ଦେବଗଡ,୫।୩: ସ୍ବାମୀ ଓ ପୁଅକୁ ଛାଡି ପ୍ରେମିକ ସହ ଫେରାର ହୋଇଥିଲେ। ହେଲେ ଯେଉଁ ପ୍ରେମିକଙ୍କ ହାତ ଧରି ଘରର ଏରୁଣ୍ଡି ଡେଇଁଥିଲେ, ସିଏ ସାଜିଲା ହତ୍ୟାକାରୀ। ପ୍ରେମିକାର ଚରିତ୍ରକୁ ସନ୍ଦେହ କରି ତଣ୍ଟି ଚିପି ହତ୍ୟା କରଛନ୍ତି। ଏପରି ବୀଭତ୍ସ ହତ୍ୟାକାଣ୍ଡ ଦେବଗଡ ଜିଲା ରିଆମାଳ ଥାନା ଅଞ୍ଚଳରେ ଘଟିଛି। ଅଭିଯୋଗ ପରେ ପୋଲିସ ହତ୍ୟାକାରୀ ପ୍ରେମିକଙ୍କ ସମେତ ୪ ଜଣଙ୍କୁ ଗିରଫ କରିଛି।
ସମ୍ବଲପୁର ଜିଲା ନାକଟିଦେଉଳ ଥାନା ବଡଖୋଲ ଗାଁର ଏହି ମହିଳାଜଣକ କିସିଣ୍ଡା ଥାନା ବଳମ ଗାଁର ଜଣେ ବ୍ୟକ୍ତିଙ୍କୁ ବିବାହ କରିଥିଲେ। ତାଙ୍କର ଗୋଟିଏ ପୁଅ ମଧ୍ୟ ରହିଛି। ସ୍ବାମୀ ଓ ପୁଅ ଥାଉ ଥାଉ ମହିଳାଜଣକ ଜଣକ କିସିଣ୍ଡା ଥାନା ବଲାସିଙ୍ଘା ଗାଁର ଜଣେ ଯୁବକଙ୍କୁ ପ୍ରେମରେ ପଡିଥିଲେ। ଉଭୟ ୨ବର୍ଷ ଧରି ପ୍ରେମ ସମ୍ପର୍କରେ ଥିଲେ। ପ୍ରେମ ସମ୍ପର୍କ ପ୍ରଘଟ ହୋଇଯିବା ସନ୍ଦେହ କରି ମହିଳାଜଣକ ସ୍ବାମୀ ଓ ପୁଅକୁ ଛାଡି ପ୍ରେମିକଙ୍କ ପାଖକୁ ପଳାଇ ଆସିଥିଲେ।
ପ୍ରେମିକ ପ୍ରମୋଦଙ୍କ ସହ ମହିଳାଜଣକ ଘର ଭଡା ନେଇ ବିଭିନ୍ନ ଅଞ୍ଚଳରେ ରହୁଥିଲେ। ହେଲେ ପରବର୍ତ୍ତୀ ସମୟରେ ସନ୍ଦେହର ଝଡ ନୂଆ ପ୍ରେମପକ୍ଷୀଙ୍କ ଘରକୁ ଉଜାଡି ଦେଇଥିଲା। ଥରେ ବିଳମ୍ବିତ ରାତିରେ ମହିଳାଜଣକ ଶୋଇଥିବାବସ୍ଥାରେ ତାଙ୍କ ପ୍ରେମିକଜଣକ ଏକ ସାଲରେ ବେକରେ ଗୁଡାଇ ହତ୍ୟା କରିଥିବା ଅଭିଯୋଗ ହୋଇଛି। ଏହାପରେ ସେ ମହିଳାଙ୍କ ମୃତଦେହକୁ ଗାଁଠାରୁ ୫୦ ମିଟର ଦୂରରେ ଥିବା ଏକ ଖେଳ ପଡିଆରେ ଗାତ ଖୋଳି ପୋତି ଦେଇଥିଲେ। ଏଥିରେ ପ୍ରେମିକଙ୍କ ବାପା , ଘର ମାଲିକ ଓ ତାଙ୍କ ପୁଅ ସାହାର୍ଯ୍ୟ କରିଥିଲେ।
ଗତ ଶୁକ୍ରବାର ଅପରାହ୍ନରେ ମହିଳାଙ୍କ ଗଳିତ ମୃତଦେହ ଠାବ ହୋଇଛି। ଗାଁ ଲୋକଙ୍କଠାରୁ ଖବର ପାଇ ପୋଲିସ ମାଟି ଖୋଳି ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି। ପରେ ମହିଳାଙ୍କ ପରିଚୟ ଜାଣିପରି ପୋଲିସ ଅପରାଧୀଙ୍କ ଖୋଜିବା ପାଇଁ ତଦନ୍ତ ଜାରି ରଖିଥିଲା। ତଦନ୍ତରେ ମହିଳାଙ୍କ ପ୍ରେମିକଙ୍କ ସମେତ ତାଙ୍କ ସହଯୋଗୀଙ୍କୁ ପୋଲିସ ଗିରଫ କରି ପଚରାଉଚରା କରୁଛି।
