ମୁମ୍ବାଇ,୨୩।୩: ଦକ୍ଷିଣ ଆଫ୍ରିକୀୟ ପେସର ଅନରିଚ ନର୍ଟଜେ ଆସନ୍ତା ଅପ୍ରିଲରୁ ଖେଳିବା ପାଇଁ ଫିଟ୍ ହୋଇଯିବେ। ଏହା ଦିଲ୍ଲୀ କ୍ୟାପିଟାଲ୍ସ ପାଇଁ ସବୁଠୁ ବଡ଼ ଆଶ୍ୱସ୍ତି। ଦକ୍ଷିଣ ଆଫ୍ରିକୀୟ ପେସର କ୍ୟାପିଟାଲ୍ସର ତୃତୀୟ ମ୍ୟାଚ୍ରୁ ଉପଲବ୍ଧ ହେବେ ବୋଲି ଫ୍ରାଞ୍ଚାଇଜର ଜଣେ ଅଧିକାରୀ କହିଛନ୍ତି। ଅପ୍ରିଲ ୭ ତାରିଖରେ ଡିଓ୍ବାଇ ପାଟିଲ ଷ୍ଟାଡିୟମରେ ହେବାକୁ ଥିବା ମ୍ୟାଚ୍ରେ ଲକ୍ଷ୍ନୌ ସୁପର ଜ୍ୟାଣ୍ଟସକୁ ଭେଟିବ ରିଷଭ ପନ୍ତଙ୍କ ନେତୃତ୍ୱାଧୀନ ଡିସି। ନର୍ଟଜେ ମୁମ୍ବାଇରେ ପହଞ୍ଚିବା ପରଠାରୁ ଦୁଇ ଦିନ ହେଲା କ୍ୱାରେଣ୍ଟିନରେ ଅଛନ୍ତି।
ନିକଟ ଅତୀତରେ ଦିଲ୍ଲୀ ପାଇଁ ସବୁଠୁ ସଫଳ ପ୍ରଦର୍ଶନ କରିଥିବା ପେସର ନର୍ଟଜେଙ୍କୁ ୬.୫ କୋଟି ଟଙ୍କାରେ ଫ୍ରାଞ୍ଚାଇଜ ରିଟେନ କରିଥିଲା। କିନ୍ତୁ ଆହତ ସମସ୍ୟା କାରଣରୁ ଗତ ବର୍ଷ ନଭେମ୍ବରରୁ ସେ କୌଣସି ପ୍ରତିଦ୍ୱନ୍ଦ୍ୱିତା ମୂଳକ ମ୍ୟାଚ୍ରେ ଖେଳି ନାହାନ୍ତି।
