ଭୁବନେଶ୍ୱର,୨୨ା୭(ବ୍ୟୁରୋ): ବିଧାୟକ ଆଞ୍ଚଳିକ ଉନ୍ନୟନ ପାଣ୍ଠି ଅଣ୍ଟୁନି। କୋଭିଡ୍ ପରେ ସବୁ ଦରଦାମ୍ ବଢ଼ିଲାଣି। ଏହାକୁ ଦୃଷ୍ଟିରେ ରଖି ଉନ୍ନୟନ ପାଣ୍ଠିକୁ ୧୦ କୋଟିକୁ ବୃଦ୍ଧି କରାଯାଉ। ଉଭୟ ଶାସକ ଓ ବିରୋଧୀ ଦଳର ସଦସ୍ୟ ବିଧାୟକ ପାଣ୍ଠି ବୃଦ୍ଧି କରିବାକୁ ଦାବି କରିଛନ୍ତି। ଗୁରୁବାର ବିଧାନସଭା ପ୍ରଶ୍ନକାଳରେ ବିଜେଡି ସଭ୍ୟ ସଞ୍ଜୀବ ମଲ୍ଲିକ ମୂଳ ପ୍ରଶ୍ନରେ ପଚାରିଥିଲେ ଯେ, ଆମ ରାଜ୍ୟରେ ବିଧାୟକ ପାଣ୍ଠି ୨ କୋଟି ଟଙ୍କା ଥିବାବେଳେ ଅନ୍ୟ ରାଜ୍ୟରେ ଏହା କେତେ ଅଛି। ଯଦି ଅନ୍ୟ ରାଜ୍ୟର ବିଧାୟକ ପାଣ୍ଠି ଆମ ରାଜ୍ୟଠାରୁ ଅଧିକ, ତେବେ ଏହାକୁ ୨ରୁ ୩ କୋଟି କରିବାକୁ ସରକାର ବ୍ୟବସ୍ଥା କରିବେ କି? ଯୋଜନା ଓ ସଂଯୋଜନ ମନ୍ତ୍ରୀ ରାଜେନ୍ଦ୍ର ଢୋଲକିଆ କହିଲେ ଯେ, ଆମ ରାଜ୍ୟରେ ବିଧାୟକ ଆଞ୍ଚଳିକ ଉନ୍ନୟନ ପାଣ୍ଠି ୨୦୨୦-୨୧ଠାରୁ ପ୍ରତି ନିର୍ବାଚନମଣ୍ଡଳୀ ପିଛା ବାର୍ଷିକ ୧ କୋଟିରୁ ୩ କୋଟିକୁ ବୃଦ୍ଧି କରାଯାଇଛି। ୧୯୯୭-୯୮ରେ ଏହା ୫ ଲକ୍ଷରୁ ଆରମ୍ଭ କରାଯାଇଥିଲା। ଏହା ସମୟକ୍ରମେ ବଢ଼ି ୩ କୋଟିରେ ପହଞ୍ଚତ୍ଛି। ବିଭିନ୍ନ ପ୍ରକାର ଜରୁରୀ ଭିତ୍ତିଭୂମିର ଉନ୍ନତି ପାଇଁ ନିର୍ବାଚନମଣ୍ଡଳୀ ପିଛା ୨ କୋଟି ସାଧାରଣରେ ଏବଂ ଉଚ୍ଚଶିକ୍ଷା ପାଇଁ ୫୦ ଲକ୍ଷ ଏବଂ ରାସ୍ତାଘାଟ ନିର୍ମାଣ ଲାଗି ୫୦ ଲକ୍ଷ ଦିଆଯାଉଛି। ମୂଳ ପ୍ରଶ୍ନକର୍ତ୍ତା ଅତିରିକ୍ତ ପ୍ରଶ୍ନରେ କହିଛନ୍ତି ଯେ, ରାଜ୍ୟର ବଡ଼ ବଡ଼ ମନ୍ଦିରଗୁଡ଼ିକର ବିକାଶ କାର୍ଯ୍ୟ ଚାଲୁରହିଛି। ମାତ୍ର ଗାଁଗୁଡ଼ିକରେ ଥିବା ଛୋଟ ଛୋଟ ମନ୍ଦିରର ବିକାଶ ପାଇଁ ଏହି ବିଧାୟକ ପାଣ୍ଠି କମ୍ ପଡୁଛି। ସେଥିପାଇଁ ସାଧାରଣ ଖର୍ଚ୍ଚ ୨ କୋଟି ବଦଳରେ ୩ କୋଟି କରାଯାଉ। ବିରୋଧୀ ଦଳ ମୁଖ୍ୟ ସଚେତକ ମୋହନ ମାଝୀ କହିଛନ୍ତି, ଯେହେତୁ ପଡ଼ୋଶୀ ରାଜ୍ୟଗୁଡ଼ିକରେ ବିଧାୟକ ପାଣ୍ଠି ୫ କୋଟି ରହିଛି ତେଣୁ ଆମ ରାଜ୍ୟରେ ମଧ୍ୟ ଏହାକୁ ୩ରୁ ୧୦ କୋଟିକୁ ବୃଦ୍ଧି କରାଯାଉ। ସରସ୍ବତୀ ଶିଶୁ ମନ୍ଦିରକୁ ବିଧାୟକ ପାଣ୍ଠିରୁ କିପରି ଅନୁଦାନ ଦିଆଯିବ ତାହାର ବ୍ୟବସ୍ଥା କରାଯାଉ। ସେହିପରି କଂଗ୍ରେସ ବିଧାୟକ ସନ୍ତୋଷ ସିଂ ସାଲୁଜା ମଧ୍ୟ ରାସ୍ତାଘାଟ ନିର୍ମାଣ, କୋଭିଡ୍ ଏବଂ ଉଚ୍ଚଶିକ୍ଷା ପାଇଁ ଥିବା ଧାର୍ଯ୍ୟ ଅର୍ଥ ସୀମାକୁ ଉଠାଯାଇ ସାଧାରଣ ଖର୍ଚ୍ଚକୁ ୩ କୋଟି କରାଯାଉ ବୋଲି ଦାବି କରିଥିଲେ। ବିଧାୟକ ଲତିକା ପ୍ରଧାନ, ଭାସ୍କର ମଢ଼େଇ, ପ୍ରମୋଦ ମଲ୍ଲିକ ପ୍ରମୁଖ ବିଧାୟକ ଉନ୍ନୟନ ପାଣ୍ଠି ବଢ଼ାଇବାକୁ ଦାବି କରିଥିଲେ। ମନ୍ତ୍ରୀ କହିଛନ୍ତି, ବିଧାୟକମାନେ ଜେନେରାଲ ଫଣ୍ଡରୁ ନେଇ ଖର୍ଚ୍ଚ କରିପାରିବେ। ଉନ୍ନୟନ ପାଣ୍ଠି ବଢ଼ାଇବା ଲାଗି ସରକାର ଏପର୍ଯ୍ୟନ୍ତ କୌଣସି ନିଷ୍ପତ୍ତି ନେଇନାହାନ୍ତି। ଆବଶ୍ୟକ ହେଲେ ଆଗାମୀ ଦିନରେ ବିଚାରବିମର୍ଶ କରି ନିଷ୍ପତ୍ତି ନିଆଯିବ।
