ମହାକାଳପଡ଼ା,୧୩ା୪ (ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ରାମନଗରସ୍ଥିତ ପ୍ରସିଦ୍ଧ ଶକ୍ତିପୀଠ ମା’ ରାମଚଣ୍ଡୀ ମନ୍ଦିରରେ ଦିନକ ପରେ ପଣା ସଂକ୍ରାନ୍ତି ଓ ଝାମୁଯାତ୍ରା ଅନୁଷ୍ଠିତ ହେବ। ଏହା ଏକ ସପ୍ତାହ ପର୍ଯ୍ୟନ୍ତ ଅନୁଷ୍ଠିତ ହେବ। ମା’ଙ୍କ ମନ୍ଦିର ପରିସରରେ ଚନ୍ଦନ ପୋଖରୀ ରହିଛି। ଏହା ଶୁଖିଲା ପଡିଥିବାବେଳେ ଆଣ୍ଠୁଏ ପାଣି ରହିଛି। ଏଥିପାଇଁ ଶତାଧିକ ଶ୍ରଦ୍ଧାଳୁ, ବିଭିନ୍ନ ଦୋକାନ ବଜାର ବ୍ୟବସାୟୀମାନେ ହଇରାଣ ହରକତ ହେବାର ଆଶଙ୍କା ରହିଛି ବୋଲି କୁହାଯାଉଛି। ଅପରପକ୍ଷରେ ମନ୍ଦିର ପରିସରରେ ନବୀକରଣ କାର୍ଯ୍ୟ ଯୋଗୁ ଦୁଇଟି ପାଦଧୂଆ ତୁଠରେ ପଙ୍କ ଓ କାଦୁଅ ସରସର ହୋଇପଡିଛି। ଶ୍ରଦ୍ଧାଳୁମାନେ ମା’ଙ୍କ ଦର୍ଶନ କରିବା ପୂର୍ବରୁ ଏହି ଚନ୍ଦନ ପୋଖରୀରେ ପାଦ ଧୌତ କରିବେ। ହେଲେ ପଙ୍କ, କାଦୁଅ ଯୋଗୁ କିପରି ପାଦ ଧୌତ କରିବେ ବୋଲି ଶ୍ରଦ୍ଧାଳୁମାନେ ଅସନ୍ତୋଷ ପ୍ରକାଶ କରିଛନ୍ତି। ସେହିପରି ମା’ଙ୍କ ମେଳାରେ ହଜାରରୁ ଅଧିକ ଛୋଟ ବଡ଼ ଦୋକାନ ବଜାର ପସରା ମେଲାଇବେ। ପୋଖରୀରେ ଜଳ ସମସ୍ୟା ଯୋଗୁ ବଡ଼ ଧରଣର ଅଘଟଣକୁ ଏଡ଼ାଇ ଦେଇହେବ ନାହିଁ ବୋଲି କୁହାଯାଉଛି। ୨୦୨୨ରେ ଏକ ଜଳଖିଆ ଦୋକାନରେ ଗ୍ୟାସ୍ ସିଲିଣ୍ଡର ଲିକ୍ ଯୋଗୁ ଅଗ୍ନିକାଣ୍ଡ ଘଟିଥିଲା। ପରେ ସମସ୍ତଙ୍କ ସହଯୋଗରେ ବଡ଼ ଧରଣର ଅଗ୍ନିକାଣ୍ଡରୁ ରକ୍ଷା ପାଇଥିଲା। ସେହିପରି ଜମ୍ବୁ ଦ୍ୱୀପ ମହୋତ୍ସବ ଓ ମା’ଙ୍କ ମନ୍ଦିର ପରିସର ମଧ୍ୟରେ ଶ୍ରଦ୍ଧାଳୁମାନଙ୍କ ଭିଡ଼ ପରିଲକ୍ଷିତ ହେବା ଯୋଗୁ ଲୁଟେରାମାନଙ୍କ ପ୍ରାଦୁର୍ଭାବ ରହିବ। ସେଥିପାଇଁ ପୋଲିସ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯିବାର ଆବଶ୍ୟକତା ରହିଛି। ପ୍ରତିବର୍ଷ ମହିଳାମାନଙ୍କଠାରୁ ମନିପର୍ସ, ସୁନାଗହଣା ଓ ଭ୍ୟାନିଟ ବ୍ୟାଗଗୁଡ଼ିକ ଲୁଟେରାମାନେ ଲୁଟ୍ କରିବା ବହୁ ନଜିର ରହିଛି। ସୁରକ୍ଷା ବ୍ୟବସ୍ଥା କଡାକଡି କରିବାକୁ ଜମ୍ବୁ ସାମୁଦ୍ରିକ ଥାନା ପକ୍ଷରୁ ୨ ପ୍ଲାଟୁନ୍ ପୋଲିସ ଫୋର୍ସ ମୁତୟନ ହେବାର ଯୋଜନା ରହିଛି ବୋଲି ସୂଚନା ମିଳିଛି। ଏ ସଂକ୍ରାନ୍ତରେ ମହାକାଳପଡ଼ା ତହସିଲଦାର ତଥା ମନ୍ଦିର ସୋଲ ଟ୍ରଷ୍ଟ ରବିନାରାୟଣ ଆଚାର୍ଯ୍ୟଙ୍କୁ ପଚାରିବାରେ ମା’ଙ୍କ ମେଳା ଶାନ୍ତି ଶୃଙ୍ଖଳା ରକ୍ଷା କରିବାକୁ ସମସ୍ତଙ୍କ ସହଯୋଗ ରହିଛି। କୌଣସି ସମସ୍ୟା ନଜରକୁ ଆସିଲେ ଯୁଦ୍ଧକାଳୀନ ଭିତ୍ତିରେ ପଦକ୍ଷେପ ଗ୍ରହଣ କରାଯିବ ବୋଲି ସେ କହିଛନ୍ତି।
