କାଳିଆପାଣି,୫ା୫(ଡି.ଏନ.ଏ.):ସୁକିନ୍ଦା ବନାଞ୍ଚଳ ଅଧୀନ ଚିଙ୍ଗୁଡ଼ିପାଳ ପଞ୍ଚାୟତର ନଗଡ଼ା ଜଙ୍ଗଲକୁ ଜୁଆଙ୍ଗମାନେ ପୋଡୁଚାଷ ପାଇଁ ବ୍ୟବହାର କରୁଛନ୍ତି। ସେଥିପାଇଁ ନଗଡ଼ାରେ ଆରମ୍ଭ ହେଲାଣି ଜଙ୍ଗଲ କଟା। ବର୍ଷା ଦିନେ ଉକ୍ତ ଚାଷ କରିବା ପାଇଁ ପାହାଡ଼ର ଜଙ୍ଗଲ କାଟି ସଫା କରାଯାଉଛି। ଜଙ୍ଗଲରେ ବସବାସ କରୁଥିବା ଜନଜାତି ଜୁଆଙ୍ଗମାନେ ଶହଶହ ଏକର ପାହାଡ଼ରୁ ଗଛ କାଟି ସେଥିରେ ନିଆଁ ଲଗାଇ ଚାଷ ଉପଯୋଗୀ ଭାବେ ପ୍ରସ୍ତୁତ କରୁଥିବା ଦେଖିବାକୁ ମିଳିଛି। ତେବେ ଜଙ୍ଗଲ ସୁରକ୍ଷା ନିମନ୍ତେ ସରକାର ବିପୁଳ ଟଙ୍କା ଖର୍ଚ୍ଚ କରିବା ସହିତ ଦକ୍ଷ ପଦାଧିକାରୀ, ସ୍କ୍ବାଡ୍ ଓ ବନ ଜଗୁଆଳି ନିଯୁକ୍ତି ଦେବା ଶହ ଆବଶ୍ୟକ ଯନ୍ତ୍ରପାତି ଏବଂ ଯାନବାହନ ଯୋଗାଇ ଦେଇଥିଲେ ମଧ୍ୟ ସେ ସବୁ ଫେଲ୍ ମାରିଛି। ଜଙ୍ଗଲକୁ ବନ ବିଭାଗର ବହୁ କର୍ମଚାରୀ ଜଗି ରହିଥିବାବେଳେ ୪ ଚକିଆ ଗାଡ଼ିରେ ଘୂରି ବୁଲୁଥିବା ଦେଖିବାକୁ ମିଳୁଛି। ହେଲେ ନଗଡ଼ାରେ ପାହାଡ଼ରୁ ଗଛ କାଟି ସେଥିରେ ନିଆଁ ଲଗାଇ ସଫା କରା ଯାଉଥିଲେବି ବନ ବିଭାଗ କୌଣସି କାର୍ଯ୍ୟାନୁଷ୍ଠାନ ନେଉନାହିଁ। ଏହା ଏକ ଆଶ୍ଚଯ୍ୟର ବିଷୟ ପାଲଟିଛି।
ବିଗତ ଦିନରେ ନଗଡ଼ା ପାର୍ବତ ଅଞ୍ଚଳରେ ପୋଡୁଚାଷର ଏକ ଭୂସ୍ବର୍ଗ ଥିଲା। ହେଲେ ନଗଡ଼ାରେ ଅପପୁଷ୍ଟି ଶିଶୁ ମୃତ୍ୟୁ ପରେ ରାଜ୍ୟ ସରକାରଙ୍କ ବଡ଼ ଅଧିକାରୀ ନଗଡ଼ାଗସ୍ତରେ ଆସିଥିଲେ। ତେଣୁ ବନ ବିଭାଗର ଅଧିକାରୀମାନେ କାଠଚୋରି ରୋକିବା ସହ ପୋଡୁଚାଷରେ ଲଗାମ ଲଗାଇ ଲଣ୍ଡା ପାହାଡ଼ରେ ଚାରାରୋପଣ କରି ସବୁଜିମା ସୃଷ୍ଟି କରିଥିଲେ। ଏବେ ବନ ବିଭାଗର ନିଷ୍କ୍ରିୟତା ଯୋଗୁ ଜୁଆଙ୍ଗମାନେ ପୁଣି ସବୁଜ ଶ୍ୟାମଳ ପାହାଡ଼କୁ କାଟି ଲଣ୍ଡା କରିବାର ପନ୍ଥା ଆପଣେଇଥିବା ଅନୁମାନ କରାଯାଉଛି। ତୁରନ୍ତ ବନ ବିଭାଗ ହସ୍ତକ୍ଷେପ କରି ଆବଶ୍ୟକ କାର୍ଯ୍ୟାନୁଷ୍ଠାନ ଗ୍ରହଣ ନ କଲେ ପୋଡୁଚାଷ ପାଇଁ ପାହାଡ଼ ଧ୍ୱସଂ ହୋଇଯିବ, ଏଥିରେ ସନ୍ଦେହ ନାହିଁ। ଏ ସମ୍ପର୍କରେ ପ୍ରତିକ୍ରିୟା ପାଇଁ ଫରେଷ୍ଟର ନରେଶ କୁମାର ଟୁଡୁଙ୍କୁ ଫୋନ ଯୋଗେ ଯୋଗାଯୋଗ କରାଯାଇଥିଲେ ମଧ୍ୟ ତାଙ୍କ ପ୍ରତିକ୍ରିୟା ମିଳି ପାରିନାହିଁ।
