ସମ୍ବଲପୁର,୨।୩(ଭବାନୀଶଙ୍କର ଭୋଇ): ସମ୍ବଲପୁର ମହାନଗର ନିଗମର ସ୍ବଚ୍ଛ ସମ୍ବଲପୁର ସ୍ଲୋଗାନ ସତ୍ତ୍ବେ ସହରରେ ସ୍ବଚ୍ଛତା ସବୁବେଳେ ଚିନ୍ତାର କାରଣ ପାଲଟିଛି। ମହାନଗର ନିଗମ ପକ୍ଷରୁ ଆବର୍ଜନ ପରିଚାଳନା ପାଇଁ ଅନେକ ବ୍ୟବସ୍ଥା ରହିଛି। ତଥାପି ମଧ୍ୟ ସ୍ବଚ୍ଛତା ନେଇ ଲୋକମାନଙ୍କ ଆପତ୍ତିି ଓ ଅଭିଯୋଗ କମିନାହିଁ। ମହାନଗର ନିଗମ ପକ୍ଷରୁ ୪୧ଟି ୱାର୍ଡର ସଫେଇ କାର୍ଯ୍ୟ ପରିଚାଳନା ପାଇଁ ମାସକୁ ଏକ କୋଟିରୁ ଅଧିକ ଟଙ୍କା ଖର୍ଚ୍ଚ କରାଯାଉଛି। କେତେକ ସ୍ଥାନରୁ ଦିନ ଦିନ ଧରି ଆବର୍ଜନା ସଂଗ୍ରହ ନ ହେବା, କେତେକ ସ୍ଥାନରେ ଦୀର୍ଘ ଦିନ ଧରି ଆବର୍ଜନା ପଡିରହିବା, ଡ୍ରେନଗୁଡିକ ଠିକଣା ଭାବେ ସଫା ନ ହେବା, ରାସ୍ତାରେ ଡ୍ରେନ ପାଣି ପ୍ରବାହିତ ହେଉଥିବା ଭଳି ଅଭିଯୋଗ ସମ୍ବଲପୁର ମହାନଗର ନିଗମ ପାଇଁ ସାଧାରଣ ଘଟଣା। ସହରରେ ଡ୍ରେନ ପାଇଁ ମାଷ୍ଟରପ୍ଲାନ ତିଆରି କରାଯାଉଛି। ତେବେ ଅନେକ ୱାର୍ଡରେ ରାସ୍ତା ଉପରେ ଡ୍ରେନ ପାଣି ଜମି ରହୁଥିବା ଭଳି ସ୍ଥିତି ଦେଖିବାକୁ ମିଳୁଛି। ଅନେକ ସମୟରେ ଅଭିଯୋଗ ପରେ ବି କୌଣସି ସୁଫଳ ମିଳୁ ନ ଥିବା ମଧ୍ୟ ଅନେକ ଅଭିଯୋଗ କରନ୍ତି। ଅନେକ ୱାର୍ଡରେ ସଫେଇ ପାଇଁ ଠିକାସଂସ୍ଥାକୁ ଦାୟିତ୍ୱ ଦିଆଯାଇଛି। ତଥାପି ସହରର ସ୍ବଚ୍ଛତା ନେଇ ସବୁବେଳେ ପ୍ରଶ୍ନବାଚୀ ସୃଷ୍ଟି ହୋଇଥାଏ। ତେବେ ମହାନଗର ନିଗମ ଆୟୁକ୍ତ ବେଦଭୂଷଣଙ୍କ ସୂଚନା ଅନୁଯାୟୀ ବିଗତ କିଛି ବର୍ଷ ତୁଳନାରେ ସହରର ୧୦ରୁ ୪୦% ଆବର୍ଜନା ସଂଗ୍ରହ ବୃଦ୍ଧି ପାଇଛି। ମହାନଗରର ୪୧ଟି ୱାର୍ଡରୁ ଦୈନିକ ୨ଶହ ଟନ ଆବର୍ଜନା ବାହାରୁଛି। ମହାନଗର ନିଗମ ପକ୍ଷରୁ ଘରକୁ ଘର ଯାଇ ଆବର୍ଜନା ସଂଗ୍ରହ ପାଇଁ ଗାଡ଼ିର ବ୍ୟବସ୍ଥା ରହିଛି। ବିଭିନ୍ନ ସ୍ଥାନରେ ଜମା ହେଉଥିବା ଆବର୍ଜନାକୁ ସଂଗ୍ରହ ପାଇଁ ଟ୍ରାକ୍ଟର ଓ ଅନ୍ୟାନ୍ୟ ଗାଡ଼ିର ମଧ୍ୟ ବ୍ୟବସ୍ଥା ହୋଇଛି। ୱେଲ ସେଣ୍ଟରରେ ଆବର୍ଜନାକୁ ପୃଥକ କରାଯାଇ ସେଥିରୁ ଖତ ମଧ୍ୟ ପ୍ରସ୍ତୁତି ହେଉଛି। ସେହିପରି ଖୁବଶିଘ୍ର ମହାନଗର ଅଞ୍ଚଳରେ ୫୦ କୋଟି ଟଙ୍କା ବ୍ୟୟରେ ଆବର୍ଜନାଗୁଡ଼ିକର ପ୍ରକ୍ରିୟାକରଣ ପାଇଁ ମଧ୍ୟ ସ୍ବତନ୍ତ୍ର ପ୍ଲାଣ୍ଟ ସ୍ଥାପନ କରାଯିବ ବୋଲି ଆୟୁକ୍ତ ସୂଚନା ଦେଇଛନ୍ତି। ତେବେ ସହରକୁ ସଫା ସୁତୁରା ରଖିବା ପାଇଁ ଜନସାଧାରଣଙ୍କ ସହଯୋଗ ଆବଶ୍ୟକ ବୋଲି ସେ କହିଛନ୍ତି।
