ଯାଜପୁର ଅଫିସ,୧୮ା୧୧: ଯାଜପୁର ଜିଲା ବ୍ୟାସନଗର ପୌରପରିଷଦର ପୌରାଧ୍ୟକ୍ଷା ସଙ୍ଗୀତା ପିଙ୍ଗୁଆ ନିର୍ବାହୀ ଅଧିକାରୀଙ୍କ ଉପରକୁ ଫାଇଲ ଫିଙ୍ଗିବା ଘଟଣାକୁ ବିଭିନ୍ନ ମହଲରେ ନିନ୍ଦା କରାଯାଉଛି। ଏପରିକି ପୌରାଧ୍ୟକ୍ଷା ପିଙ୍ଗୁଆଙ୍କୁ ଗିରଫ ଏବଂ ଜିଲାପାଳ ତୁରନ୍ତ ବିହିତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହୋଇଛି। ଭାରତୀୟ ଜନତା ପାର୍ଟି(ଭାଜପା)ର ବ୍ୟାସନଗର ବ୍ୟାସଦେବ ମଣ୍ଡଳ ପକ୍ଷରୁ ଏହି ମର୍ମରେ କଳିଙ୍ଗନଗର ଅତିରିକ୍ତ ଜିଲାପାଳ ଓ ଯାଜପୁର ରୋଡ ଆଇଆଇସିଙ୍କୁ ଏକ ଦାବିପତ୍ର ପ୍ରଦାନ କରାଯାଇଛି। ଉକ୍ତ ଦାବିପତ୍ରରେ ଦର୍ଶାଯାଇଛି, ପୌରାଧ୍ୟକ୍ଷା ପିଙ୍ଗୁଆ ବିଭିନ୍ନ ଯୋଜନା ପାଇଁ ପିସି ନେବା ରାସ୍ତାରେ ନିର୍ବାହୀ ଅଧିକାରୀ ଅଶୋକ କୁମାର ରାଉତ ବାଧକ ସାଜିଥିଲେ। ତେଣୁ ନିର୍ବାହୀ ଅଧିକାରୀ ରାଉତଙ୍କୁ ହଟାଇବାକୁ ବିଭିନ୍ନ ସମୟରେ ଗାଳିଗୁଲଜ କରିବା ସହ ଶେଷରେ ପିତୃତୁଲ୍ୟ ବୟସର ଜଣେ କର୍ତ୍ତବ୍ୟନିଷ୍ଠ ଅଧିକାରୀଙ୍କ ଉପରକୁ ଫାଇଲ ଫୋପାଡ଼ିବା ଏକ ଦଣ୍ଡନୀୟ ଅପରାଧ। ତେଣୁ ଅଧିକାରୀ ରାଉତ ଦେଇଥିବା ଏତଲାକୁ କାର୍ଯ୍ୟକାରୀ କରାଯାଇ ପୌରାଧ୍ୟକ୍ଷା ପିଙ୍ଗୁଆଙ୍କୁ ଗିରଫ କରାଯାଉ ବୋଲି ଦର୍ଶାଯାଇଛି। ଏହି ଦାବିପତ୍ରରେ ବ୍ୟାସଦେବ ମଣ୍ଡଳର ସଭାପତି ଅଚ୍ୟୁତାନନ୍ଦ ଦାଶ, ରାଜ୍ୟ ମହିଳା ମୋର୍ଚ୍ଚାର ସମ୍ପାଦିକା ଇତିଶ୍ରୀ ଜେନା, ଚନ୍ଦ୍ରଶେଖର ପଣ୍ଡା, ଗଣେଶ ମାଝି, ନିରଞ୍ଜନ ଘଡେଇ, ଗୋପାଳକୃଷ୍ଣ ପାଢୀ, ପ୍ରଶାନ୍ତ ବୋଇତେଇ, ଦେବାଶିଷ ପାଣିଗ୍ରାହୀ, ସଞ୍ଜୟ ବାରିକ ପ୍ରମୁଖଙ୍କ ଦସ୍ତଖତ ରହିଛି।
ସେହିପରି କୋରାଇ ସଂଗ୍ରାମ ସମିତିର ସଭାପତି ବିଦ୍ୟାଧର ମହାନ୍ତି ଏକ ବିଜ୍ଞପ୍ତିରେ କହିଛନ୍ତି, ପୌରାଧ୍ୟକ୍ଷା ଓ କାର୍ଯ୍ୟନିର୍ବାହୀ ଅଧିକାରୀଙ୍କ ମଧ୍ୟରେ ହୋଇଥିବା ବିବାଦର ଉଚ୍ଚସ୍ତରୀୟ ତଦନ୍ତ ନ କରି ନିର୍ବାହୀ ଅଧିକାରୀଙ୍କୁ ରାତିଅଧିଆ ବଦଳି କରାଯାଇଛି। ତାଙ୍କ ସ୍ଥାନରେ କୌଣସି ନିର୍ବାହୀ ଅଧିକାରୀଙ୍କୁ ନିଯୁକ୍ତି ନ ଦେବା ବ୍ୟାସନଗରବାସୀଙ୍କ ପ୍ରତି ଉପହାସ। ସହରବାସୀ ଯେଉଁ ଆଶା ଓ ବିଶ୍ୱାସ ରଖି ପ୍ରତ୍ୟକ୍ଷ ନିର୍ବାଚନରେ ବିଜେଡିର ସଙ୍ଗୀତା ପିଙ୍ଗୁଆଙ୍କୁ ପୌରାଧ୍ୟକ୍ଷା ଭାବେ ନିର୍ବାଚିତ କରିଥିଲେ ତାର ବ୍ୟତିକ୍ରମ ଦେଖାଦେଇଛି। ୮ ମାସ ମଧ୍ୟରେ ବିକାଶ ପରିବର୍ତ୍ତେ ଦୁର୍ନୀତି ଉଦ୍ଦେଶ୍ୟ ରଖି ସେ ଭୁଲ କରି ଚାଲିଛନ୍ତି। ମୋବାଇଲ ଟାୱାର ସ୍ଥାପନ ଏକ ବାହାନା। ବାଓମେଟ୍ରିକ ବ୍ୟବସ୍ଥା ଲାଗୁ ହେବା ଓ ସଫେଇ କାର୍ଯ୍ୟରେ ମାସିକିଆ ବଟି ନ ପାଇବା ଦ୍ୱାରା ଏଭଳି ବିବାଦ ଆରମ୍ଭ ହୋଇଥିବା ଜଣାପଡୁଛି । ବ୍ୟାସନଗର ଭଳି ଏକ ଭାଇଚାରା ସହରରେ ଜଣେ ପୌରାଧ୍ୟକ୍ଷାଙ୍କ ଦ୍ୱାରା ଜଣେ ଅଧିକାରୀଙ୍କ ପ୍ରତି ଏଭଳି ବ୍ୟବହାର ସମସ୍ତଙ୍କୁ ବ୍ୟଥିତ କରିଛି ା ଅଧିକାରୀ ଦୁର୍ନୀତି କରି ରାତି ଅଧିଆ ବଦଳି ହେଲେ ନା ଦୁର୍ନୀତିକୁ ପ୍ରଶ୍ରୟ ନ ଦେବାରୁ ନେତାଙ୍କ ପ୍ରରୋଚନାରେ ତାଙ୍କୁ ଅନ୍ୟତ୍ର ବଦଳି କରାଗଲା ତା’ଉପରେ ଏକ ଉଚ୍ଚସ୍ତରୀୟ ତଦନ୍ତର ଆବଶ୍ୟକତା ରହିଛି। ତେଣୁ ଜିଲାପାଳ ଯାଜପୁର ପୌରାଧ୍ୟକ୍ଷାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେ ଦାବି କରିଛନ୍ତି।
ସହରର ବର୍ଜ୍ୟବସ୍ତୁ ପରିଚାଳନା ପାଇଁ ପୌର ପରିଷଦର ନିଜସ୍ବ ବ୍ୟବସ୍ଥା ଏ ପର୍ଯ୍ୟନ୍ତ କାର୍ଯ୍ୟକାରୀ ହୋଇପାରିନାହିଁ। ସହର ଉପକଣ୍ଠ ବ୍ୟାସସରୋବର ନିକଟରେ ଆବର୍ଜନା ଗଦା କରାଯାଇ ପରିବେଶକୁ ଆହୁରି ଦୂଷିତ କରାଯାଇଛି । ବହୁ ଉଦ୍ୟମ ପରେ ବ୍ୟାସ ସରୋବର ରେଳଲାଇନ କଡରେ ସମ୍ପଦ କେନ୍ଦ୍ର ନିର୍ମାଣ କରାଯାଇଥିଲେ ହେଁ ବର୍ଜ୍ୟବସ୍ତୁର ଉପଯୁକ୍ତ ପରିଚାଳନା ହୋଇ ପାରୁନାହିଁ। ବିଭିନ୍ନ ସ୍ଥାନରେ ବର୍ଜ୍ୟବସ୍ତୁକୁ ପୋଡାଯାଇ ପରିବେଶକୁ ଦୂଷିତ କରୁଥିବା ଦେଖିବାକୁ ମିଳିଛି। ଏହି ପରିପ୍ରେକ୍ଷୀରେ ପୌର ପରିଷଦର ନବ ନିର୍ବାଚିତ ଅଧ୍ୟକ୍ଷା, ଉପାଧ୍ୟକ୍ଷ ଓ କାଉନସିଲର ବୃନ୍ଦ ବର୍ଜ୍ୟବସ୍ତୁ ପରିଚାଳନାରେ ଦେଖାଦେଇଥିବା ସମସ୍ୟାର ଦୂରଗାମୀ ସମାଧାନ କରିବା ପରିବର୍ତ୍ତେ ନୀରବ ରହୁଛନ୍ତି। ନିୟୋଜିତ ସଫେଇ ଠିକାସଂସ୍ଥା କେତେଜଣ ଅଧିକାରୀ ଏବଂ ଜନପ୍ରତିନିଧିଙ୍କୁ ନିଜ ପକେଟରେ ରଖି ସିଂହଭାଗ ଅର୍ଥ ହରିଲୁଟ କରୁଥିବା ଅଭିଯୋଗ ହୋଇଆସୁଛି। କିନ୍ତୁ ଜିଲାପାଳ କିମ୍ବା କୌଣସି ଉଚ୍ଚ ପଦସ୍ଥ ଅଧିକାରୀଙ୍କ ପଦକ୍ଷେପ ଶୂନ ରହିଛି। ଏ ସଂକ୍ରାନ୍ତରେ ପୌରାଧ୍ୟକ୍ଷା ପିଙ୍ଗୁଆଙ୍କୁ ଯୋଗାଯୋଗ କରାଯାଇଥିଲା। ହେଲେ ସେ ଫୋନ କଲ ଗ୍ରହଣ ନ କରିବାରୁ ତାଙ୍କ ପ୍ରତିକ୍ରିୟା ମିଳିପାରିନାହିଁ ।
