ପୁରୀ ଅଫିସ,୨୮।୭:ପ୍ରଶାସନର କଡ଼ା କଟକଣା ସତ୍ତ୍ୱେ ମଙ୍ଗଳବାର ଶ୍ରୀଗୁଣ୍ଡିଚା ମନ୍ଦିରରେ ୪ଜଣ ବ୍ୟକ୍ତି ଅନଧିକାର ପ୍ରବେଶ କରିଛନ୍ତି। ଏହାକୁ ନେଇ ସୁରକ୍ଷା ବ୍ୟବସ୍ଥା ପ୍ରତି ପ୍ରଶ୍ନ ଉଠିଛି। ଜଣେ ମହିଳା ଓ ଜଣେ ପୁରୁଷ ଭକ୍ତଙ୍କ ସହ ୨ଜଣ ପୋଲିସ କର୍ମଚାରୀ ଶ୍ରୀଗୁଣ୍ଡିଚା ମନ୍ଦିରରେ ପ୍ରବେଶ କରିଥିବା ଭିଡିିଓ ଫୁଟେଜ୍ରେ ଦେଖିବାକୁ ମିଳିଛି। ସେମାନେ ରାଜ୍ୟ ବାହାରର ବୋଲି ଆଲୋଚନା ହେଉଛି।
ସମ୍ପୃକ୍ତ ପୋଲିସ ଅଫିସର ଦ୍ୱୟଙ୍କୁ ପଚାରିବାରେ କହିଛନ୍ତି, ମନ୍ଦିର ଭିତରକୁ ଯାଇନାହୁଁ। ଅଳ୍ପ ବାଟ ଯାଇ ଫେରିଆସିଛୁ। ଅନ୍ୟପକ୍ଷରେ, ସମ୍ପୃୃକ୍ତ ବ୍ୟକ୍ତିମାନେ ଶ୍ରୀଗୁଣ୍ଡିଚା ମନ୍ଦିର ପରିସରରେ ଦୀର୍ଘ ସମୟ କଟାଇ ଫେରିଥିବା ଭିଡିଓରୁ ସ୍ପଷ୍ଟ ହେଉଛି। ଭକ୍ତଦ୍ୱୟଙ୍କ ବେଶପୋଷାକରୁ ଇସ୍କନ ବୈଷ୍ଣବ ଧର୍ମାବଲମ୍ବୀଙ୍କ ଭଳି ଦେଖା ଯାଉଛନ୍ତି। ସମ୍ପୃକ୍ତ ମହିଳା ଓ ପୁରୁଷ ଭକ୍ତ ଶ୍ରୀଗୁଣ୍ଡିଚା ମନ୍ଦିରରୁ ବାହାରି ସଙ୍ଗେସଙ୍ଗେ ଏକ ଚାରିଚକିଆ ଯାନ (ଓଡି-ଓଟୁଏଏସ୍-୩୫୩୬)ରେ ବସି ଚାଲିଯାଇଥିଲେ। ସମ୍ପୃକ୍ତ ୨ପୋଲିସ ଅଫିସରଙ୍କ ପୋଷାକରେ କେ.ରି.ପୁ ଲେଖାଥିବାରୁ ସେମାନେ କେନ୍ଦ୍ରୀୟ ସୁରକ୍ଷା ବଳ କର୍ମଚାରୀ ବୋଲି ଅନୁମାନ କରାଯାଉଛି। ତେବେ ଶ୍ରୀଗୁଣ୍ଡିଚା ମନ୍ଦିର ସମ୍ମୁଖରେ ସୁରକ୍ଷା ବ୍ୟବସ୍ଥା ସତ୍ତ୍ୱେ ସେମାନେ କିପରି ପ୍ରବେଶ କଲେ ତାହା ସାଧାରଣରେ ପ୍ରଶ୍ନବାଚୀ ହୋଇଛି। ଏଥିପାଇଁ ସହରବାସୀ ହୁଗୁଳା ସୁରକ୍ଷା ବ୍ୟବସ୍ଥାକୁ ଦାୟୀ କରିଛନ୍ତି। ଶ୍ରୀଗୁଣ୍ଡିଚା ମନ୍ଦିର ସୁରକ୍ଷା ଦାୟିତ୍ୱକୁ ପ୍ରଶାସନ ଏତେ ହାଲୁକାରେ ନେବା ଉଚିତ୍ ନୁହେଁ ବୋଲି ସୁରକ୍ଷା ଅଧିକାର କର୍ମୀ ବିଶ୍ୱଜିତ ମହାନ୍ତି କହିଛନ୍ତି। ଅନ୍ୟପକ୍ଷରେ ଶ୍ରୀମନ୍ଦିର ଉନ୍ନୟନ ପ୍ରଶାସକ ଅଜୟ କୁମାର ଜେନା କହିଛନ୍ତି, ସୁରକ୍ଷାକର୍ମୀ ନ ଥିବା ବେଳେ ସମ୍ପୃକ୍ତ ବ୍ୟକ୍ତିମାନେ ମନ୍ଦିରରେ ପ୍ରବେଶ କରିଛନ୍ତି। ସେମାନଙ୍କ ପରିଚୟ ଏପର୍ଯ୍ୟନ୍ତ ମିଳିପାରି ନାହିଁ। ତେବେ ଅନଧିକାର ପ୍ରବେଶ କଥା ସତ। ଭିଡିଓ ଫୁଟେଜରୁ ଏହା ବାରି ହେଉଛି। ଭିଡିଓରେ ଦେଖାଯାଉଥିବା ପୋଲିସ କର୍ମଚାରୀ ଓଡ଼ିଶା ପୋଲିସର ନୁହନ୍ତି। ଗାଡ଼ି ନମ୍ବର ସ୍ପଷ୍ଟ ଭାବେ ଜଣାପଡ଼ୁନାହିଁ। ତଥାପି ପ୍ରଶାସନ ଏହି ପ୍ରସଙ୍ଗକୁ ଗୁରୁତ୍ୱର ସହ ନେଉଛି।
