ଦେବଗଡ଼,୨୭ା୬(ଶଶାଙ୍କ ଶେଖର ଝାଙ୍କର): ରାଜ୍ୟର ଅନ୍ୟତମ ପ୍ରସିଦ୍ଧ ରଥଯାତ୍ରା ଭାବେ ପରିଚିତ ଦେବଗଡ଼ ରଥଯାତ୍ରା ହେବା ନେଇ ସନ୍ଦେହ ସୃଷ୍ଟି ହୋଇଛି। ଆୟୋଜକ ରାଜ ପରିବାରର ଚରମ ଅବହେଳା ଏବଂ ପରିଚାଳନାଗତ ତ୍ରୁଟି ଯୋଗୁ ଏପରି ହୋଇଥିବା କୁହାଯାଉଛି।
ରଥଯାତ୍ରା ପୂର୍ବରୁ ପ୍ରତ୍ୟେକ ବର୍ଷ ବନ ବିଭାଗ ସହାୟତାରେ ରଥକାଠ ସଂଗ୍ରହ କରାଯିବା ସହ ଏହାଦ୍ୱାରା ରଥର ପୁନଃନିର୍ମାଣ କିମ୍ବା ମରାମତି କରାଯାଇଥାଏ। ମାତ୍ର ପ୍ରାୟ ତିନିବର୍ଷ ହେଲା ଏଥିରେ ବ୍ୟତିକ୍ରମ ଦେଖାଦେବା ସହ ନୂଆକାଠ ସଂଗ୍ରହ କରାଯାଇନାହିଁ। ଯଦ୍ୱାରା ରଥର ପୁନଃ ନିର୍ମାଣ କିମ୍ବା ଏହାର ପୁରୁଣା ରଥର ଉପଯୁକ୍ତ ମରାମତି କରାଯାଇନାହିଁ। ଫଳରେ ରଥର ଅବସ୍ଥା ଅସୁରକ୍ଷିତ ହୋଇପଡ଼ିବା ସହ ଏହି ଦଦରା ରଥ ଗଡ଼ିବା ଦ୍ୱାରା କୋଣସି ସମୟରେ କୌଣସି ପ୍ରକାର ଅଘଟଣ ଘଟିବାର ଆଶଙ୍କା ଦେଖାଦେଇଛି। ଏପରିକି ଏନେଇ ଦେବଗଡ଼ ପୂର୍ତ୍ତ ବିଭାଗ (ରାସ୍ତା ଓ ସୌଧ)ର ଅଧିକ୍ଷଣ ଯନ୍ତ୍ରୀ ଏନେଇ ଉପଜିଲାପାଳଙ୍କୁ ଷ୍ଟାଟସ ରିପୋର୍ଟ (ଚିଠି ନଂ-୧୬୭୯ ତା-୨୪-୦୬-୨୦୨୫) ମାଧ୍ୟମରେ ସତର୍କ କରାଇଥିବା ଜଣାପଡ଼ିଛି।
ବିଧି ଅନୁଯାୟୀ ରଥଯାତ୍ରା ପୂର୍ବରୁ ପୂର୍ତ୍ତ ବିଭାଗ (ରାସ୍ତା ଓ ସୌଧ)କର୍ତ୍ତୃପକ୍ଷଙ୍କ ଦ୍ୱାରା ରଥର ସ୍ଥିତିକୁ ପରଖାଯାଇଥାଏ । ସୁରକ୍ଷା ଦୃଷ୍ଟିରୁ ବିଭିନ୍ନ ଦିଗକୁ ଦୃଷ୍ଟିରେ ରଖି ଏହାର ବିଭିନ୍ନ ଅଂଶକୁ ଯାଞ୍ଚ କରାଯିବା ସହ ଏନେଇ ଜିଲା ପ୍ରଶାସନକୁ ଷ୍ଟାଟସ୍ ରିପୋର୍ଟ ପ୍ରଦାନ କରାଯାଇଥାଏ। ଏହି କ୍ରମରେ ଦେବଗଡ଼ ପୂର୍ତ୍ତ ବିଭାଗ (ରାସ୍ତା ଓ ସୌଧ)ର ଅଧିକ୍ଷଣ ଯନ୍ତ୍ରୀ ଇତିମଧ୍ୟରେ ରଥଯାତ୍ରା ନିମନ୍ତେ ରାଜପରିବାର ପକ୍ଷରୁ ପ୍ରସ୍ତୁତ କରାଯାଇଥିବା ରଥର ସ୍ଥିତିକୁ ଅନୁଧ୍ୟାନ ଓ ନିରୀକ୍ଷଣ କରିବା ପରେ ଉକ୍ତ ରଥରେ ଲାଗିଥିବା ଗୁରୁତ୍ୱପୂର୍ଣ୍ଣ କାଠ ଖଣ୍ଡଗୁଡ଼ିକ ନଷ୍ଟ ହେବା ସହ ବ୍ୟବହାର ଅନୁପଯୋଗୀ ହୋଇଥିବା, ରଥକୁ ଉଠିବା ଓ ଓହ୍ଲାଇବା ପାଇଁ ଉଦ୍ଦିଷ୍ଟ ଶିଡ଼ିର ଉଚ୍ଚତା ଏହାର ଢାଞ୍ଚା ତ୍ରୁଟି ରହିଥିବା ଦର୍ଶାଇବା ସହ ଏଥିରେ ସୁଧାର ଆବଶ୍ୟକ ବୋଲି ପରାମର୍ଶ ଦେଇଛନ୍ତ।
ସେହିପରି ଶିଡ଼ିରେ ଲାଗିଥିବା ଚକର ଅବସ୍ଥା ବିପଜ୍ଜନକ ରହିଥିବା ଏବଂ ରଥଯାତ୍ରା ସମୟରେ ଏହା ଭାଙ୍ଗିଯାଇପାରେ ବୋଲି ମଧ୍ୟ ପୂର୍ତ୍ତ ବିଭାଗ (ରାସ୍ତା ଓ ସୌଧ)ର ଅଧିକ୍ଷଣ ଯନ୍ତ୍ରୀ ଉପଜିଲାପାଳଙ୍କୁ ପ୍ରଦାନ କରିଥିବା ଷ୍ଟାଟସ ରିପୋର୍ଟରେ ଉଲ୍ଲେଖ କରି ଏଥିପ୍ରତି ଧ୍ୟାନ ଦେବାସହ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ତାଙ୍କ ଦ୍ୱାରା ପ୍ରସ୍ତୁତ ଷ୍ଟାଟସ୍ ରିପୋର୍ଟରେ ଉଲ୍ଲେଖ କରିଛନ୍ତି। ପୂର୍ତ୍ତ ବିଭାଗ (ରାସ୍ତା ଓ ସୌଧ)ର ଅଧିକ୍ଷଣ ଯନ୍ତ୍ରୀଙ୍କ ଏହି ରିପୋର୍ଟ ଅଧାରରେ ଉପଜିଲାପାଳ ଶ୍ରୀଜଗନ୍ନାଥ ମନ୍ଦିର, ଦେବଗଡ଼ର ମନ୍ଦିର ପରିଚାଳକଙ୍କୁ ପତ୍ର ଲେଖି ରଥରେ ରହିଥିବା ଉପରୋକ୍ତ ତ୍ରୁଟି ବିଚ୍ୟୁତିକୁ ପୂର୍ତ୍ତବିଭାଗ (ରାସ୍ତା ଓ ସୌଧ)ର ଅଧିକ୍ଷଣ ଯନ୍ତ୍ରୀ କିମ୍ବା ତାଙ୍କ ଦ୍ୱାରା ପ୍ରେରିତ କର୍ମଚାରୀଙ୍କ ଉପସ୍ଥିତିରେ ସୁଧାରିବା ସହିତ ଜରୁରୀ ପ୍ରତିକାର ମୂଳକ ଗ୍ରହଣ କରିବାକୁ ଚିଠି ନଂ- ୨୪୨୧ତା- ୨୪-୦୬-୨୫ ରିଖରେ ନିର୍ଦ୍ଦେଶ ଦେଇଥିବା ଜଣାପଡ଼ିଛି। ଏନେଇ ମତାମତ ନିମନ୍ତେ ଦେବଗଡ଼ ରାଜପରିବାରର ମୁଖ୍ୟ ନିତେଶ ଗଙ୍ଗଦେବଙ୍କୁ ଫୋନ୍ କରାଯାଇଥିଲେ ମଧ୍ୟ ମାତ୍ର ସେ କଲ୍ ରିସିଭ କରିନାହାନ୍ତି।
