ଟିକିରି,୧୪।୪ (ପ୍ରଫୁଲ୍ଲ କୁମାର ବେହେରା): ସୋମବାର ପାଳନ କରିଥାନ୍ତେ ୨୮ ତମ ଜନ୍ମଦିନ। ହେଲେ ବିଧିର ବିଧାନ କିଛି ଥିଲା ଅଲଗା । ଜନ୍ମଦିନ ପାଳନ କରିବା ପୂର୍ବରୁ ଚାଲିଗଲା ଯୁବକଙ୍କ ଜୀବନ । ରାୟଗଡ଼ା ଜିଲା କାଶୀପୁର ବ୍ଲକ୍ ଟିକିରି ମୁଖ୍ୟ ବଜାରରେ ଏଭଳି ଏକ ଅଭାବନୀୟ ଘଟଣା ଘଟିଛି। ମୃତକ ହେଲେ ଟିକିରି ବଜାରରେ ପାନଦୋକାନ କରିଥିବା ଶ୍ରୀଧର ସ୍ବାଇଁ । ଗତ ୨ଦିନ ହେଲା ଅଞ୍ଚଳରେ ପ୍ରବଳ ଗରମ ଅନୁଭୂତ ହେଉଥିବାରୁ ଅଂଶୁଘାତରେ ଶ୍ରୀଧରଙ୍କ ମୃତ୍ୟୁ ହୋଇଥିବା ଅଞ୍ଚଳବାସୀ ସନ୍ଦେହ କରୁଛନ୍ତି। ସେହିପରି ଯୁବକଙ୍କ ନିର୍ବନ୍ଧ ସରିଥିବାରୁ ଆଉ କିଛ ମାସ ପରେ ତାଙ୍କର ବାହାଘର ହୋଇଥାନ୍ତା ବୋଲି ପରିବାର ଲୋକେ କହିଛନ୍ତି।
ଶ୍ରୀଧର ରବିବାର ମଧ୍ୟାହ୍ନରେ ଦୋକାନକୁ ଆସି ତାଙ୍କ ବାପା ସନ୍ନ୍ୟାସୀ ସ୍ବାଇଁଙ୍କୁ ଖାଇବାକୁ ଘରକୁ ପଠାଇ ଦେଇଥିଲେ। ଏହି ସମୟରେ ଶ୍ରୀଧର ଦୋକାନରେ ବସିଥିବା ସମୟରେ ଅସୁସ୍ଥ ଅନୁଭବ କରିଥିଲେ। ପରେ ତାଙ୍କ ନାକରୁ ରକ୍ତ ବାହାରିବା ସହ ଅତ୍ୟଧିକ ଝାଳ ବାହାରିବାରୁ ସେ ଅଚେତ ହୋଇ ଦୋକାନ ଭିତରେ ପଡ଼ିଯାଇଥିଲେ। ସନ୍ନ୍ୟାସୀ ଖାଇ ଦୋକାନକୁ ଆସି ଦେଖିଲା ବେଳକୁ ପୁଅ ଅଚେତ ହୋଇ ପଡ଼ିଛନ୍ତି। ସଙ୍ଗେ ସଙ୍ଗେ ସେ ପଡ଼ୋଶୀ ଦୋକାନୀଙ୍କୁ ଡାକି ଅଟୋରିକ୍ସା ଯୋଗେ ଉଷାପଡ଼ା ଉତ୍କଳ ହସ୍ପିଟାଲକୁ ନେଇଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏ ନେଇ ପରିବାର ଲୋକେ ଟିକିରି ଥାନାକୁ ଜଣାଇଥିଲେ। ଥାନାରେ ଅପମୃତ୍ୟୁ ମାମଲା ନଂ. ୫/୨୬ ରୁଜୁକରି ପୋଲିସ ଘଟଣାର ତଦନ୍ତ ଚଳାଇଛନ୍ତି। ରବିବାର ରାତି ହୋଇଯିବାରୁ ସୋମବାର ସକାଳେ ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ସୋମବାର ତାଙ୍କ ଜନ୍ମଦିନରେ ଅନ୍ତିମ ସତ୍କାର କରାଯାଇଥିଲା। ଏହି ଘଟଣାକୁ ନେଇ ଗାଁରେ ଶୋକାକୁଳ ପରିବେଶ ସୃଷ୍ଟି ହୋଇଛି।
