ନୟାଗଡ଼,୧୫।୪(ଲୋକନାଥ ମିଶ୍ର): ନୟାଗଡ଼ ଜିଲା ମୁଖ୍ୟ ଚିକିତ୍ସାଳୟ (ଡିଏଚ୍ଏଚ୍)ରେ ଜ୍ୱର ମାପିବା ଯନ୍ତ୍ର ଥର୍ମୋମିଟର ନାହିଁ। ଏଥିପାଇଁ କୌଣସି ଜ୍ୱରରେ ପୀଡ଼ିତ ରୋଗୀ ଆସିଲେ ତାଙ୍କୁ ଥର୍ମୋମିଟର କିଣି ଆଣିବାକୁ କୁହାଯାଉଛି। ସେ ଡାକ୍ତରଖାନା ବାହାରେ ଥିବା ଔଷଧ ଦୋକାନରୁ ଥର୍ମୋମିଟର କିଣି ଆଣିବା ପରେ ଜ୍ୱର ପରୀକ୍ଷଣ କରାଯାଉଛି ବୋଲି କେତେଜଣ ରୋଗୀ ଓ ସେମାନଙ୍କ ସମ୍ପର୍କୀୟ ଅଭିଯୋଗ କରିଛନ୍ତି। ସରକାର ସ୍ବାସ୍ଥ୍ୟସେବାକୁ ଗୁରୁତ୍ୱ ଦେଉଥିବାବେଳେ ରୋଗୀ ଥର୍ମୋମିଟର କିଣି ପରୀକ୍ଷା କରିବା ଘଟଣା ସ୍ବାସ୍ଥ୍ୟ ବିଭାଗର ଅପାରଗତାକୁ ପଦାରେ ପକାଇଛି। ଯାହାକି ଜିଲା ମୁଖ୍ୟ ଚିକିତ୍ସାଳୟର ସ୍ବାସ୍ଥ୍ୟସେବା ଉପରେ ପ୍ରଶ୍ନବାଚୀ ଲଗାଇଛି।
ଏନେଇ ଡାଳିଆମଡ଼ା ଗଁାର ମିଟୁ ସାହୁ କୁହନ୍ତି, ମୋ ପୁଅକୁ ନେଇ ମୁଁ ଜିଲା ମୁଖ୍ୟ ଚିକିତ୍ସାଳୟର ମାତୃ ଶିଶୁ ହସ୍ପିଟାଲକୁ ନେଇଥିଲି । ମୋ ପୁଅ ଅସୁସ୍ଥ ଥିବାରୁ ଜ୍ୱର ଥାଇପାରେ ବୋଲି ଡାକ୍ତର ସନ୍ଦେହ କରିଥିଲେ । ନର୍ସଙ୍କ ପାଖରେ ପରୀକ୍ଷଣ ପାଇଁ ଡାକ୍ତର ପରାମର୍ଶ ଦେଇଥିଲେ । ନର୍ସଙ୍କ ପାଖକୁ ଯାଇ ପରୀକ୍ଷଣ କରିବାକୁ କହିବାରୁ ଥର୍ମୋମିଟର ବ୍ୟବସ୍ଥା ଜିଲା ମୁଖ୍ୟ ଚିକିତ୍ସାଳୟରେ ନାହିଁ କହିଥିଲେ। ଏପରି କି ମେଡିସିନ ଦୋକାନରୁ କିଣି ଆଣିବାକୁ ପରାମର୍ଶ ମିଳିଥିଲା। ମେଡିସିନ ଦୋକାନରୁ ଥର୍ମୋମିଟର କିଣି ନେବା ପରେ ପରୀକ୍ଷଣ ହୋଇଥିଲା । ନାଗମୁଣ୍ଡୁଳୀ ଗଁାର ପ୍ରତାପ ଚନ୍ଦ୍ର ପରିଡ଼ା କୁହନ୍ତି ମୋର ଜଣେ ସମ୍ପର୍କୀୟ ଜିଲା ମୁଖ୍ୟ ଚିକିତ୍ସାଳୟର ମେଡିସିନ ୱାର୍ଡରେ ଚିକିତ୍ସିତ ହେଉଥିଲେ। ରୋଗୀଙ୍କ ଜ୍ୱର ଆସୁଥିବାରୁ ପରୀକ୍ଷଣ ପାଇଁ ଥର୍ମୋମିଟର କିଣିବାକୁ ନର୍ସ ପରାମର୍ଶ ଦେଲେ । ଥର୍ମୋମିଟର କିଣି ନେବା ପରେ ପରୀକ୍ଷଣ କରାଗଲା। ନୟାଗଡ଼ର ସାମାଜିକ କର୍ମୀ ସନ୍ତୋଷ ପ୍ରଧାନ କୁହନ୍ତି, ସରକାର ମାଗଣା ଔଷଧ ଦେଉଥିବାବେଳେ ଜିଲା ମୁଖ୍ୟ ଚିକିତ୍ସାଳୟରେ ଜ୍ୱର ମାପିବା ଯନ୍ତ୍ର ନାହିଁ କହିଲେ ବିଶ୍ୱାସ ହେଉନି। ତେବେ ଜ୍ୱର ଜାଣିବା ପାଇଁ ଥର୍ମୋମିଟର ନ ମିଳିବାରୁ ରୋଗୀ ଅଯଥାରେ ଖର୍ଚ୍ଚାନ୍ତ ହୋଇ କିଣିବା ଘଟଣା ସ୍ବାସ୍ଥ୍ୟସେବା ବିପର୍ଯ୍ୟସ୍ତକୁ ପଦାରେ ପକାଇଛି। ସ୍ବାସ୍ଥ୍ୟ ବିଭାଗ ସବୁ ୱାର୍ଡରେ ଥର୍ମୋମିଟର ଯୋଗାଇ ନ ଦେଲେ ଆମେ ବାଧ୍ୟ ହୋଇ ଆନ୍ଦୋଳନ କରିବୁ ବୋଲି କହିଛନ୍ତି । ଜିଲା ପରିଷଦ ସଭାପତି ଦେବାଶିଷ ପଟ୍ଟନାୟକ କୁହନ୍ତ,ରୋଗୀଙ୍କ ଜ୍ୱର ପରୀକ୍ଷଣ ପାଇଁ ଥର୍ମୋମିଟର କିଣିବା ଘଟଣା ଠିକ୍ ନୁହେଁ। ଏହାର ତଦନ୍ତ ହେବା ଦରକାର। ଏନେଇ ସିଡିଏମ୍ଓ ଏବଂ ଜିଲା ମୁଖ୍ୟ ଚିକିତ୍ସାଳୟର ଅଧୀକ୍ଷକଙ୍କ ସହ ଆଲୋଚନା କରି ପଦକ୍ଷେପ ନେବି।
ଜିଲା ମୁଖ୍ୟ ଚିକିତ୍ସାଳୟର ଅଧୀକ୍ଷକ ଅଜୟ କୁମାର ବାହିନୀପତି କୁହନ୍ତି, ଜିଲା ମୁଖ୍ୟ ଚିକିତ୍ସାଳୟରେ ଜ୍ୱର ରୋଗୀ ହଇରାଣ ହେଉଛନ୍ତି ଏପରି ଅଭିଯୋଗ ମୁଁ ପାଇନାହିଁ । ତେବେ ଜ୍ୱର ରୋଗୀ ଥର୍ମୋମିଟର କିଣି ଆଣିବା ପରେ ପରୀକ୍ଷଣ କରାଯାଉଥିବା ଘଟଣାର କେତେଦୂର ସତ୍ୟାସତ୍ୟ ରହିଛି ମୁଁ ଅନୁଧ୍ୟାନ କରିବି । କିଏ ଓ କାହିଁକି ଥର୍ମୋମିଟର କିଣି ଆଣିବାକୁ ପରାମର୍ଶ ଦେଉଛି ତା’ର ତଦନ୍ତ ହେବ । ଅନ୍ୟପକ୍ଷେ ଆଗକୁ ଜ୍ୱର ରୋଗୀ ଯେପରି ହଇରାଣ ନ ହେବେ ସେଥିପ୍ରତି ଗୁରୁତ୍ୱ ଦିଆଯିବ ବୋଲି କହିଛନ୍ତି । ଜିଲା ମୁଖ୍ୟ ଚିକିତ୍ସାଧିକାରୀ(ସିଡିଏମ୍ଓ) ରମାକାନ୍ତ ପଣ୍ଡା କୁହନ୍ତି, ଜ୍ୱର ରୋଗୀ ବାହାରୁ ଥର୍ମୋମିଟର କିଣି ଜିଲା ମୁଖ୍ୟ ଚିକିତ୍ସାଳୟରେ ପରୀକ୍ଷଣ କରିବା ଘଟଣା ଠିକ୍ ନୁହେଁ । ଜିଲା ମୁଖ୍ୟ ଚିକିତ୍ସାଳୟର ଅଧୀକ୍ଷକଙ୍କ ସହ ଆଲୋଚନା କରି ପ୍ରତି ୱାର୍ଡରେ ଥର୍ମୋମିଟର ବ୍ୟବସ୍ଥା ଯୁଦ୍ଧକାଳୀନ ଭିତ୍ତିରେ କରାଇବେ ବୋଲି କହିଛନ୍ତି।
