ମେଲବୋର୍ନ,୨୭।୧୨:ବକ୍ସିଂ ଡେ ଟେଷ୍ଟ ମ୍ୟାଚରେ ଡେଭିଡ ୱାର୍ନର ଦକ୍ଷିଣ ଆଫ୍ରିକା ବିପକ୍ଷରେ ଇତିହାସ ସୃଷ୍ଟି କରିଛନ୍ତି। ୱାର୍ନର ତାଙ୍କର ୧୦୦ତମ ଟେଷ୍ଟ ମ୍ୟାଚରେ ଦ୍ୱିଶତକ ହାସଲ କରିଛନ୍ତି। ସେ ତାଙ୍କ ଇନିଂସରେ ୨୫୪ ବଲରେ ୨୦୦ ରନ କରିଥିଲେ। ଏହି ସମୟ ମଧ୍ୟରେ ସେ ୧୬ଟି ଚୌକା ଓ ୨ଟି ଛକା ମାରିଥିଲା। ଦ୍ୱିଶତକ ହାସଲ କରିବା ମାତ୍ରେ ୱାର୍ନର ତାଙ୍କ ନାମରେ ଅନେକ ବଡ଼ ରେକର୍ଡ ସୃଷ୍ଟି କରିଛନ୍ତି।
୧୦୦ତମ ଟେଷ୍ଟ ମ୍ୟାଚରେ ଦ୍ୱିଶତକ ହାସଲ କରିବାରେ ୱାର୍ନର ପ୍ରଥମ ଅଷ୍ଟ୍ରେଲୀୟ ତଥା ବିଶ୍ୱର ଦ୍ୱିତୀୟ ବ୍ୟାଟ୍ସମ୍ୟାନ ହୋଇପାରିଛନ୍ତି। ତାଙ୍କ ପୂର୍ବରୁ କେବଳ ଇଂଲଣ୍ଡର କିମ୍ବଦନ୍ତୀ ବ୍ୟାଟ୍ସମ୍ୟାନ ଜୋ ରୁଟ ଏହି କୀର୍ତ୍ତିମାନ ହାସଲ କରିବାରେ ସକ୍ଷମ ହୋଇଥିଲେ। ସେ ଭାରତ ବିପକ୍ଷରେ ୨୦୨୧ରେ ନିଜର ୧୦୦ତମ ଟେଷ୍ଟରେ ୨୧୮ ରନର ଏକ ଇନିଂସ ଖେଳିଥିଲେ।
ଦକ୍ଷିଣ ଆଫ୍ରିକା ବିପକ୍ଷରେ ଓପନର୍ ଭାବରେ ଡେଭିଡ ୱାର୍ନର ୪୫ତମ ଶତକ ହାସଲ କରିଥିଲେ। ଏହି ଶତକ ସହିତ ସେ ଭାରତର ମହାନ ପୂର୍ବତନ କ୍ରିକେଟର ସଚିନ ତେନ୍ଦୁଲକରଙ୍କ ସହ ସମକକ୍ଷ ହୋଇଛନ୍ତି। ସଚିନ ମଧ୍ୟ ଓପନର୍ ଭାବରେ ତାଙ୍କ କ୍ୟାରିୟରରେ ୪୫ ଶତକ ସ୍କୋର କରିଛନ୍ତି। ଯଦିଓ ସଚିନ ଦିନିକିଆରେ ଏହି ସବୁ ଶତକ ସ୍କୋର କରିଛନ୍ତି। ଅନ୍ୟପକ୍ଷରେ ୱାର୍ନର ଦିନିକିଆ, ଟେଷ୍ଟ ଏବଂ ଟି-୨୦ ମ୍ୟାଚ ସମେତ ଓପନର୍ ଭାବରେ ୪୫ ଶତକ ହାସଲ କରିଛନ୍ତି।
ଟେଷ୍ଟ ପୂର୍ବରୁ ତାଙ୍କ ୧୦୦ତମ ଦିନିକିଆରେ ଡେଭିଡ ୱାର୍ନର ମଧ୍ୟ ଏକ ଶତକ ହାସଲ କରିଥିଲେ। ସେ ୨୦୧୭ରେ ବେଙ୍ଗାଲୁରୁରେ ଭାରତ ବିପକ୍ଷରେ ଶତକ ହାସଲ କରିଥିଲେ। ଏଥି ସହିତ, ପାଞ୍ଚ ବର୍ଷ ପରେ ସେ ନିଜର ୧୦୦ତମ ଟେଷ୍ଟ ମ୍ୟାଚରେ ଦ୍ୱିଶତକ ସ୍କୋର କରି ଇତିହାସ ସୃଷ୍ଟି କରିଛନ୍ତି। ଏହା କରିବାରେ ସେ ଅଷ୍ଟ୍ରେଲିଆର ପ୍ରଥମ ବ୍ୟାଟ୍ସମ୍ୟାନ ଏବଂ ବିଶ୍ୱରେ ଦ୍ୱିତୀୟ।
ଏହି ସ୍ମରଣୀୟ ଇନିଂସ ସମୟରେ ୱାର୍ନର ମଧ୍ୟ ତାଙ୍କ ଟେଷ୍ଟ କ୍ୟାରିୟରରେ ୮୦୦୦ ରନ ପୂରଣ କରିଥିଲେ। ଅବଶ୍ୟ, ୱାର୍ନର ୨୦୦ ରନ ସ୍କୋର କରିବା ମାତ୍ରେ ସେ କ୍ରାମ୍ପର ଶିକାର ହୋଇଥିଲେ। ପରେ ରିଟାର୍ଟ ହର୍ଟ ହୋଇ ପାଭିଲିୟନକୁ ଫେରିଥିଲେ।
