଷ୍ଟ୍ରେଶନ ପାଇଁ ରାଜ୍ୟ ସରକାରଙ୍କ ପକ୍ଷରୁ ଜାରି କରାଯାଇଥିବା କଠୋର ନୀତି ନିୟମ ଓ ନୂତନ ଆଇନ ଯୋଗୁ ଦିଗପହଣ୍ଡି ବ୍ଲକ ଅଧୀନ ବିଭିନ୍ନ ଗ୍ରାମାଞ୍ଚଳରେ ରହୁଥିବା ନିମ୍ନ ମଧ୍ୟବିତ୍ତ ଚାଷୀ, ଭାଗ ଚାଷୀ, ବିଶେଷ କରି ମଠ, ମନ୍ଦିର ଜମିଚାଷ କରି ଜୀବିକା ନିର୍ବାହ କରୁଥିବା ପ୍ରାୟ ୭୦ ପ୍ରତିଶତ ଭାଗଚାଷୀ ଚଳିତବର୍ଷ ଖରିଫ ଧାନ ଅମଳ ପରେ କଷ୍ଟାର୍ଜିତ ଧାନକୁ ସରକାରଙ୍କ ନିର୍ଦ୍ଧାରିତ ଦରରେ ବିକ୍ରି ପାଇଁ ମଣ୍ଡିରେ ରେଜିଷ୍ଟ୍ରଶନ କରିବାରୁ ବଞ୍ଚିତ ହେବା ନିଶ୍ଚିତ ହୋଇଯାଇଛି। ଯା ’ଫଳରେ ପ୍ରତିବର୍ଷ ଗାଁ ଗହଳରେ ସାହୁକାର ମହାଜନଙ୍କଠାରୁ ସୁଧ(କଳନ୍ତର)ରେ ଟଙ୍କା ଆଣି ଧାର କରଜ କରି ଜମିରେ ଧାନଚାଷ କରିଥିବା ଗରିବ ଅସହାୟ ଚାଷୀ ପରିବାର କ୍ଷତି ସହିବେ।
ସେହିପରି ମଧ୍ୟବିତ୍ତ ଓ ନିମ୍ନ ମଧ୍ୟବିତ୍ତ ଚାଷୀ ବୃନ୍ଦ ମଧ୍ୟ ଏଥିରୁ ବାଦ୍ ପଡ଼ିବେ ନାହିଁ ବୋଲି ଅତିଥି ଦ୍ବୟ କହିଥିଲେ। ପୂର୍ବବର୍ଷଭଳି ଚଳିତବର୍ଷ ସେବା ସମବାୟ ସମିତି ଧାନମଣ୍ଡିରେ ଚାଷୀଙ୍କ ନାଁ ରେଜିଷ୍ଟ୍ରେଶନ କରି ସମସ୍ତ ଚାଷୀ,ଭାଗ ଚାଷୀମାନଙ୍କ ଧାନ କ୍ରୟ ପାଇଁ ନିର୍ଦ୍ଦେଶ ଦେବାକୁ ସୋମବାର ଗଞ୍ଜାମ ଜିଲାପାଳଙ୍କ ଉଦ୍ଦେଶ୍ୟରେ ସ୍ଥାନୀୟ ତହସିଲଦାରଙ୍କ ଜରିଆରେ ଚାଷୀମାନଙ୍କ ପକ୍ଷରୁ ସ୍ମାରକପତ୍ର ପ୍ରଦାନ କରାଯିବ ବୋଲି ସଭାରେ ନିଷ୍ପତ୍ତି ନିଆଯାଇଥିଲା। ସଭାରେ କିଶୋର ଚନ୍ଦ୍ର ଜେନା, ଅର୍ଦ୍ଦୁ. ହରି, ଅର୍ବ୍ଦୁ. ସୂର୍ଯ୍ୟନାରାୟଣ, ଅର୍ଦ୍ଦୁୁ. କୃଷ୍ଣମୂର୍ତ୍ତି, କେ. ବାଲାଜୀ, ବି. କାଳିଆ, ଏମ. ରାମଚନ୍ଦ୍ର,ଏମ୍. ଚୈତନ୍ୟ,ଜି. ଶୁକୁରୁ, ପି. ହୃଷୀକେଶ ରାଓ, ଅଭିମନ୍ୟୁ ପାତ୍ର,ଇ. କୈଳାସ, ଏ. ଭାସ୍କର, ଏନ୍. ଚକ୍ରପାଣି,ଏ. ମାଧବ, ଏ. ମୁତିଆଲୁ ପ୍ରମୁଖ ବହୁ ସଂଖ୍ୟକ ଚାଷୀ ଉପସ୍ଥିତ ଥିଲେ।
