ନୂଆଦିଲ୍ଲୀ,୯।୯: ଯେତେବେଳେ କୌଣସି ବ୍ୟକ୍ତି ବ୍ୟାଙ୍କ ଖାତା ଖୋଲନ୍ତି, ତେବେ ତାହାର ୧ ସପ୍ତାହ ପରେ ଘରେ ଏଟିଏମ କାର୍ଡ (ଡେବିଟ କାର୍ଡ) ପହଞ୍ଚିଥାଏ। ତେବେ ନୂତନ ସେବା ଯୋଗୁଁ କେତେକ କ୍ଷେତ୍ରରେ ଗୋଟିଏ ଦିନରେ ମଧ୍ୟ ଏଟିଏମ କାର୍ଡ ମିଳିଯାଉଛି। କିନ୍ତୁ ଏବେ ଖୁବ ଶୀଘ୍ର ସରକାର ଏକ ନୂଆ ସୁବିଧା ଆରମ୍ଭ କରିବାକୁ ଯାଉଛନ୍ତି। ଏହା ଅଧୀନରେ ଏବେ ସିଧାସଳଖ ଏଟିଏମରୁ ହିଁ ଡେବିଟ କାର୍ଡ ମିଳିଯିବ। ଆସନ୍ତୁ ଜାଣିବା ଏହି ବ୍ୟବସ୍ଥା କିପରି କାମ କରିବ।
ମୁମ୍ୱାଇରେ ସେପ୍ଟେମ୍ୱର ୮ରୁ ୧୧ ମଧ୍ୟରେ ଗ୍ଲୋବାଲ ଫିନ୍ଟେକ ଫେଷ୍ଟ ୨୦୨୬ ଅନୁଷ୍ଠିତ ହେଉଛି। ଏହାର ଦ୍ୱିତୀୟ ଦିନ ଅର୍ଥାତ ଆଜି ସେପ୍ଟେମ୍ୱର ୯ ସନ୍ଧ୍ୟାରେ ଡିଏଫଏସ (DFS) ସଚିବ ଏହି ନୂତନ ସୁବିଧାର ଶୁଭାରମ୍ଭ କରିବାକୁ ଯାଉଛନ୍ତି। ଏହି ନୂତନ ସୁବିଧା ପୁରୁଣା ଡେବିଟ କାର୍ଡ ପ୍ରଦାନ ପ୍ରକ୍ରିୟାକୁ ସମ୍ପୂର୍ଣ୍ଣ ଭାବରେ ବଦଳାଇ ଦେବ।
ଏହି ନୂତନ ସୁବିଧାର ମୁଖ୍ୟ ଉଦ୍ଦେଶ୍ୟ ହେଉଛି ବର୍ତ୍ତମାନର ଡେବିଟ କାର୍ଡ ପ୍ରଦାନ ପ୍ରକ୍ରିୟାକୁ ଅଧିକ ସହଜ ଏବଂ ଦ୍ରୁତ କରିବା। ସାଧାରଣତଃ ଏବେ ନୂଆ ଡେବିଟ କାର୍ଡ ପାଇବା ପାଇଁ ଗ୍ରାହକଙ୍କୁ ବ୍ୟାଙ୍କ ଶାଖାରେ ଆବେଦନ କରିବାକୁ ପଡ଼ିଥାଏ। ଏହା ପରେ କାର୍ଡ ପ୍ରସ୍ତୁତ ହୋଇ ଗ୍ରାହକଙ୍କ ପାଖରେ ପହଞ୍ଚିବା ପାଇଁ ସମୟ ଲାଗେ। କିନ୍ତୁ ଏଟିଏମ ଜରିଆରେ ମିଳିବାକୁ ଥିବା ଏହି ନୂତନ ସୁବିଧା ଦ୍ୱାରା ଗ୍ରାହକମାନେ ତୁରନ୍ତ କାର୍ଡ ପାଇପାରିବେ।
ଏହି ବ୍ୟବସ୍ଥା ଆରମ୍ଭ ହେବା ପରେ ଗ୍ରାହକ ବ୍ୟାଙ୍କ ଶାଖାକୁ ଯିବା ପରିବର୍ତ୍ତେ ଏଟିଏମ ମାଧ୍ୟମରେ ମଧ୍ୟ ଡେବିଟ କାର୍ଡ ପାଇପାରିବେ। ଏହାଦ୍ୱାରା ଗ୍ରାହକଙ୍କ ସମୟ ବଞ୍ଚିବ ଏବଂ କାର୍ଡ ପ୍ରଦାନ ପ୍ରକ୍ରିୟା ମଧ୍ୟ ଅଧିକ ସୁବିଧାଜନକ ହେବ। ବିଶେଷ କରି ଯେଉଁ ଗ୍ରାହକଙ୍କୁ ତୁରନ୍ତ ଡେବିଟ କାର୍ଡର ଆବଶ୍ୟକତା ଥାଏ, ସେମାନେ ଏହାଦ୍ୱାରା ଅଧିକ ଲାଭବାନ ହେବେ।
ଏହି ନୂତନ ବ୍ୟବସ୍ଥା ଲାଗୁ ହେବା ପରେ ବ୍ୟାଙ୍କ ଶାଖାକୁ ନ ଯାଇ ଗ୍ରାହକଙ୍କୁ ସିଧାସଳଖ ଡେବିଟ କାର୍ଡ ମିଳିଯିବ। ଯଦି ଆପଣଙ୍କ ଡେବିଟ କାର୍ଡ ହଜିଯାଇଛି କିମ୍ୱା ଏକ୍ସପାୟାର (ଅବଧି ଶେଷ) ହୋଇଯାଇଛି, ତେବେ ଆପଣ ଏହି ସୁବିଧାର ଲାଭ ଉଠାଇପାରିବେ। ଏହାଦ୍ୱାରା ବାରମ୍ୱାର ବ୍ୟାଙ୍କ ଦୌଡ଼ିବା ଚିନ୍ତା ଦୂର ହେବ ଏବଂ ଆପଣ ନିକଟସ୍ଥ ଏଟିଏମକୁ ଯାଇ ନୂଆ ଡେବିଟ କାର୍ଡ ପାଇଁ ଆବେଦନ କରିପାରିବେ।
ଏହି ପଦକ୍ଷେପ ଦ୍ୱାରା ବ୍ୟାଙ୍କିଙ୍ଗ ସେବା ଆହୁରି ଅତ୍ୟାଧୁନିକ ହୋଇପାରିବ। ଏଟିଏମ ଆଧାରିତ ଡେବିଟ କାର୍ଡ ପ୍ରଦାନ ସୁବିଧା ଯୋଗୁଁ ଗ୍ରାହକଙ୍କୁ ତୁରନ୍ତ ସେବା ମିଳିବ ଏବଂ ଏହା ସହିତ ବ୍ୟାଙ୍କ ଶାଖାଗୁଡ଼ିକ ଉପରେ ମଧ୍ୟ କାର୍ଯ୍ୟଭାର ହ୍ରାସ ପାଇବ।
