କେସିଙ୍ଗା,୯।୯(ତୁମେଶ୍ୱର ସାହୁ): ସମ୍ବଲପୁର ରେଳ ଡିଭିଜନ ଅନ୍ତର୍ଗତ କେସିଙ୍ଗା ରେଳ ଷ୍ଟେଶନଠାରୁ ପ୍ରାୟ ୩ କିଲୋମିଟର ଦୂରରେ ଥିବା ଡୁମେରମୁଣ୍ଡା ଗ୍ରାମ ଦେଇ କେସିଙ୍ଗା ସହରକୁ ଯାଇଥିବା ରାସ୍ତାରେ ଥିବା ରେଳ ଫାଟକ ଯୋଗୁ ଲୋକେ ଦୀର୍ଘଦିନ ଧରି ଗମନାଗମନରେ ଘୋର ସମସ୍ୟାର ସମ୍ମୁଖୀନ ହେଉଛନ୍ତି।
ଏହି ରେଳ ଫାଟକରେ ଗେଟ ପଡ଼ିଲେ ଯାତ୍ରୀମାନଙ୍କୁ ପ୍ରାୟ ଘଣ୍ଟା ଘଣ୍ଟା ଧରି ଅଟକି ରହିବାକୁ ପଡ଼ୁଛି। କେସିଙ୍ଗାରୁ ରାୟଗଡ଼ା, ରାୟପୁର ଓ ବିଶାଖାପାଟଣା ଦିଗକୁ ଯାଉଥିବା ରେଳପଥରେ ତୃତୀୟ ଲାଇନ ସଂଯୋଗ ହୋଇଥିବାରୁ ଉଭୟ ପଟୁ ଘନଘନ ଟ୍ରେନ ଯାତାୟାତ କରୁଛି। ଫଳରେ ରେଳ ଫାଟକ ବାରମ୍ବାର ବନ୍ଦ ହେବା ଯୋଗୁ ରାସ୍ତାର ଉଭୟ ପାର୍ଶ୍ୱରେ ଯାନବାହନର ଲମ୍ବା ଧାଡ଼ି ଲାଗି ରହୁଛି।
ବିଶେଷକରି ଗର୍ଭବତୀ, ପ୍ରସୂତୀ, ମହିଳା, ବୃଦ୍ଧ ଏବଂ ସଙ୍କଟାପନ୍ନ ରୋଗୀମାନେ ଏହି ଫାଟକ ନିକଟରେ ଦୀର୍ଘ ସମୟ ଧରି ଅଟକି ରହୁଛନ୍ତି। ଗୁରୁତର ରୋଗୀଙ୍କୁ ସମୟରେ ଚିକିତ୍ସାଳୟରେ ପହଞ୍ଚାଇବାରେ ବିଳମ୍ବ ହେଉଥିବାରୁ ବେଳେବେଳେ ପରିସ୍ଥିତି ଅତ୍ୟନ୍ତ ଜଟିଳ ହୋଇପଡ଼ୁଛି।
ଏହି ରେଳ ଫାଟକ ଦେଇ ବାଲସି, ପରଲସିଙ୍ଗା, ରୁପ୍ରା, ଗିଗିନା, ମୁସ୍କୁଟି, ଶିରୋଲ ସମେତ ବିଭିନ୍ନ ଗ୍ରାମ ପଞ୍ଚାୟତର ଶହ ଶହ ଲୋକ ପ୍ରତିଦିନ ଯାତାୟାତ କରୁଛନ୍ତି। ତେଣୁ ଏଠାରେ ଯଥାଶୀଘ୍ର ଏକ ଓଭରବ୍ରିଜ ନିର୍ମାଣ କରାଗଲେ ଅଞ୍ଚଳବାସୀଙ୍କ ଦୀର୍ଘଦିନର ଗମନାଗମନ ସମସ୍ୟା ଦୂର ହୋଇପାରିବ ବୋଲି ଗ୍ରାମବାସୀମାନେ କହିଛନ୍ତି।
ଏ ନେଇ ଶିରୋଲ ଗ୍ରାମ ପଞ୍ଚାୟତର ପୂର୍ବତନ ସରପଞ୍ଚ ହେମନ୍ତ ନାଗ, ବିକ୍ରାନ୍ତ ବାଗ, ମୀନକେତନ ବାଗଙ୍କ ସମେତ ବହୁ ଗ୍ରାମବାସୀ ସମ୍ବଲପୁର ରେଳ ଡିଭିଜନର ଡିଆରଏମ ଏବଂ ରେଳ କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରିଛନ୍ତି। ଜନସାଧାରଣଙ୍କ ସ୍ବାର୍ଥକୁ ଦୃଷ୍ଟିରେ ରଖି ଡୁମେରମୁଣ୍ଡା ରେଳ ଫାଟକ ଉପରେ ଶୀଘ୍ର ଓଭରବ୍ରିଜ ନିାଣ କରିବାକୁ ସେମାନେ ଦାବି କରିଛନ୍ତି।
Dharitri – Odisha’s No.1 Odia Daily
