ଚେନ୍ନାଇ,୨୪।୯: ୨୦୦୩ରେ ଅନ୍ୟ ଜାତିରେ ବିବାହ କରିବାରୁ ଦମ୍ପତିଙ୍କୁ ହତ୍ୟା କରିଥିଲେ ଯୁବତୀଙ୍କ ପରିବାର ଲୋକେ। ଏହି ଅନର କିଲିଂ ମାମଲାର ଶୁଣାଣି କରି ତାମିଲନାଡୁର କୁଡାଲୋର ଜିଲାର ଏକ କୋର୍ଟ ଶୁକ୍ରବାର ଜଣଙ୍କୁ ଫଶି ଦଣ୍ଡାଦେଶ ଦେଇଛନ୍ତି। ମାମଲାରେ ଜଡ଼ିତ ୨ ପୋଲିସ କର୍ମୀଙ୍କ ସମେତ ୧୨ ଜଣଙ୍କୁ ଆଜୀବନ ଦଣ୍ଡ ଶୁଣାଇଛନ୍ତି କୋର୍ଟ।
୧୮ ବର୍ଷ ତଳେ ୨୨ ବର୍ଷୀୟା ଡି କାନାଗି ଓ ଏସ୍ ମୁରୁଗେସେନ ୨୦୦୩ରେ ପ୍ରେମ ବିବାହ କରିଥିଲେ। ଘର ଲୋକଙ୍କ ଭୟରେ ସେମାନେ ବାହାରେ ରହୁଥିଲେ। କିନ୍ତୁ ସେମାନଙ୍କ ବିବାହକୁ ଗ୍ରହଣ କରି ନ ଥିଲେ ଯୁବତୀଙ୍କ ପରିବାର ଲୋକେ। ସେମାନେ ଗ୍ରାମବାସିଙ୍କ ଆଗରେ ଦମ୍ପତିଙ୍କୁ ନିର୍ଯାତନା ଦେଇଥିଲେ। ତା’ ପରେ ପ୍ରେମି ଯୋଡ଼ାଙ୍କ ନାକରେ ବେଷ ପୂରାଇ ହତ୍ୟା କରିବା ପରେ ସେମାନଙ୍କ ମୃତଦେହକୁ ଜାଳି ଦେଇଥିଲେ। ସେହି ସମୟରେ ଗାଁର ମୁଖିଆ ଥିଲେ ଡି କାନାଗିଙ୍କ ବାପା।
ଏହି ହତ୍ୟାକାଣ୍ଡକୁ ପ୍ରଥମେ ଲୁଚାଇବାକୁ ଉଦ୍ୟମ କରିଥିଲା ସ୍ଥାନୀୟ ପୋଲିସ। ଏପରି କି ଏସ୍ ମୁରୁଗେସେନଙ୍କ ପରିବାର ପକ୍ଷରୁ ଅଭିଯୋଗ କରାଯିବା ପରେ ମଧ୍ୟ ପୋଲିସ ମାମଲା ଦାୟର କରି ନ ଥିଲା। ୨୦୦୪ରେ ଏହି ମାମଲାର ତଦନ୍ତ ଦାୟିତ୍ୱ ଦିଆଯାଇଥିଲା ସିବିଆଇକୁ। ସିବିଆଇ ତା’ର ରିପୋର୍ଟରେ ୧୫ ଅଭିଯୁକ୍ତଙ୍କ ନାମରେ ମାମଲା ଦାୟର କରିବା ସହ ୮୧ ଜଣ ସାକ୍ଷୀଙ୍କ ନାମ ଉଲ୍ଲେଖ କରିଥିଲା। ୪୬ ଜଣ ସାକ୍ଷୀ ନିଜ ବୟାନରୁ ଓହରି ଯିବା କାରଣରୁ ମୁରୁଗେସେନଙ୍କ ପରିବାରକୁ ନ୍ୟାୟ ପାଇଁ ଅପେକ୍ଷା କରିବାକୁ ପଡ଼ିଥିଲା ୨ ଦଶନ୍ଧି।
ଶୁକ୍ରବାର ମାମଲାର ଶୁଣାଣି କରିଥିବା ସ୍ବତନ୍ତ୍ର କୋର୍ଟ ପୀଡ଼ିତାଙ୍କ ଭାଇଙ୍କୁ ମୃତ୍ୟୁ ଦଣ୍ଡାଦେଶ ଦେଇଛନ୍ତି। ତାଙ୍କ ବାପା, ସେତେବେଳର ଇନ୍ସପେକ୍ଟର, ସବ ଇନ୍ସପେକ୍ଟରଙ୍କୁ ଆଜୀବନ ଜେଲ ଦଣ୍ଡ ଦିଆଯାଇଛି।
