କେନ୍ଦୁଝର,୨୭ା୧୧(ସ୍ବ.ପ୍ର.): ବାମେବାରୀ ଥାନା ଅନ୍ତର୍ଗତ ବସନ୍ତପୁରଠାରେ ଥିବା ଏଏସ୍ଏଲ ମାଇନିଂ ଆଣ୍ଡ୍ ଇଣ୍ଡଷ୍ଟ୍ରିଜ ପିଲେଟ ଏବଂ ବେନିଫିକେଶନ କାରଖାନା ପରିସରରେ ଗତ ଗୁରୁବାର ଏକ ଲୁହାପଥର ଗୁଣ୍ଡ ବୋଝେଇ ଏକ ଟିପର ଦୁର୍ଘଟଣା ଘଟି ଜଣେ ଟିପର ଚାଳକଙ୍କ ମୃତ୍ୟୁ ଘଟିଥିଲା। କାରଖାନା ପରିସରରେ ଟ୍ରାଫିକ ସୁରକ୍ଷା ବ୍ୟବସ୍ଥା ଢିଲା ଓ ଭିତରେ ଥିବା ରାସ୍ତା ବିପର୍ଯ୍ୟସ୍ତ ହୋଇଥିବାରୁ ଅନେକ ସମୟରେ ଛୋଟ ବଡ଼ ଦୁର୍ଘଟଣା ଘଟୁଥିବାବେଳେ ଏବେ ଆଉ ଏକ ଦୁର୍ଘଟଣାରେ ଜଣଙ୍କର ଜୀବନ ଯାଇଛି। ମୃତ ଚାଳକଙ୍କ ନାମ ଛେଦି ମୁଣ୍ଡା(୩୧)ବୋଲି ଜଣାପଡ଼ିଛି। ଏହାକୁ ନେଇ ବାମେବାରୀ ଥାନାରେ କେସ୍ ନଂ ୨୦୨ରେ ଏକ ମାମଲା ରୁଜୁ ହୋଇଥିବା ବେଳେ ପୋଲିସ ପକ୍ଷରୁ ତଦନ୍ତ ଆରମ୍ଭ ହୋଇଛି। ଏହା ସହିତ ସହକାରୀ କାରଖାନା ଓ ବାଷ୍ପିତ ନିର୍ଦ୍ଦେଶାଳୟ ପକ୍ଷରୁ ମଧ୍ୟ ତଦନ୍ତ ଆରମ୍ଭ ହୋଇଛି। ଏହି ଘଟଣାକୁ ଭିନ୍ନ ମୋଡ଼ ଦେଇ ଚପାଇ ଦେବାକୁ ଉଦ୍ୟମ ହେଉଥିବା କୁହାଯାଉଛି। କାରଖାନା ପରିସରରେ ସାଧାରଣତଃ ବିପର୍ଯ୍ୟସ୍ତ ରାସ୍ତାଘାଟ, ଧୂଳିଧୂଆଁ ପ୍ରଦୂଷଣ, ଅସୁରକ୍ଷିତ ଟ୍ରାଫିକ ବ୍ୟବସ୍ଥା ଆଦି ଯୋଗୁ ଦୁର୍ଘଟଣା ହୋଇଥାଏ। ଏଣୁ ଏସବୁ ପ୍ରତି କାରଖାନା କର୍ତ୍ତୃପକ୍ଷ କ’ଣ କ’ଣ ବ୍ୟବସ୍ଥା କରିବେ ସେ ନେଇ ସ୍ବତନ୍ତ୍ର ଗାଇଡ୍ଲାଇନ ରହିଛି। ଏଥିପାଇଁ ଏସବୁ ଅବ୍ୟବସ୍ଥା ତଦାରଖ ପାଇଁ ପ୍ରଦୂଷଣ ନିୟନ୍ତ୍ରଣ ବୋର୍ଡ,ଶ୍ରମ ବିଭାଗ,କାରଖାନା ଓ ବାଷ୍ପିତ ବିଭାଗ ଗସ୍ତ କରି ଯାଞ୍ଚ କରିଥାନ୍ତି। ଦୁର୍ଘଟଣା ରୋକିବା ପାଇଁ ରାସ୍ତାଘାଟ ନିୟମିତ ସଫେଇ କରିବା ସହ ଧୂଳିଧୂଆଁ ରୋକିବା ପାଇଁ ପାଣି ସିଞ୍ଚନ,ଚଳାଚଳ କରୁଥିବା ଗାଡ଼ିଗୁଡ଼ିକ ଚକା ଧୋଇବା ପାଇଁ ବ୍ୟବସ୍ଥା ଜରୁରୀ। ଏଣୁ ଏସବୁ ବ୍ୟବସ୍ଥା ହୋଇଛି କି ନାହିଁ ସେସବୁ ଘଟଣାର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ମୃତ ଡ୍ରାଇଭରଙ୍କୁ କ୍ଷତିପୂରଣ ଦେଇ ନ୍ୟାୟ ଦେବାକୁ ଦାବି ହୋଇଛି। ଏନେଇ ବାମେବାରୀ ଥାନାଧିକାରୀ ସ୍ବରୂପ ରଞ୍ଜନ ନାୟକ କହିଛନ୍ତି, ଘଟଣାକୁ ନେଇ କେସ୍ କରାଯାଇ ତଦନ୍ତ ଚାଲିଛି। ସହକାରୀ ନିର୍ଦ୍ଦେଶକ କାରଖାନା ଓ ବାଷ୍ପିତ ବିଭାଗର ଇଂ କେଦାର ନାଥ ହାଁସଦାଙ୍କୁ ଯୋଗାଯୋଗ କରିବାରୁ କାରଖାନା ପରିସରରେ ଦୁର୍ଘଟଣାର ତଦନ୍ତ ଚାଲିଛି। ମୃତଦେହ ବ୍ୟବଚ୍ଛେଦ ରିପୋର୍ଟ ମିଳିବା ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏ ନେଇ କାରଖାନାର ଅଧିକାରୀ ଓମ୍ପ୍ରକାଶ ସେନାପତି କହିଛନ୍ତି, ଦୁର୍ଘଟଣା ସମ୍ପର୍କରେ ପୋଲିସ ଓ କାରଖାନା ବାଷ୍ପିତ ବିଭାଗକୁୁ ସୂଚନା ଦିଆଯାଇଛି। ସେମାନେ ଏହାର ଯାଞ୍ଚ କରୁଛନ୍ତି। ସେହିପରି ଶ୍ରମ ବିଭାଗ, ପ୍ରଦୂଷଣ ନିୟନ୍ତ୍ରଣ ବୋର୍ଡ ଏବଂ କାରଖାନା ଓ ବାଷ୍ପିତ ନିର୍ଦ୍ଦେଶାଳୟକୁ ନେଇ ଗଠିତ ସେଣ୍ଟ୍ରାଲ ଇନ୍ସପେକ୍ସନ କୋ-ଅଡିନେଶନ ଗ୍ରୁପ୍(ସିଆଇସିଜି) ନିୟମିତ ଅନୁଧ୍ୟାନ କରିବାର ବ୍ୟବସ୍ଥା ରହିଥିଲେ ହେଁ ସେସବୁ ସଠିକ୍ ଭାବରେ ପାଳନ ହେଉ ନ ଥିବାରୁ ଏଭଳି ଅଘଟଣ ଘଟୁଥିବା ଆଲୋଚନା ହେଉଛି।
