ଭଞ୍ଜନଗର, ୨୯।୬ (ବାବୁଲା ପ୍ରଧାନ): ଭଞ୍ଜ ରାଜବଂଶ ଦ୍ୱାରା ପ୍ରତିଷ୍ଠିତ ଗଞ୍ଜାମ ଜିଲ୍ଲା ଭଞ୍ଜନଗର ନିକଟସ୍ଥ କୁଲାଡ଼ ଶ୍ରୀଜଗନ୍ନାଥ ମନ୍ଦିରରେ ସୋମବାର ପବିତ୍ର ଦେବସ୍ନାନ ପୂର୍ଣ୍ଣିମା ମହୋତ୍ସବ ପୂର୍ବ ନିର୍ଦ୍ଧାରିତ ନୀତିନିର୍ଘଣ୍ଟ ଅନୁଯାୟୀ ଭକ୍ତିଭାବ ଓ ଆଡ଼ମ୍ବରର ସହ ସମ୍ପନ୍ନ ହୋଇଯାଇଛି। ଏହି ଅବସରରେ ଭଞ୍ଜନଗର ରାଜସ୍ୱ ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଥିଲା।
ସକାଳ ୮ଟାରେ ରତ୍ନବେଦୀ ସଂସ୍କାର ନୀତି ସମ୍ପନ୍ନ ହେବା ପରେ ଶ୍ରୀଜଗନ୍ନାଥ, ବଳଭଦ୍ର ଓ ସୁଭଦ୍ରାଙ୍କୁ ଧାଡ଼ି ପହଣ୍ଡିରେ ସ୍ନାନବେଦୀକୁ ବିଜେ କରାଯାଇଥିଲା। ପରେ ସୂର୍ଯ୍ୟପୂଜା, ଦେବନୀତି ଓ ପବିତ୍ର ସ୍ନାନନୀତି ବିଧିବଦ୍ଧ ଭାବେ ସମ୍ପନ୍ନ ହୋଇଥିଲା। ଏହାପରେ ଶ୍ରୀଜୀଉମାନଙ୍କ ସାଜସଜ୍ଜା, ଆଳତୀ, ବଲ୍ଲଭ ଭୋଗ ଓ ଶୁଖିଲା ଭୋଗ ଲାଗି ନୀତି ଅନୁଷ୍ଠିତ ହୋଇଥିଲା।
ଅପରାହ୍ନରେ ଶ୍ରୀଜୀଉମାନଙ୍କ ଗମ୍ଭୀରା ପ୍ରତ୍ୟାବର୍ତ୍ତନ ନୀତି, ଦକ୍ଷିଣାୟନ ଭୋଗ, ବିଭୀଷଣ ଦର୍ଶନ ଏବଂ ଶେଷରେ ଅଣସର ନୀତି ସମ୍ପନ୍ନ ହୋଇଥିଲା। ସମସ୍ତ ନୀତିକାନ୍ତି ଭଞ୍ଜ ରାଜବଂଶର ପ୍ରଶାନ୍ତ ଭଞ୍ଜ ଦେଓଙ୍କ ଉପସ୍ଥିତିରେ ଅନୁଷ୍ଠିତ ହୋଇଥିଲା। ସେ ଆଦ୍ୟ ସେବକ ଭାବେ ତିନି ଠାକୁରଙ୍କ ପୂଜାର୍ଚ୍ଚନା କରିଥିଲେ।
ଦେବସ୍ନାନ ପୂର୍ଣ୍ଣିମା ଦର୍ଶନ ପାଇଁ ଭଞ୍ଜନଗର ସମେତ ଆଖପାଖ ଅଞ୍ଚଳରୁ ବହୁ ସଂଖ୍ୟକ ଭକ୍ତ ଓ ଶ୍ରଦ୍ଧାଳୁ ମନ୍ଦିରକୁ ଆସି ମହାପ୍ରଭୁଙ୍କ ଦିବ୍ୟ ସ୍ନାନ ଦର୍ଶନ କରି ଆଶୀର୍ବାଦ ଲାଭ କରିଥିଲେ।
ତହସିଲଦାର ଅଭିପ୍ସା ପଟ୍ଟନାୟକ ଓ ଅତିରିକ୍ତ ତହସିଲଦାର ଅବିନାଶ ମାହାରଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ସମସ୍ତ ନୀତିକାନ୍ତି ସୁଚାରୁରୂପେ ସମ୍ପାଦିତ ହୋଇଥିଲା। କୁଲାଡ଼ ରାଜସ୍ୱ ନିରୀକ୍ଷକ ଭଗବାନ ବେହେରା ପୂର୍ବରୁ ଆବଶ୍ୟକୀୟ ପୂଜା ସାମଗ୍ରୀର ବ୍ୟବସ୍ଥା କରିବା ସହ ପୂଜକ ଓ ସେବାୟତମାନଙ୍କୁ ନେଇ ପ୍ରସ୍ତୁତି ବୈଠକ ଆୟୋଜନ କରିଥିଲେ। ଫଳରେ ସମସ୍ତ ନୀତି ନିର୍ଦ୍ଧାରିତ ସମୟରେ ଶୃଙ୍ଖଳାର ସହ ସମ୍ପନ୍ନ ହୋଇଥିଲା।ଦେବସ୍ନାନ ନୀତିକୁ ବଡ଼ପଣ୍ଡା ସନ୍ତୋଷ ପଣ୍ଡା, ମନ୍ଦିର ପୁରୋହିତ ଅରୁଣ ମିଶ୍ର, ଚିରଞ୍ଜିବୀ ପାଢ଼ୀ ଓ ଅନ୍ୟାନ୍ୟ ପୂଜକ, ପୂଜାପଣ୍ଡା ଏବଂ ସେବାୟତମାନେ ସଫଳତାର ସହ ସମ୍ପାଦନ କରିଥିଲେ।
ଅନ୍ୟପକ୍ଷରେ, ଏସ୍ଆଇ ଲକ୍ଷ୍ମୀଧର ମହାନ୍ତି ଓ ଏଏସ୍ଆଇ ଶରତ ଚନ୍ଦ୍ର ପଣ୍ଡାଙ୍କ ନେତୃତ୍ୱରେ ଭଞ୍ଜନଗର ପୁଲିସ ପକ୍ଷରୁ ଶାନ୍ତିଶୃଙ୍ଖଳା ବଜାୟ ରଖିବା ଏବଂ ଭକ୍ତମାନଙ୍କ ସୁରକ୍ଷା ପାଇଁ କଡ଼ା ସୁରକ୍ଷା ବ୍ୟବସ୍ଥା କରାଯାଇଥିଲା। ଏହାଫଳରେ ସମଗ୍ର ଦେବସ୍ନାନ ପୂର୍ଣ୍ଣିମା ମହୋତ୍ସବ ଶାନ୍ତିପୂର୍ଣ୍ଣ ଓ ସୁଶୃଙ୍ଖଳ ଭାବେ ସମ୍ପନ୍ନ ହୋଇଥିଲା।
