କଣାସ,୨୧।୮(ସ୍ବ.ପ୍ର.): ୪ଦିନ ଧରି ଲଘୁଚାପ ବର୍ଷା ଲାଗିରହିବା ଏବଂ ବନ୍ୟାଜଳ ଆସିବା ଦ୍ୱାରା କଣାସ ବ୍ଲକରେ ପ୍ରବାହିତ ହେଉଥିବା ଦୟାନଦୀ ଏବଂ ଶାଖାନଦୀ ରାଜୁଆ, ମକରା, କାଣିଆ, ଲୁଣାନଦୀର ଜଳପତନ ବୃଦ୍ଧି ପାଇବାରେ ଲାଗିଛି। କଣାସଠାରେ ଦୟାନଦୀର ବିପଦସଙ୍କେତ ୩.୯୯ମି. ଥିବାବେଳେ ଗୁରୁବାର ଦୟାନଦୀର ଜଳପତନ ବୃଦ୍ଧି ପାଇ ୪.୧୯ମି. ପ୍ରବାହିତ ହେଉଥିବା ଦେଖାଯାଇଛି। ଫଳରେ ଦୟା ଓ ରାଜୁଆ ନଦୀର ମଧ୍ୟବର୍ତ୍ତୀ ଅଞ୍ଚଳ ଦୋକନ୍ଦା, ବଡାସ, ଗଡବଳଭଦ୍ରପୁର ପଞ୍ଚାୟତର ଦୋକନ୍ଦା, ବାଲିପାଟଣା, ତରପଡା, ବଡାସ, କଖାରୁବସ୍ତ, ବୈଦ୍ୟନାଥପାଟଣା, ସବଳଙ୍ଗ, ତେନ୍ତୁଳିମୂଳ, ଗଡବଳଭଦ୍ରପୁର ଗ୍ରାମର ଧାନଜମି ଉପରେ ୬ରୁ ୭ଫୁଟ ବନ୍ୟାଜଳ ରହିଛି। ଉକ୍ତ ଜମିଗୁଡ଼ିକରେ ଚାଷୀମାନେ ଅଧିକ ସଂଖ୍ୟାରେ କଖାରୁ, ବାଇଗଣ, କଲରା, ପୋଟଳ, ଲଙ୍କା, ଝୁଡ଼ଙ୍ଗ, ଜହ୍ନି, ଭେଣ୍ଡି ଆଦି ଚାଷ କରିଥିଲେ। ସେଗୁଡିକ ୪ଦିନ ହେଲା ବୁଡି ରହିଥିବାରୁ ଚାଷୀମାନେ ଏବେ ଚିନ୍ତାରେ ଅଛନ୍ତି। ତେବେ ବନ୍ୟାଜଳ ସହ ଲଘୁଚାପ ବର୍ଷା ଲାଗିରହିଥିବାରୁ ଏଭଳି ପରିସ୍ଥିତି ସୃଷ୍ଟି ହୋଇଛି। ପରିସ୍ଥିତି ଦେଖି ଏହାର ମୁକାବିଲା କରାଯିବ ବୋଲି କଣାସ ଜଳସେଚନ ବିଭାଗ ସହକାରୀ ଯନ୍ତ୍ରୀ ମକରା ବେହେରା ଓ ଖୋର୍ଦ୍ଧା ଜଳସେଚନ ବିଭାଗ ସହକାରୀ ଯନ୍ତ୍ରୀ ସରୋଜ କୁମାର ପଟ୍ଟନାୟକ କହିଛନ୍ତି। ବଡଧରଣର ବନ୍ୟା ଆଶଙ୍କାରେ ଜଳସେଚନ ବିଭାଗ ପକ୍ଷରୁ ନଦୀ ବନ୍ଧର ସୁରକ୍ଷା ପାଇଁ କଣାସ ବ୍ଲକର ବିଭିନ୍ନ ସ୍ଥାନରେ ବାଲି, ବଲ୍ଲା, ଖାଲିବସ୍ତା ମହଜୁଦ ରଖାଯାଇଛି ।
