ନୂଆଦିଲ୍ଲୀ,୨।୨: ସେକ୍ସ ଭିଡିଓ ଦେଖାଇ ବ୍ଲାକମେଲ କରୁଥିବା ଷ୍ଟାଫ୍ଙ୍କୁ ହତ୍ୟା ଘଟଣାରେ ଜଣେ ପୋଷାକ ବ୍ୟବସାୟୀଙ୍କୁ ଗିରଫ କରାଯାଇଛି। ଏଭଳି ଘଟଣା ସାମ୍ନାକୁ ଆସିଛି ଦକ୍ଷିଣ ଦିଲ୍ଲୀର ସରୋଜିନି ନଗର ଅଞ୍ଚଳରୁ। ବ୍ୟବସାୟୀଙ୍କ ସହ ତାଙ୍କ ପୁତୁରାଙ୍କୁ ମିଶାଇ ମୋଟ ୩ ଜଣଙ୍କୁ ଗିରଫ କରାଯାଇଥିବା ପୋଲିସ ଅଧିକାରୀ ଗୌରବ ଶର୍ମା କହିଛନ୍ତି।
ସେମାନେ ୨୨ ବର୍ଷୀୟ ଷ୍ଟାଫ୍ଙ୍କ ମୃତଦେହକୁ ଏକ ଟ୍ରଲି ବ୍ୟାଗରେ ପୂରାଇ ସରୋଜିନି ନଗରର ମେଟ୍ରୋ ଷ୍ଟେଶନ ବାହାରେ ଛାଡ଼ି ଆସିଥିଲେ। ଅନ୍ୟ ଜଣେ କର୍ମଚାରୀଙ୍କ ସହ ବ୍ୟବସାୟୀଙ୍କ ଶାରୀରିକ ସମ୍ପର୍କ ଥିଲା। ଏହାର ଭିଡିଓ ରେକର୍ଡ କରି ବ୍ୟବସାୟୀଙ୍କଠାରୁ ଟଙ୍କା ଦାବି କରୁଥିଲେ ର୍ମଚାରୀ। ଯଦି ସେ ଟଙ୍କା ନ ଦିଅନ୍ତି, ତେବେ ତାଙ୍କ ଭିଡିଓକୁ ସୋସିଆଲ ମିଡିଆରେ ଭାଇରାଲ କରିବାକୁ କର୍ମଚାରୀ ଧମକ ଦେଇଥିଲେ ବୋଲି ପୋଲିସ ଅଧିକାରୀ କହିଛନ୍ତି।
ଏଥିଯୋଗୁ କର୍ମଚାରୀଙ୍କୁ ହତ୍ୟା କରିବାକୁ ଯୋଜନା କରିଥିଲେ ବ୍ୟବସାୟୀ। ସହାୟତା ପାଇଁ ଉତ୍ତରପ୍ରଦେଶରେ ରହୁଥିବା ପୁତୁରାଙ୍କୁ ଜାନୁୟାରୀ ୨୮ ତାରିଖରେ ଦିଲ୍ଲୀ ଡକାଇଥିଲେ। ସରୋଜିନି ନଗରଠାରୁ ୩ କିମି ଦୂର ୟୁସୁଫ ସରାଇସ୍ଥିତ ଏକ ଗେଷ୍ଟ ହାଉସରେ ୨ଟି ରୁମ୍ ବୁକ୍ କରିଥିଲେ ସେମାନେ। କିଛି କାମ ପାଇଁ କର୍ମଚାରୀଙ୍କୁ ଗେଷ୍ଟହାଉସ ଡକାଇଥିଲେ। ସେଠାରେ ତାଙ୍କ ହାତ ଗୋଡ଼ ବାନ୍ଧି, ହତ୍ୟା କରିଥିଲେ। ତା’ ପରେ ମୃତଦେହକୁ ଟ୍ରଲି ବ୍ୟାଗରେ ରଖି ଟାକ୍ସି ଜରିଆରେ ଯାଇଥିଲେ ସରୋଜିନି ନଗର ମେଟ୍ରୋ ଷ୍ଟେଶନ। ହତ୍ୟା ପରେ ମୃତକଙ୍କ ପୋଷାକ, ଟୋପି, ବ୍ୟାଗକୁ ଅନ୍ୟ ଏକ ମେଟ୍ରୋ ଷ୍ଟେଶନ ବାହାରେ ଫୋପାଡ଼ି ଦେଇଥିଲେ। କର୍ମଚାରୀଙ୍କ ଫୋନଙ୍କୁ ବ୍ୟବସାୟୀଙ୍କ ପୁତୁରା ଉତ୍ତରପ୍ରଦେଶ ଗାଁକୁ ନେଇ ପଳାଇଥିଲେ ବୋଲି ପୋଲିସ ପକ୍ଷରୁ କୁହାଯାଇଛି।
